Вилоят ҳокими Хайрулло Бозоров Туркия Республикасидаги амалий ташрифи давомида Туркиянинг марказий ҳудудида жойлашган, тарихий, сиёсий, иқтисодий ва маданий марказ сифатида аҳамиятга эга бўлган Коня вилоятига ташриф буюрди.
2025-11-08 15:32:00 / Янгиликлар
Ташриф давомида Конядаги 10 дан зиёд йирик тадбиркорлар иштирокида учрашув ўтказилди.
Унда туркиялик тадбиркорларга Фарғона вилоятининг саноати, иқтисодий, инвестициявий салоҳияти ҳақида маълумот берилди.
Сўнгги йилларда мамлакатимизда амалга оширилган улкан ўзгариш, янгиликлар ҳақида таништирилди.
Давлат раҳбарларининг оқилона, дўстона алоқалари натижасида Туркия давлати билан ҳамкорлик энг юқори даражага кўтарилгани қайд этилди.
Вилоятимиздаги саноат зоналари, инвесторларга яратилган шароитлар, имтиёзлар бўйича маълумот берилди.
Вилоятда энг кўп инвестиция киритган давлатларга қулайлик яратиш мақсадида марказ ташкил қилингани айтилди.
У ерда инвесторларнинг келиб, фаолиятларини йўлга қўйгунларига қадар барча зарурий кўмак кўрсатилади.
Фарғонада турк ишбилармонлари сармоялари иштирокидаги 100 дан зиёд корхоналар фаолияти йўлга қўйилгани қайд этилди, бу каби корхоналар салмоғи йилдан йилга ортиб бораётганлиги айтилди.
Қува туманида турк ҳамкорлар иштирокида "Турк махсус саноат зонаси" қурилишига киришилаётганлиги таъкидланди.
Коняга ташриф ҳам манфаатли бўлиши қайд этилиб, турк тадбиркорлари Фарғонага таклиф қилинди.
Туркиялик тадбиркорлар ҳам сўз олиб фаолиятлари ҳақида маълумотлар беришди.
Ўзбекистонда сўнгги йилларда жадал суръатларда ривожланиб бораётганлиги, бу жараёнда янги лойиҳалар бўйича инвестиция киритишга ўз ҳиссаларини қўшишаётганлиги, Ўзбекистонда амалга оширилган ва режалаштирилаётган инвестицион лойиҳалари ҳақида ҳам айтиб ўтишди.
Жумладан, Фарғона вилоятида ҳам қатор лойиҳаларда иштироклари ҳақида маълум қилишиб, яна янги лойиҳалар бўйича ҳамкорликни жадаллаштириш бўйича фикрларини билдиришди.
Ўзларини қизиқтирган саволларга жавоблар олишди.
Конядаги саноат зоналарини ўрганган ҳолда ушбу тажрибаларни Фарғонада ҳам татбиқ этиш, яқин кунларда турк ишбилармонларидан иборат делегациянинг Фарғона вилоятига ташрифини ташкиллаштиришга келишилди.