Буюк Британиянинг “Telpasc” (Ethero) ташкилоти бўйича расмий баёнот
2024-04-28 08:55:00 / Вазирлик янгиликлари
Маълумки, жорий йилнинг 1 март санасида Буюк Британиянинг Telpasc” (Ethero) ташкилоти томонидан юртдошларимизни вақтинча ишга юбориш бўйича бўлиб ўтган танловларда 2,5 мингдан ортиқ фуқаро қатнашган ва уларнинг орасидан 1 822 нафари иш берувчининг талаблари асосида танлаб олинган.
Шундан 1 687 нафар юртдошимиз танловлар ўтказиш, иш берувчилар билан музокаралар олиб бориш, тарқатма материаллар тайёрлаш, мослаштирув курсларини ташкил қилиш каби хизматлар учун шартномага асосан Ташқи меҳнат миграцияси агентлиги ҳисобрақамига 1 700 000 сўмдан тўлаган.
Уларнинг 229 нафарига виза расмийлаштирилган ҳамда 46 нафари март-апрел ойларида Буюк Британияга жўнаб кетган. 183 нафари эса май-июн ойларида бориши керак эди.
Бироқ, апрел ойига келиб, суҳбат жараёнидан муваффақиятли ўтган фуқароларнинг шахсий “gmail” электрон манзилига уларни ишга қабул қилиш рад этилгани тўғрисида хабарлар келган. Бу эса “Telpasc” орқали ишга кетиш учун рўйхатдан ўтган ҳамюртларимизнинг ҳақли эътирозларини келтириб чиқарди.
Ушбу ҳолат Камбағалликни қисқартириш ва бандлик вазирлиги ҳамда вазирлик ҳузуридаги Ташқи меҳнат миграцияси агентлиги томонидан назоратга олинди, Telpasc” компанияси билан боғланиб, вазият бўйича изоҳ сўралди.
Улардан келган жавоб хатида Британия фермер хўжаликларида кузатилган кучли жала оқибатида қишлоқ хўжалиги экинларини сув босгани, натижада Ўзбекистондан танлаб олинган фуқароларнинг асосий қисмини жорий йилги мавсумда ишга жойлаштириш имконияти пасайгани маълум қилинган.
Биз нима бўлганда ҳам тўлаган пулингизни олинг ва алоқани узинг, дейишдан йироқмиз. Масаланинг ечими бўйича Сизларга маъқул бўлган қатор варианларни таклиф қиламиз.
Биринчидан, ишчи виза ёки компания томонидан меҳнат шартномасининг лойиҳаси юборилмаган бўлса, Агентликнинг ҳудудий филиаллари ходимлари Сизлар билан телефон орқали боғланиб, хоҳишингизга кўра, тўлаган пулингизни ҳеч қандай ортиқча оворагарчиликсиз, исталган вақтда пластик картангизга ўтказиб берилишини таъминлайди.
Иккинчидан, агар Сиз шартномада кўрсатилган пул маблағларини қайтариб олмасдан кутаман ва имконият бўлиши билан ундан фойдаланаман, десангиз, биз бунга ҳам тайёрмиз.
Вазирлик масъуллари фақатгина “Telpasc” рекрутинг компанияси билан чекланиб қолмасдан, зудлик билан ишчи гуруҳ шакллантириб мутахассисларни Британияга хизмат сафарига юборади. У ерда бошқа иш берувчилар билан ҳам музокаралар ўтказиб, имконият бўлиши билан биринчи галда рўйхатдан ўтган, тўловларни амалга оширган юртдошларимизни Англияга вақтинча ишлаш учун жўнатиш чораларини кўради. Табиийки, бу жараён бироз вақт олади.