Вилоят ҳокими Хайрулло Бозоровнинг Ўзбекистон Республикаси Президентининг Фарғона вилоятидаги Халқ қабулхонасида навбатдаги фуқаролар қабули бўлиб ўтди.
2026-05-15 17:30:00 / Янгиликлар
Қабул жараёнида фуқаролар томонидан моддий ёрдам олиш, соғлиқни тиклаш ва даволаниш, электр энергияси ҳамда ичимлик суви таъминотини яхшилаш, маҳаллаларни ободонлаштириш, фарзандларининг хорижда таълим олиши учун амалий кўмак бериш каби масалалар юзасидан мурожаатлар амалга оширилди.
Шунингдек, бандликни таъминлаш, тадбиркорлик фаолиятини йўлга қўйиш ва уй-жой билан боғлиқ муаммолар ҳам атрофлича кўриб чиқилди.
Мурожаатларнинг аксарияти қабул жараёнининг ўзидаёқ ижобий ҳал этилди. Қўшимча ўрганиш талаб қиладиган масалалар бўйича эса мутасадди ташкилот ва идоралар раҳбарларига аниқ топшириқлар берилди. Уларни жойига чиққан ҳолда ўрганиш, қонуний ва адолатли ечим ишлаб чиқиш вазифаси белгиланди. Ҳар бир мурожаат ижроси қатъий назоратга олинди.
Қабул давомида муаммолари ҳал этилган фуқаролар мамлакатимизда инсон қадри ва манфаатларини таъминлашга қаратилаётган эътибор, яратилаётган имкониятлар учун давлатимиз раҳбарига самимий миннатдорлик билдирдилар.