Фарғона вилояти ҳокимлиги

Ушбу тизимнинг муҳим жиҳати аҳоли томонидан қўшимча маблағ тўлаш талаб этилмайди — тиббий хизматлар давлат бюджети ҳисобидан молиялаштирилади. 

Дастлаб Сирдарё вилоятида тажриба тариқасида йўлга қўйилган тизим 2026 йил якунига қадар республиканинг барча ҳудудларини қамраб олиши режалаштирилган. Хусусан, апрель ойидан бошлаб Фарғона вилоятида ҳам жорий этилади.

Янги тизим доирасида ҳар бир тиббиёт муассасаси кесимида давлат томонидан кафолатланган бепул тиббий хизматлар ва дори воситалари пакетлари ишлаб чиқилмоқда. Ушбу пакетлар Ўзбекистон фуқаролари, доимий яшовчи чет эл фуқаролари ҳамда фуқаролиги бўлмаган шахсларга тақдим этилади.

Энг муҳими, барча жараёнлар рақамлаштирилмоқда. Фуқаролар текширув натижаларини олиш учун шифохонага бориши шарт эмас. Натижалар ҳақида маълумотлар оилавий шифокор томонидан SMS орқали юборилади. 

Шунингдек, давлат тиббий суғуртаси тизими доирасида Реимбурсация, яъни “харажатларни қоплаш” маъносини англатадиган  дастур амалга оширилмоқда.  

Дастур доирасида сурункали касалликларга чалинган беморларга оилавий шифокор томонидан берилган электрон рецепт асосида дори воситалари бепул тақдим этилмоқда. Дори харажатлари Давлат тиббий суғуртаси жамғармаси томонидан қопланади.

Ҳозирги кунда 12 та касаллик гуруҳи, жумладан артериал гипертония, юрак ишемик касаллиги, қандли диабетнинг 2-тури, бронхиал астма ва бошқа касалликлар қамраб олинган бўлиб, 28 турдаги дори воситалари амбулатор шароитда бепул берилади.

Барча тиббий хизматлар электрон йўлланмалар орқали амалга оширилиб, mis2.ssv.uz ахборот тизими орқали шакллантирилмоқда.

Матбуот анжуманида  иштирокчилар соҳа мутахассислари томонидан мазкур жараёнлар ҳақида ўзларини қизиқтирган саволларга жавоблар олдилар.

Шунингдек, семинар доирасида тиббиёт соҳаси ходимлари ҳам тизим ҳақида атрофлича тушунчаларга эга бўлдилар.