Kosmoslıq tarawda ámelge asırılǵan jumıslar hám perspektivadaǵı wazıypalar dodalandı

Mámleketimizde ekonomika tarmaqlarında aerokosmoslıq maǵlıwmatlardan paydalanıw keńeyip barmaqta. Atap aytqanda, Prezidenttiń 30-sentyabrdegi pármanı menen bul baǵdardaǵı jumıslar jańa basqıshqa alıp shıǵıldı, Sanlı texnologiyalar ministrligi janındaǵı Kosmoslıq izertlewler hám texnologiyalar agentligi geologiya, jer qatnasıqları hám ekologiya tarawında jılına keminde úsh márte mámleketlik kosmoslıq monitoring ótkeriwi belgilendi, agentliktiń aymaqlıq wákilleri lawazımı engizildi.

Prezentaciyada atap ótilgenindey, endi kosmoslıq tallawlar járdeminde ekonomikaǵa úlken túrtki beretuǵın jańa imkaniyatlardı anıqlaw zárúr.

Respublikada hár jılı júzlegen paydalı qazılma kánleri hám karerler aukcionǵa shıǵarılmaqta. Isbilermenlerge imkaniyat jaratılıp, kánlerge sanaat alıp kelinbekte. Mısal ushın, ótken jılı 170, jıl basınan bolsa 172 kán aukcionda satılǵan.

Biraq kánlerden ruqsatsız paydalanıw mashqalası elege shekem áhmiyetli ekeni, jıldıń basınan kosmoslıq monitoring járdeminde 2 mıńnan aslam usınday jaǵday anıqlanǵanı atap ótildi.

Bas prokuratura aldına ekonomikalıq jınayatlardıń aldın alıw hám olardı óz waqtında ashıwda jer, óndiris obektleri hám kánlerdi jasalma joldas arqalı tallaw maǵlıwmatlarınan nátiyjeli paydalanıw wazıypası qoyıldı.

Keyingi jılları ózbasımshalıq penen qurılǵan 1 million 365 mıń turaq jayǵa kadastr rásmiylestirip berilgen. Biraq elege shekem bunday nızamsız qurılıslarǵa tolıq shek qoyılǵanı joq. Jıl basınan berli 33 mıńnan aslam ózbasımshalıq penen islengen qurılıs anıqlanǵan bolsa, olardıń kópshiligi awıl xojalıǵı jerlerinde jaylasqan.

Usı múnásibet penen qısqa múddette tiyisli málimleme platformaların integraciyalap, nızamsız qurılıs jaǵdayların jedel úyreniw hám saplastırıw imkaniyatın beretuǵın sistema jaratıw tapsırıldı.

Prezentaciyada kosmoslıq monitoring tiykarında orınlarda bos turǵan jerlerdi anıqlaw hám ekonomikalıq aktivke aylandırıwǵa ayrıqsha itibar qaratıldı.

Mámleketimizdiń altı aymaǵında alıp barılǵan úyreniwler nátiyjesinde 300 gektarǵa shamalas jerler anıqlandı. Bir ǵana Tashkent qalasında 95 gektar bos jer uchastkası tabılıp, aukcionǵa shıǵarılǵan.

Prezidentimiz bıyıl jáne 8 aymaqta, kelesi jılı barlıq rayon oraylarında úyreniwlerdi juwmaqlaw wazıypasın qoydı.
Tarawda xalıqaralıq tájiriybe hám aldınǵı sheshimlerdi jedel engiziw zárúr ekenligi atap ótildi. Juwapkerler bul baǵdarda islep shıǵılǵan joybarlar boyınsha málimleme berdi.

Sonıń ishinde, kosmoslıq maǵlıwmatlardı jasalma intellekt járdeminde tallap, tereklerdiń kesiliwi, metan gaz sızıp shıǵıwı, quyash panelleriniń nátiyjeliligi, jol qaplamasınıń jaǵdayı, temir jol hám elektr tarmaqlarındaǵı nasazlıqlar hám artıqsha júklemelerdi anıqlaw jumısların shólkemlestiriw rejelestirilgen.

Sonday-aq, prezentaciyada kosmoslıq tarawında bilimlendiriw ekosistemasın jaratıw, kosmoslıq izertlewler hám texnologiyalardı rawajlandırıw, joldas baylanıs texnologiyaların engiziw arqalı mámleketimizdiń alıs aymaqlarında baylanıs qamtıp alıwın arttırıw boyınsha usınıslar kórip shıǵıldı. 2028-jılı Samarqandta ótkeriletuǵın Xalıqaralıq astronavtika kongresine puqta tayarlıq kóriw boyınsha tapsırma berildi.