Фарғона шаҳрида ногиронлиги бўлган шахслар томонидан ишлаб чиқарилган маҳсулотлар кўргазма-савдо ярмаркаси бўлиб ўтди
2025-11-26 12:20:00 / Янгиликлар
Тадбирда вилоят ҳокимининг ўринбосарлари Бурҳон Қўлдошев ва Шерзод Полвонов иштирок этиб, юртимизда ногиронлиги бўлган шахслар бандлигини таъминлаш, уларни ҳар томонлама қўллаб-қувватлаш йўналишида амалга оширилаётган ишлар ҳамда Президентимиз томонидан кўрсатилаётган эътибор ва ғамхўрликлар ҳақида тўхталиб ўтдилар.
"Фуқаролик жамияти ҳафталиги" доирасида вилоят ҳокимлиги, Президент ҳузуридаги Ижтимоий ҳимоя миллий агентлиги вилоят бошқармаси ва қатор ҳамкор ташкилотлар томонидан ташкил этилган ярмаркада ҳунармандчилик буюмлари, миллий либослар, безак ва маиший маҳсулотлар намойиш этилди. Унда вилоятимиз шаҳар ва туманларидан келган 57 нафар уста-ҳунармандлар ўзларининг 1 минг 200 дан ортиқ турдаги маҳсулотлари билан қатнашдилар.
Шунингдек, аукцион савдоларида ҳунармандларнинг 16 та энг сара ва нодир асарлари кимошди савдосига қўйилиб, бундай форматдаги аукцион Республикада илк бор айнан Фарғонада ташкил этилгани таъкидланди.
Энг муҳими, ушбу ярмарка ногиронлиги бўлган шахсларнинг ижтимоий фаоллигини ошириш ва уларни қўллаб-қувватлашда муҳим аҳамият касб этди. Тадбир уларнинг меҳнат маҳсулини кенг жамоатчиликка танитиш учун катта имконият яратди.