Бугун Ўзбекистон мусулмонлари идораси Фарғона вилояти вакиллигида Рамазон ойини муносиб кутиб олиш ва юқори савияда ўтказиш масалаларига бағишланган йиғилиш бўлиб ўтди
2026-02-23 16:15:00 / Янгиликлар
“Муборак Рамазон ойини муносиб тарзда ўтказиш тўғрисида”ги Президент қарори мазмун-моҳияти ҳақида тўхталиб ўтилди.
Қарор орқали мамлакатимизда Рамазон ойини миллий анъана ва қадриятларга мос тарзда ўтказиш чора-тадбирлари белгилаб берилгани қайд этилди.
“Рамазон – меҳр-мурувват, аҳиллик ва шукроналик ойи” деган эзгу ғоя асосида кам таъминланган, эҳтиёжманд, ижтимоий ҳимояга муҳтож инсонларни ҳар томонлама қўллаб-қувватлаш, маҳаллаларни ўзаро ҳурмат, ҳамжиҳатлик, адолат ва тарбия масканига айлантириш, Рамазон ойи билан боғлиқ тадбирларни исрофгарчиликка йўл қўймасдан, ихчам, мазмунли ва тежамкорлик асосида ўтказиш масалалари кун тартибидан ўрин олди.
Шунингдек, Рамазон ойида эҳтиёжманд аҳолининг ижтимоий ҳимоясини янада кучайтириш борасидаги амалий ишлар муҳокама этилди. Ажратиладиган маблағлар ҳисобидан эҳтиёжманд оилаларга бир марталик моддий ёрдам кўрсатиш, ногиронлиги бор шахсларнинг даволаниш ва жарроҳлик амалиётлари харажатларини қоплаб бериш кўзда тутилган.
Қарор доирасида ажратилган маблағларни мақсадли йўналтирилиши, контингентни шакллантиришда шаффофлик, ҳалоллик ва адолат мезонларига амал қилиниши, реестрга киритилган тоифалар бўйича ишларни тўғри ташкил этилиши билан боғлиқ жараёнларга эътибор қаратилди.
Якунда олдинда турган вазифалар келишиб олинди.