Жорий йил пахта мавсумига тайёргарлик кўриш борасида иш берувчилар ва фуқароларга пахта далаларида Меҳнат шароитларини яратиш ва мажбурий меҳнатни олдини олиш юзасидан ахборот компанияси ташкил этилди.

            Юртимизнинг барча ҳудудларидаги аҳоли гавжум жойларда мавзуга доир пешлавҳалар ўрнатилди ҳамда кенг тарғибот ишлари амалга оширилди.

            Фермер хўжаликлари ва пахта тўқимачилик кластерларининг вакиллари учун республиканинг барча ҳудудларида мажбурий меҳнатни олдини олиш, мавсумий ишга жалб қилинадиган ишчиларни ёллашда меҳнат қонунчилигига амал қилиш мавзусида ўқув семинарлари ўтказилди.

            Давлат меҳнат инспекцияси томонидан 27 мингдан ортиқ тренинглар ва давра суҳбатлари ташкил этилди. Мазкур тадбирларда
700 мингга яқин фуқаролар иштирок этди.

            Пахта йиғим-терим мавсумида келиб тушадиган мурожаатларнинг тезкорлик билан кўриб чиқиш ҳамда мажбурий меҳнатни бартараф этиш мақсадида вазирликнинг “1282” рақамли Ишонч телефони ҳамда “Munosibmehnat.uz” телеграм бот мессенджери фуқароларнинг меҳнат масалаларига оид мурожаатлари қабул қилинмоқда.

            Бугунги кунга қадар вазирликнинг ишонч телефони ҳамда ижтимоий тармоқлар орқали мажбурий меҳнат ва меҳнат ҳуқуқлари бузилишига оид жами 283 та (300 га яқин) мурожаатлар келиб тушди.

            Шундан, 26 таси мажбурий меҳнатга жалб қилинганлик, 27 таси муносиб меҳнат шароитлари яратилмаганлиги, 219 таси терим пуллари ўз вақтида берилмаётганлиги ва 1 кг қўлда териладиган пахтанинг нархи тўғрисидаги мурожаатлардир.

            Ҳудудларда ташкил этилган ишчи гурухлар томонидан келиб тушган мурожаатлар юзасидан давлат меҳнат инспекцияси ходимларидан ташкил этилган ишчи гуруҳлар томонидан ўрганишлар ўтказилди.

Шунингдек, мавсум давомида 350 нафардан ортиқ меҳнат инспекторларининг барчаси мажбурий меҳнатга йўл қўймаслик ҳамда меҳнат шароитларини яратилиши юзасидан 22 мингта ташкилот, фермер хўжаликлари ва далаларда мониторинглар ўтказишди.

            Ўрганишлар давомида, 37 та мурожаатлар қаноатлантирилди,
200 га яқин мурожаатлар бўйича теримчилар ва иш берувчиларга тушунтиришлар берилди, 35 та мурожаатдаги важлар ўз тасдиғини топмади.

            Давлат меҳнат инспекцияси ходимлари томонидан ўрганиш натижаларидан келиб чиқиб, 13 та фермер ҳўжаликлари раҳбарларига ёзма кўрсатма, 5 нафар мансабдор шахсга нисбатан маъмурий баённомалар расмийлаштирилди.

Пахта мавсумида муносиб меҳнат шароитлари яратилиши
ва мажбурий меҳнатнинг олидини олиш борасидаги тарғибот ишлари давом этмоқда.

Қадрли юртдошлар!

Агарда пахта терим мавсумида меҳнат ҳуқуқларингиз бузилса ёки шу каби ҳолатларга гувоҳ бўлсангиз, вазирликнинг “1282” қисқа рақамли Ишонч телефони ҳамда “Munosibmehnat.uz” телеграм ботига мурожаат қилишингизни сўраймиз.

Шахсингиз сир сақланиши кафолатланади.