Фарғона вилояти ҳокимлиги

Мактабгача ва мактаб таълими вазирлиги Ҳайъат йиғилиши бугун Фарғона шаҳридаги “Фарғона Expo” халқаро кўргазмалар мажмуасида бўлиб ўтди.
Унда вилоят ҳокими Хайрулло Бозоров, Мактабгача ва мактаб таълими вазири Эъзоза Каримова,  вазир ўринбосарлари, ҳудудий бошқармалар, туман ва шаҳар бўлимлари, тизим ташкилотлари раҳбарлари ҳамда Республика “Келажак маркази” масъул ходимлари иштирок этди.

Тадбирда вилоят ҳокими Хайрулло Бозоров сўз олиб, семинар иштирокчиларини муҳим анжуман билан қутлади. Ушбу семинар таълим соҳасида амалга оширилаётган ислоҳотларни чуқур таҳлил қилиш, илғор тажрибаларни оммалаштириш ва истиқболдаги устувор вазифаларни белгилаб олишда муҳим аҳамият касб этишини таъкидлади.

Вилоят раҳбари кейинги йилларда Президентимиз ташаббуслари натижасида таълим тизимида амалга оширилаётган туб ўзгаришлар, замонавий ва илғор хорижий тажрибалар асосида жорий этилаётган янгиланишларга тўхталиб, Янги Ўзбекистонни барпо этадиган билимли, рақобатбардош ва замонавий фикрлайдиган ёш авлодни тарбиялаш устувор вазифа эканини қайд этди.

Шунингдек, Учинчи Ренессанс пойдеворини мустаҳкамлаш, аждодларга муносиб авлодни тарбиялаш йўлида таълим соҳасига қаратилаётган юксак эътибор ва инвестициялар мамлакат келажаги учун муҳим омил бўлаётганини алоҳида таъкидлади.

Йиғилишда Мактабгача ва мактаб таълими вазири Эъзоза Каримова ҳам сўзга чиқиб соҳада амалга оширилаётган ислоҳотлар самараси, келгусидаги устувор вазифалар ҳамда ҳудудлардаги раҳбар кадрлар масъулияти ҳақида тўхталди. Шу билан бирга, Фарғона вилояти таълим тизимида қўлга киритилаётган ижобий натижалар юқори баҳоланиб, “Фарғона тажрибаси”ни республика миқёсида оммалаштириш зарурлиги қайд этилди.

Тадбир давомида таълим соҳаси ривожига қўшган муносиб ҳиссаси учун вилоят ҳокими Хайрулло Бозоровга вазирликнинг “Халқ таълим фидойиси” кўкрак нишони топширилди. Шунингдек, Фарғона шаҳри, Данғара ва Олтиариқ туманлари ҳокимлари “Таълим ҳомийси” кўкрак нишонлари билан тақдирланди.

Йиғилишда жорий ўқув йилини самарали якунлаш, “Сўнгги қўнғироқ” тадбирларини юқори савияда ташкил этиш масалалари ҳам муҳокама қилинди. Масъулларнинг ҳисоботлари тингланиб, белгиланган вазифалар ижросини тизимли таъминлаш юзасидан тегишли тавсиялар берилди.