Ўзбекистон тумани Яйпан шаҳрида ташкил этилган “IT-shaharcha” иш бошлади
2026-02-05 19:30:00 / Янгиликлар
Очилиш маросимида туман ҳокими Равшанбек Бегматов, давлат ва жамоат ташкилотлари, ёшлар ҳамда кенг жамоатчилик вакиллари иштирок этди.
Тадбирда ушбу лойиҳа мамлакатимизда рақамли технологияларни ривожлантириш, бу соҳада ёшларни ва лойиҳаларни қўллаб-қувватлаш борасидаги ислоҳотлар изчиллигининг ёрқин намунаси бўлганлиги тўғрисида сўз юритилди. Мазкур маскан ёшларнинг чинакам тараққиёт драйверига айланишига умид билдирилди.
Рамзий лента қирқилиб, иштирокчилар “IT-shaharcha”да яратилган шароитлар билан танишдилар. Соҳа мутахассислари марказ ва унинг фаолияти тўғрисида тақдимот қилдилар.
“IT-shaharcha” бир вақтнинг ўзида 50 нафар ўғил-қизни қамраб олиш имкониятига эга ҳамда замонавий компютер техникалари билан жиҳозланган.
Қайд этилишича, бу ерда ёшлар бепул коворкинг: юқори тезликдаги интернет ва қулай иш майдонидан фойдаланиб, дастурлаш, 3D моделлаштириш, робототехника, рақамли маркетинг, мобилография ва видеомонтаж курсларида билим олишлари мумкин. Ўқув дастурлари тажрибали устозлар томонидан халқаро стандартлар асосида ўтилади. Курсларни муваффақиятли битирган ёшлар махсус сертификатлар ва ҳамкор IТ-компаниялардан иш таклифларига эга бўлишади.
Маълум қилинишича, мазкур марказда онлайн ва оффлайн дасрлар орқали ҳар йили 6 минг нафарга яқин ўғил-қиз IТ соҳасида замонавий билим ва амалий кўникмаларга эга бўлиши режалаштирилган.