Фарғона вилояти ҳокимлиги

Тадбирда вилоят ҳокими Хайрулло Бозоров университет жамоасини капитал таъмирланиб, замонавий ва қулай шароитларга эга бўлган талабалар турар жойи очилиши билан табриклади.

Вилоят ҳокими мамлакатимизда олий таълим тизимини янги босқичга олиб чиқиш йўлида амалга оширилаётган ишларга юқори баҳо бериб, бугун олий таълимнинг нуфузи ва мақомини янада ошириш вақти келганини, айниқса, таълим сифатига муҳим эътибор қаратиш зарурлигини таъкидлади. Шунингдек, ҳар қандай тараққиёт ва юксалишга аввало илм-маърифат орқали эришиш мумкинлигини қайд этди.

Фарғона давлат университети мамлакатимиздаги етакчи, салоҳиятли олий таълим муассасаларидан бири экани, бой тарихи ва мустаҳкам илмий анъаналари мавжудлиги, университет жамоаси илм-фан ривожи, юқори малакали мутахассислар тайёрлаш ҳамда таълим сифатини ошириш борасида салмоқли натижаларга эришаётганлиги алоҳида эътироф этилди.

Вилоят раҳбари буюк аждодларга муносиб авлод сифатида ёшларни Янги Ўзбекистон бунёдкорлари бўлишда фаолликка чорлади, Учинчи Ренессанс ғоясини ҳам айни эзгу ниятларга ҳамоҳанг эканлигини қайд этди.

Тадбирда университет ректори Баҳодиржон Шермуҳаммадов, олий ўқув юрти устоз ва талабалари сўз олиб, олий таълим тизимидаги ўзгаришлар ва имкониятлар учун давлатимиз раҳбарига миннатдорлик билдирдилар.

Шундан сўнг қарийб 5 миллиард сўм маблағ йўналтирилиб, тўлиқ таъмирлаш ишлари олиб борилган 360 ўринли 7-сонли талабалар турар жойи ўз эгаларига топширилди.

Рамзий лента қирқилиб, иштирокчилар бинодаги шароитлар билан яқиндан танишдилар.

Тадбирдан сўнг ўқув юртида илғор технологиялар асосида олиб борилаётган ишлар ҳақида ҳам вилоят ҳокимига маълумот берилди, замонавий иссиқхона фаолияти билан танишилди.