Вилоят ҳокими Хайрулло Бозоров бугун Фурқат туманида бўлиб, маҳаллалар ҳаёти, камбағалликни қисқартириш ва аҳоли бандлигини таъминлаш ҳамда инвестиция лойиҳалари билан танишди
2026-02-06 15:15:00 / Янгиликлар
Ҳудудда тадбиркорлар томонидан тадбиркорликни ривожлантириш, янги ишлаб чиқариш корхоналари ҳамда савдо ва маиший хизмат объектларини барпо этиш, маҳаллага замонавий қиёфа олиб киришга қаратилган режалар ҳақида маълумот берилди.
Вилоят раҳбари маҳаллада кўп қаватли турар жойлар, савдо ва хизмат кўрсатиш марказларини барпо этиш, драйвер лойиҳаларни амалга ошириш, инфратузилмани яхшилаш орқали аҳоли учун қулай шароитлар яратиш муҳимлигини таъкидлади.
Шундан сўнг вилоят ҳокими “Эшон” МФЙ ҳудудида “Мебелчилар” кичик саноат зонаси фаолиятини ҳам кўздан кечирди.
Майдони 2 гектарни ташкил этувчи ҳудудда 20 тадан зиёд лойиҳани амалга ошириш кўзда тутилган бўлиб, уларнинг умумий қиймати қарийб 32 миллиард сўмга тенг экани маълум қилинди.
Лойиҳалар доирасида 125 та янги иш ўрни яратиш, шунингдек, 11 миллиард сўмлик саноат маҳсулотлари ишлаб чиқариш режалаштирилган.
Вилоят раҳбарига ҳозирда бу ерда ишлаб чиқарилаётган маҳсулотлар экспортга йўналтирилаётгани айтилди.
Хайрулло Бозоров хориж бозорлари ва тажрибасини, хусусан, Хитой ва Туркия эришаётган натижаларни ўрганиш орқали ташқи бозор имкониятларини кенгайтириш бўйича зарур топшириқлар берди.