Фарғона вилояти ҳокимлиги

Президент Шавкат Мирзиёев иштирокида мазкур қутлуғ байрам муносабати билан ҳудудларда янги объектларни ишга тушириш маросими бўлиб ўтди.
 

Бугунги маросимда мамлакатимизнинг барча ҳудудларида умумий қиймати қарийб 50 триллион сўм бўлган 72 та йирик саноат ва сервис лойиҳаси ҳамда 91 та ижтимоий соҳа объекти фойдаланишга топширилди. Уларнинг очилиши Мустақиллик байрамига муносиб туҳфа бўлди.

Қувасой шаҳридаги “Қўқон” эркин иқтисодий зонасининг Қувасой филиалида ҳам автомобил эҳтиёт қисмларини ишлаб чиқариш лойиҳасига старт берилди.

Ҳудудий студияда вилоят ҳокими Хайрулло Бозоров, инвесторлар ҳамда нуронийлар иштирок этди.

Тадбирда сўзга чиққан вилоят раҳбари Фарғона вилояти аҳли номидан Президентимизни ва бутун халқимизни Ўзбекистон Республикаси давлат мустақиллигининг 35 йиллик қутлуғ айёми билан самимий табриклади. Мамлакатимизнинг барча ҳудудларида янги саноат корхоналари, ижтимоий ва инфратузилма объектларининг ишга туширилаётгани Янги Ўзбекистонда давлатимиз раҳбари бошчилигида амалга оширилаётган кенг кўламли ислоҳотларнинг амалий натижаси экани таъкидланди.

Бугунги кунда Фарғона вилоятида умумий қиймати 8 миллиард долларлик 400 дан ортиқ лойиҳа доирасида амалий ишлар олиб борилмоқда. Жорий йилда 4,5 миллиард долларлик хорижий инвестицияларни ўзлаштириш режалаштирилган.

Мустақиллик байрами арафасида вилоятда умумий қиймати 1,45 триллион сўмлик 10 та янги корхона фойдаланишга топширилмоқда. Уларнинг ишга туширилиши натижасида мингдан ортиқ юқори даромадли янги иш ўрни яратилади.

Тадбир доирасида ана шундай йирик лойиҳалардан бири — Қувасой шаҳридаги Кореянинг “Hansae Mobility Turan” корхонаси тантанали равишда ишга туширилди. Корхонада автомобиль эҳтиёт қисмлари ишлаб чиқарилади.
 

Мазкур лойиҳага 30 миллион долларлик хорижий инвестиция йўналтирилган. 150 та иш ўрни яратилди.

Бир вақтнинг ўзида Данғара туманида автоклав газобетон, Учкўприк туманида алюминий профиллар ва улардан тайёр маҳсулотлар ишлаб чиқариш корхоналари иш бошлади.

Фарғона шаҳрида замонавий тиббиёт клиникаси очилди. Марғилон ва Фарғона шаҳарлари, шунингдек, Ўзбекистон ва Қува туманларида янги таълим масканлари фойдаланишга топширилди.