Екатеринбург шаҳрида Ўзбекистон Республикаси Бош консулхонаси ҳамкорлигида “Ўзбекистон ва Урал ўртасида қурилиш соҳасида шерикликни ривожлантириш” мавзусида давра суҳбати бўлиб ўтди
2026-04-07 20:20:00 / Янгиликлар
Мазкур давра суҳбати икки ҳудуд ўртасидаги савдо-иқтисодий алоқаларни янада мустаҳкамлаш, айниқса, инвестиция соҳасида ўзаро манфаатли ҳамкорликни кенгайтиришга қаратилгани билан аҳамият касб этди.
Тадбир доирасида Фарғона вилоятининг иқтисодий салоҳияти, қулай инвестиция муҳити, мавжуд саноат зоналари, инфратузилма имкониятлари ҳамда истиқболли инвестиция лойиҳалари тақдимоти ўтказилди. Шу билан бирга, қурилиш материаллари ишлаб чиқариш, замонавий уй-жойлар ва инфратузилма объектларини барпо этиш йўналишларида хорижий шериклар билан ҳамкорлик имкониятлари атрофлича ёритилди.
Учрашув давомида Урал минтақасининг етакчи компаниялари вакиллари билан амалий музокаралар олиб борилиб, истиқболли лойиҳаларни амалга ошириш, илғор технология ва тажрибаларни жорий этиш, янги инвестиция келишувларини шакллантириш юзасидан фикр алмашилди.
Томонлар мазкур йўналишдаги ҳамкорликни изчил давом эттириш, ўзаро манфаатли лойиҳаларни кенгайтиришга тайёр эканликларини билдирдилар.