Tashkentte máhállelerdi hám sociallıq infrastrukturanı rawajlandırıw joybarları tanıstırıldı

Yashnabad rayonındaǵı Vatandosh, Mohinur, Al-Buxoriy hám Tong máhállelerin kompleksli jańalaw joybarı tanıstırıldı. Olardıń ulıwma maydanı 75 gektar bolıp, bul jerde 18 mıń 386 adam jasaydı.

Joybar “15 minutlıq máhálle” principine tiykarlanǵan. Oǵan bola, xalıq ushın zárúr sawda hám turmıslıq xızmetler, bilimlendiriw hám medicina mákemeleri, dem alıw jáne sport orınları adamlarǵa qolaylı aralıqta jaylastırıladı.

Aymaqta jasıl maydanlardı keńeytiw, úsh kilometrlik seyil etiw jolın shólkemlestiriw, balalar hám sport maydanshaların jańalaw, kóp tarmaqlı sport obektin qurıw rejelestirilgen. Mekteplerdi keńeytiw esabınan 2 mıń qosımsha oqıwshı ornın jaratıw, 540 orınǵa mólsherlengen tórt baqsha hám úsh poliklinika shólkemlestiriw de názerde tutılmaqta.

Máhállelerde avtomobillerdi háwlilerden tısqarıǵa qoyıw, jámiyetlik transport bándirgilerin jańalaw, qáwipsiz piyada hám velosiped jolların qurıw usınıs etildi. Sonday-aq, 76 turaq jaydıń sırtqı kórinisin hám injenerlik tarmaqların jańalaw, kóshelerdi jaqtılandırıw, shıǵındı jıynaw shaqapshaların kóbeytiw názerde tutılǵan. Sawda hám xızmet kórsetiw obektleri, kafe hám xalıq sóylesip, dem alatuǵın orınlar shólkemlestiriledi.

“15 minutlıq máhálle” principi tiykarında paytaxtta 2027-jılı 100, 2030-jılǵa shekem bolsa 400 máhálle kompleksli jańalanadı. Bul processte usı máhállelerdegi barlıq infrastruktura, sonıń ishinde, ıssılıq, ishimlik suwı, kanalizaciya, elektr energiyası, gaz hám jaqtılandırıw sistemaları, kóp kvartiralı turaq jaylardıń fasadları, jol hám jollar, balalar hám sport maydanshaları tolıq jańalanadı.

Máhállelerde xalıqtıń jan basına tuwra keletuǵın terek hám putalardıń sanı xalıqaralıq standartlarǵa sáykeslendiriledi.
2030-jılǵa shekem 400 máhállede 130 mıń jańa jumıs ornı jaratıladı, atap aytqanda, 2027-jılı 100 máhállede 22 mıń. Bul ushın bankler tárepinen “konveyer” joybarların islep shıǵıw hám iske qosıw sisteması jolǵa qoyıladı.

Paytaxtta xalıq sanınıń ósiwi menen oqıwshı orınlarınıń jetispewshiligi artıp barmaqta. 2025-2026-oqıw jılında ol 141 mıńdı quraǵan bolsa, keyingi bes jılda oqıwshılar sanı 71 mıńǵa (14 procent) kóbeyiwi esabınan 2030-2031-oqıw jılına barıp, 212 mıńǵa jetiwi múmkin. Sol sebepli, 2030-jılǵa shekem respublikalıq byudjettiń esabınan 48 mıń, jergilikli byudjettiń esabınan 78 mıń jańa oqıwshı ornın jaratıw rejelestirilgen. Nátiyjede, mekteplerdiń júklemesi házirgi 1,4 koefficientten 2030-jılı 1,2 ge shekem tómenleydi.

2026-2027-oqıw jılı ushın ulıwma maydanı 64,6 mıń kvadrat metr bolǵan, jámi 38 mıń orınlıq 24 jańa mekteptiń joybarları tayarlanǵan. Mekteplerdiń ámeldegi úlgi joybarlarına 17 jańa imkaniyat qosılmaqta. Sonıń ishinde, qosımsha oqıw maydanları, kitapxana, sport hám mádeniyat ilajları ushın beyimlesiwsheń zallar, muǵallimler ushın qolaylı xanalar názerde tutılǵan.

Joybarlarda pandus hám liftler, inklyuziv bilimlendiriw xanaları, medicinalıq xanalar, qáwipsizlik hám energiyanı únemlew sheshimleri de názerde tutılǵan. Háreket hám suw datchikleri esabınan elektr energiyasınıń jumsalıwı 20 procentke shekem, suwdıń jumsalıwı 10 procentke shekem únemlenedi. Jańa sheshimler jer maydanın 50 procent únemlew, bir oqıwshıǵa tuwra keletuǵın maydannıń nátiyjeliligin 15 procentke arttırıw, sport maydanshaların úsh esege keńeytiw imkaniyatın beredi. Ulıwma alǵanda, úlgi joybarlardıń nátiyjeliligi 40 procentke arttırıladı.

Jeke menshik bilimlendiriw oraylarınıń mámleketlik mektepler menen birge islesiwi jolǵa qoyıladı. Bul oqıwshılardıń mekteptiń ózinde joqarı oqıw orınlarına tayarlanıwı hám jańa tillerdi úyreniwi ushın sharayat jaratadı.

Qalada 3-7 jastaǵı balalardıń sanı 253 mıńdı quraydı. Olardıń mektepke shekemgi bilimlendiriw menen qamtıp alıwı 79,2 procent, baqshalardaǵı orınlardıń jetispewshiligi bolsa 65 mıń. Sol sebepli, 2030-jılǵa shekem respublikalıq byudjettiń esabınan 8 mıń, jergilikli byudjettiń esabınan 32 mıń qosımsha baqsha ornın jaratıw rejelestirilmekte. Nátiyjede, 2030-jılda qamtıp alıw 92 procentke jetkeriledi. 2026-2027-oqıw jılı ushın bolsa, ulıwma maydanı 32 mıń kvadrat metr bolǵan, jámi 16 mıń orınlıq 28 jańa baqshanıń bes túrdegi joybarları tayarlanǵan.

Baqshalardıń úlgi joybarına balalardıń rawajlanıwı hám salamatlıǵına xızmet etetuǵın 14 jańa sheshim kirgizilmekte. Olarda sensor hám logoped xanaları, psixologiyalıq-pedagogikalıq járdem kórsetiw orınları, medicinalıq blok, hár qıylı shınıǵıwlarǵa beyimlestiriletuǵın zallar boladı. Balalardıń qáwipsizligi ushın videobaqlaw hám jaraqatlanıwdan qorǵawshı qaplamalar, qolaylı ortalıq jaratıw ushın hawa tazalaǵıshlar, sonday-aq, energiya únemlewshi jaqtılandırıw hám quyash panelleri názerde tutılǵan.

Bul arqalı úlgi joybarlardıń nátiyjeliligi 38 procentke arttırıladı.

Prezentaciyada Uchtepa rayonında tikkeley sırt el investiciyaları esabınan “Uchtepa city” zamanagóy isbilermenlik orayın qurıw joybarı da tanıstırıldı. 37 gektar aymaqta eki basqıshta ámelge asırılatuǵın joybardıń birinshi basqıshında 26 gektarda investor tárepinen 1 milliard dollarlıq investiciya kirgiziledi. Ekinshi basqıshta 11 gektarda turaq jay hám xızmet kórsetiw imaratları qurıladı. Orayda kóp qabatlı turaq jaylar, ofisler, sawda-kewilashar kompleks, xalıqaralıq brendke iye miymanxana hám seyil etiw ornı qurıladı.

Sonday-aq, Ózbekstan – Túrkiya doslıq baǵı hám Atatúrk kóshesiniń arxitekturalıq koncepciyası da kórsetildi.

Mámleketimiz basshısı juwapkerlerge usınılǵan joybarlardı xalıqtıń talapları hám qala qurılısı talapları tiykarında jáne de puqta islep shıǵıw boyınsha tapsırmalar berdi.