Вилоят ҳокими Хайрулло Бозоров Польша Республикасининг “NEMO” компанияси раҳбари Хенрик Видра бошчилигидаги делегацияни қабул қилди
2026-01-23 14:25:00 / Янгиликлар
Польшалик инвестор Ўзбекистон сўнгги йилларда жадал суръатларда ривожланаётганини, буни халқаро ҳамжамият ҳам эътироф этаётганини таъкидлади. Айниқса, мамлакатда яратилган қулай ишбилармонлик ва инвестицион муҳит хорижий сармоядорлар учун кенг имкониятлар яратаётганини қайд этди.
Вилоят раҳбари Хайрулло Бозоров ҳам Ўзбекистон ва Польша ўртасида барча соҳаларда ҳамкорлик изчил ривожланиб бораётганини таъкидлаб, ушбу давлат тадбиркорлари билан ўзаро манфаатли лойиҳаларни амалга оширишдан мамнун эканлигини билдирди.
Хорижий меҳмонлар тақдим этилаётган лойиҳалар бўйича батафсил маълумот бердилар. Вилоят раҳбари мазкур таклифларни янада такомиллаштириш ва аниқ режа асосида амалий ишларни бошлашга тайёр эканлигини билдирди.
Шунингдек, польшалик инвестор Хенрик Видра куни кеча Фарғона вилоятида ўз компаниясини давлат рўйхатидан ўтказганини маълум қилиб, Ўзбекистон томони билан ҳамкорликда ишлашдан мамнун эканлигини таъкидлади.
Самимий мулоқот якунида келгусидаги ҳамкорлик чора-тадбирлари келишиб олинди.