“Фарғонада — Янги Ўзбекистон нафаси” шиори остида пресс-тур ўтказилмоқда
2026-05-05 19:45:00 / Янгиликлар
Унда етакчи оммавий ахборот воситалари вакиллари, жамоатчилик фаоллари ҳамда блогерлар иштирок этмоқда.
Пресс-тур иштирокчилари Ўзбекистон Республикаси Президенти Шавкат Мирзиёевнинг жорий йил 27-28 апрель кунлари Фарғона вилоятига ташрифи доирасида танишган йирик объектларда бўлиб, ҳудудда амалга оширилаётган бунёдкорлик ишлари, ижтимоий-иқтисодий лойиҳалар ҳамда янгиланиш жараёнларини кўздан кечиришади.
Дастлаб Фарғона шаҳридаги IT-парк мажмуасида яратилган имкониятлар билан танишилди. Бу ерда фрилансерлар ва дастурчилар учун замонавий коворкинг муҳити, резидент компаниялар учун тўлиқ жиҳозланган офислар ташкил этилган. Таълим, ишлаб чиқариш ва хизмат кўрсатиш жараёнлари ўзаро интеграция қилинган ҳолда йўлга қўйилган бўлиб, бу ёшларнинг бандлигини таъминлаш ва барқарор даромад манбаларини шакллантиришга хизмат қилмоқда.
Келгусида мазкур мажмуада сунъий интеллект технологиялари хабини ташкил этиш, бошқарув тизимларини рақамлаштириш ҳамда IT-таълимни янада ривожлантиришга қаратилган лойиҳаларни амалга ошириш режалаштирилган. Шунингдек, дастурлаш, график дизайн, компьютер саводхонлиги ва инглиз тили бўйича замонавий ўқув курсларини йўлга қўйиш кўзда тутилган.
Пресс-тур қатнашчилари шунингдек, Инвесторларга хизмат кўрсатиш маркази — “Фарғона экспо” халқаро кўргазмалар мажмуаси фаолияти ҳам кўздан кечирилди. Мазкур мажмуа вилоятнинг иқтисодий салоҳиятини кенг намойиш этиш, саноат кооперациясини ривожлантириш, экспорт ҳажмини ошириш ҳамда инвесторлар учун қулай ишбилармонлик муҳитини яратишга қаратилган.
Марказда йил давомида 15 та асосий тармоқ йўналиши бўйича доимий кўргазма ва ярмаркалар ташкил этилган бўлиб, уларда ҳунармандчилик, қурилиш материаллари, электротехника, машинасозлик, тўқимачилик, чарм-пойабзал ва заргарлик соҳалари маҳсулотлари намойиш этилмоқда. Шунингдек, алоҳида залларда озиқ-овқат саноати, экологик транспорт, нефть-газ, мебелсозлик, фармацевтика ҳамда кимё саноати маҳсулотлари тақдим этилган.
Мазкур икки йирик иншоотда бўлган журналистлар ўз саволларига масъуллардан жавоблар олишди.