Фарғона вилояти ҳокимлиги

Вилоят ҳокимлиги, Ветеринария ва чорвачиликни ривожлантириш қўмитаси, “Чорвачилик соҳасини барқарор ривожлантиришни молиялаштириш” лойиҳаси Фарғона вилояти офиси ҳамкорлигида ўтган тадбир аввалида Марғилон шаҳар Ветеринария ва чорвачиликни ривожлантириш бўлимида лойиҳа тақдимоти амалга оширилди.

Тақдимотда давлатимиз раҳбарининг тегишли қарорига асосан Фарғона вилоятида бажарилган ишлар, лойиҳа имкониятлари ҳақида маълумот берилди. 

Умумий қиймати 147.1 миллион евро бўлган ушбу стратегик лойиҳа 2022-2026-йилларга мўлжалланган бўлиб, унинг бош мақсади чорвачиликни илғор технологиялар асосида модернизация қилиш, маҳсулдорликни кескин ошириш ва иқлим ўзгаришига мослашган “яшил” иқтисодиётни ривожлантиришдан иборат. 

Лойиҳа доирасида чорвачилик йўналишидаги тадбиркорларга миллий валюта эквивалентида 100 минг еврогача молиявий ресурслар, 10 йилгача бўлган узоқ муддатга ва 3 йиллик имтиёзли давр билан тақдим этилмоқда.

Хусусан, вилоятда паррандачилик, балиқчилик, қорамолчилик, қуёш панеллари ўрнатиш, чорвачилик техника ва ускуналари сотиб олиш, гўштни сақлашга мўлжалланган музлаткич ташкил қилиш, сутни қайта ишлаш, чорвачилик экин майдонларига томчилаб суғориш тизимларини ўрнатиш бўйича имтиёзли кредитлар ажратилгани маълум қилинди. Грант маблағлари ҳақида тўхталиб ўтилди.

Шунингдек, тадбир давомида Фарғона шаҳридаги балиқчилик, Фарғона туманидаги  чорвачилик, қуёш панелларини ўрнатиш лойиҳалари бориб кўрилди.

Лойиҳа доирасидаги ишлар юзасидан иштирокчиларни қизиқтирган саволларга жавоблар берилди.