Tashkent wálayatındaǵı úlken imkaniyatlar kórsetip ótildi

Sulıw tábiyatlı hám potencialı joqarı bul wálayattıń ekonomikası búgin izbe-iz rawajlanıp barmaqta. Keyingi 8 jılda 10 milliard dollar aymaqlıq, 8 milliard dollarlıq tarmaqlıq investiciyalar kirgizilgen, 10 mıńǵa shamalas sanaat, sawda hám servis kárxanaları iske qosılǵan.

Sońǵı 3 jılda jıllıq aylanısı 10 milliard sumnan aslam bolǵan kárxanalardıń sanı 1,8 esege artıp, 1,7 mıńǵa jetken. Jáne aylanısı 100 milliard sumnan joqarı kárxanalar bolsa 137 den 193 ge kóbeygen. Nátiyjede aldınǵı jıllarda jıllıq ortasha eksport 1 milliard dollarǵa da jetpegen bolsa, usı jıldıń 8 ayında bul kórsetkishten artqan.

Wálayatta qıtaylı investorlar tárepinen 2,1 milliard dollarlıq iri sanaat parkleri shólkemlestirilmekte. Sonday-aq, wálayattı 2025-2027-jıllarda jedel rawajlandırıw boyınsha Prezident qararları qabıl etilip, olardıń orınlanıwı ushın 40 trillion sumnan aslam qarjılar qaratılǵan. Bulardıń barlıǵı aymaqlarda jumıssızlıqtı azaytıp, kámbaǵallıq dárejesin qısqartıw imkaniyatın bermekte. Jıldıń aqırına shekem wálayatta jumıssızlıq hám kámbaǵallıq dárejesin 4,5 procentke túsiriwdiń anıq esap-sanaǵı islengen.

Bunday nátiyjelerdi arttırıw maqsetinde mámleketimiz basshısınıń baslamasına muwapıq, Tashkent wálayatında da “Reformalar shtabı” dúzildi. Májiliste shtab tárepinen tayarlanǵan reje hám joybarlar tanıstırıldı.

Prezidentimiz tárepinen bul joybarlardı tolıq ámelge asırıwǵa járdemlesiw, ayırım máselelerdi jedel sheshiw boyınsha juwapker ministrlikler hám uyımlarǵa tiyisli tapsırmalar berildi.

Sonıń ishinde, Nurafshan, Almalıq hám Shırshıq qalalarında sırt el investiciyasınıń qatnasıwında sanaat kárxanaların shólkemlestiriw ushın 2 podstanciya qurıw názerde tutılmaqta.
Bekabad qalasında importtıń ornın basatuǵın avtomobil awısıq bóleklerin islep shıǵarıw, Aqqorǵan rayonında azıq-awqat hám toqımashılıq kárxanaların ashıw, Ahangaran, Angren hám Orta Shırshıq aymaǵınan aǵıp ótetuǵın Qarasuw kanalınıń boyında turizm hám sawda orınların shólkemlestiriw imkaniyatı bar.

Ulıwma, wálayatta 2 milliard 500 million dollarlıq investiciyalıq joybarlar islep shıǵılǵan. Olardıń nátiyjesinde 11 mıńnan aslam xalıqtıń bántligi támiyinlenedi, 434 million dollarlıq eksport quwatlılıǵı jaratıladı.
Prezidentimiz joybarlar menen hár tárepleme tanısıp, qosımsha imkaniyatlardı kórsetip ótti.
– Tashkent wálayatı sanaatta da, awıl xojalıǵında da eń úlken potencialǵa iye aymaq. Eń tiykarǵısı, wálayat elimizdegi eń iri tutınıw hám xızmetler bazarın, yaǵnıy paytaxtımızdı hár tárepten qorshap turadı. Bul da júdá úlken imkaniyat. Onı tolıq iske qosıp, investiciya, eksport hám jumıs ornı kórsetkishlerin esesine arttırıw múmkin, – dedi Shavkat Mirziyoev.

Májiliske Tashkent qalası hám rayonlarınıń hákimleri de qatnastı. Tashkent wálayatındaǵı bos jerler “Tashkent invest” kompaniyası hám qalanıń sanaat zonaları direkciyasına ajıratılıp, ekologiyaǵa zıyan keltirip atırǵan kárxanalar kóshiriletuǵını aytıldı.

Tashkent wálayatınıń barlıq aymaqların paytaxt penen tez júretuǵın elektr poezdlar arqalı baylanıstırıw wazıypası belgilendi. Bul arqalı ol jerlerde de jańa turaq jaylar, infrastruktura hám xızmetlerge talap artadı, adamlar paytaxtqa qatnap jumıs islewi múmkin boladı.

Wálayattaǵı 263 máhálle birde-bir ónim jetistiriw, sanaat yamasa xızmet kórsetiwge qánigelespegen. Sonlıqtan, olarda baǵshılıq, limon, júzim, malina, brokkoli hám nál jetistiriwdi rawajlandırıw mólsherlenbekte. Bul máhállelerge “Agrostar” kompaniyasın baylanıstırıp, tuqım, nál hám kepillikli satıp alıw ushın adamlarǵa járdemlesiw boyınsha kórsetpe berildi.

Tashkent wálayatı jer hám suwǵa júdá bay. Bunnan nátiyjeli paydalanıp, awıl xojalıǵı ónimlerin kóbeytiw menen birge olardı qayta islep, eksportın arttırıw wazıypası qoyıldı.

Ulıwma, barlıq imkaniyatlardı júzege shıǵarıp, máhállelerdi jumıssızlıq hám kámbaǵallıqtan jıraq aymaqqa aylandırıw zárúr ekenligi atap ótildi.