Фарғонада “Марказий Осиё давлатлари ва Озарбайжон” дўстлик форуми бўлиб ўтмоқда
2026-03-30 18:45:00 / Янгиликлар
Форум доирасида Фарғона шаҳридаги “Дўстлик уйи”да Ўзбекистонда истиқомат қилаётган турли миллат ва элатларнинг маданияти, санъати ҳамда миллий қадриятларини тарғиб этувчи маданий-маърифий тадбир ташкил этилди.
Тадбир иштирокчилари дастлаб вилоятда фаолият юритаётган саккизта миллий маданий марказ — тожик, қирғиз, турк, корейс, немис, татар, славян ва яҳудий марказлари учун ажратилган махсус хоналар билан танишдилар. Ҳар бир марказ вакиллари ўз миллатига хос урф-одатлар, бой анъаналар ва маданий меросни маҳорат дарслари ҳамда бадиий чиқишлар орқали намойиш этдилар.
Мазкур тадбир турли миллат вакиллари ўртасидаги дўстлик ва ҳамжиҳатлик муҳитини янада мустаҳкамлаб, уларнинг бир оиладек аҳил эканлигини яққол намоён этди.