Фарғона вилояти ҳокимлиги

Тадбирда вилоят ҳокимининг ўринбосари Шерзоджон Полвонов соҳа вакилларини касб байрами билан самимий табриклаб, уларнинг жамиятда очиқлик ва ошкораликни таъминлаш, холис ва тезкор ахборотни аҳолига етказиш ҳамда вилоят ижтимоий-иқтисодий ҳаётини кенг ёритишдаги муносиб ҳиссасини алоҳида эътироф этди.

Вилоят ҳокими Хайрулло Бозоровнинг соҳа вакилларига йўллаган байрам табригини ўқиб эшиттирди.

Унда қайд этилганидек, бугунги кунда вилоят журналистикаси нафақат мамлакатимизда, балки халқаро майдонда ҳам ўз нуфузини мустаҳкамлаб бормоқда. Бу эса журналистлар, теле ва радио ходимлари, ахборот хизматлари мутахассислари ҳамда блогерларнинг фидокорона меҳнати самарасидир.

Тадбирда мамлакатимизда очиқлик, сўз эркинлиги ва жамоатчилик билан мулоқот давлат сиёсати даражасига кўтарилгани, оммавий ахборот воситалари давлат органлари ва жамият ўртасида ишончли кўприк вазифасини бажараётгани таъкидланди.

Шунингдек, бугунги глобал ахборот муҳити журналистика соҳаси олдига янги вазифаларни қўяётгани қайд этилиб, ахборот маконида холислик ва тезкорликни таъминлаш, таҳлилий журналистикани ривожлантириш, сунъий интеллект имкониятларидан самарали фойдаланиш, ёш журналистларни қўллаб-қувватлаш, миллий контентлар улушини ошириш каби муҳим йўналишларга алоҳида эътибор қаратиш зарурлиги қайд этилди.

Вилоятда медиа соҳасини ривожлантириш борасида амалга оширилаётган ишлар ҳам эътироф этилди. Жумладан, вилоят ҳокимлиги муассислигидаги “Янги Фарғона” газетаси ҳузурида медиа марказ ташкил этилгани, “Фарғона”, “Рухсор”, “Мулоқот” телеканаллари ва радиоларида долзарб мавзулардаги кўрсатув ва эшиттиришлар тайёрланаётгани, шунингдек, интернет нашрлари ва ахборот платформаларининг фаоллиги тобора ортиб бораётгани таъкидланди.

Тадбир давомида матбуот соҳасида кўп йиллик самарали меҳнати, жамият ҳаётидаги фаол иштироки ва касбий маҳорати билан ажралиб турган бир гуруҳ соҳа вакиллари вилоят ҳокимининг фахрий ёрлиғи ҳамда эсдалик совғалари билан тақдирланди.

Байрам тадбири эл севган хонандалар ижросидаги куй-қўшиқлар, рақс жамоаларининг чиқишлари билан давом этиб, иштирокчиларга кўтаринки кайфият улашди.