Jańa Tashkent investor hám xalıq ushın jańa imkaniyatlar esigin ashadı

Sonday-aq, bul jerde iri joybarlardı ámelge asırıp atırǵan investor hám isbilermenler menen ashıq sóylesiw ótkerdi.
Úsh jıl aldın qurılısı baslanǵan Jańa Tashkent mámleketimiz tariyxındaǵı eń iri qala qurılısınıń joybarı bolıp esaplanadı.

Qáwipsiz hám “jasıl” qala sıpatında qurılıp atırǵan aymaqta birinshi basqıshtıń ózinde zamanagóy texnologiyalıq sheshimlerge tiykarlanǵan 50 milliard dollarlıq joybarlardı ámelge asırıw názerde tutılǵan.

Qalada 2 mıń gektarlıq jasıl maydan hám 500 gektarlıq dem alıw baǵları shólkemlestiriledi. “Jasıl qurılıs standartları” tiykarında 150 million kvadrat metrlik turaq jay hám turaq jay emes maydanlar qurıladı.

Ótken dáwirde Jańa Tashkentte 2 milliard dollarlıq jumıslar orınlandı. Turaq jaylar, universitetler, kitapxana hám amfiteatr qurıldı. Máresimde ulıwma bahası 1 milliard dollar bolǵan jeti obekt iske qosıldı.

Bular “Sharq bahori” turaq jay kompleksiniń birinshi basqıshı, jol hám infrastruktura obektleri, “Jańa Tashkent” 1-sanlı podstanciya, trigeneraciya stanciyası, Sawda-sanaat palatasınıń imaratı, “Sohil boǵi” dem alıw baǵı hám 2 mıń orınlıq ulıwma bilim beriw mektebi bolıp esaplanadı.

Túrkiyanıń “MIMSAN” kompaniyasınıń qatnasıwında 73 million dollar investiciya esabınan qurılǵan trigeneraciya stanciyası 100 mıń shańaraqtı oraylasqan túrde ısıtıw hám suwıtıw, sonıń menen birge, elektr energiyasın islep shıǵarıw imkaniyatın beredi.

Qıtaydıń “Haocheng Industry Group Limited” kompaniyası menen qurılǵan podstanciya hám joqarı kernewli elektr tarmaqları joybarınıń bahası 95 million dollardı quraydı.

Sonday-aq, 18 kilometrlik avtomobil jolı qurılıp, 13 kilometr kanalizaciya hám 4,5 kilometrlik ishimlik suw tarmaqları tartıldı. Jaǵalıq boylap 10 kilometrlik “Sohil boǵi”nda piyadalar hám velosiped jolları shólkemlestirildi. “Sharq bahori” turaq jay kompleksiniń birinshi basqıshında derlik 7 mıń kvartira qurıldı.

Máresimde Qıtay, Túrkiya, Birlesken Arab Ámirlikleri hám basqa da sırt elli sheriklerdiń qatnasıwında ulıwma bahası 2,5 milliard dollar bolǵan jáne on iri joybardıń qurılısına start berildi.

Olardan biri joqarı texnologiyalıq ónimler hám yarım ótkizgishler islep shıǵarıwǵa qánigelesken “Deep Tech park” sanaat zonası bolıp esaplanadı. Onı qurıwǵa 320 million dollar qaratıladı. Keleshekte bul jerde ulıwma bahası 1,7 milliard dollarlıq joybarlar jaylastırıladı.

Finlyandiyanıń “MariMatic” kompaniyasınıń qatnasıwında shıǵındılardı jıynaw hám olardan “jasıl” elektr energiyasın alıw joybarı ámelge asırıladı. Sonday-aq, kóp kvartiralı turaq jaylardıń tóbesine ulıwma quwatlılıǵı 20 megavattlıq bolǵan fotoelektr sistemaların ornatıw rejelestirilgen.

Jańa Tashkentti paytaxt penen baylanıstırıw ushın Temur Malik kóshesi hám 4R12 avtomobil jolınıń arasında kópir, jol ótkel hám 10 kilometrlik jol qurıladı. Metro bándirgilerine tutasqan jer astı avtomobil turıw ornın qurıw da jańa joybarlardan biri.

Ulıwma maydanı 818 mıń kvadrat metrden aslam bolǵan “Metropolis” biznes-sitide ofisler, miymanxana, turaq jaylar hám xızmet kórsetiw obektleri jaylasadı. Maydannıń 500 mıń kvadrat metr bólegi biznes ushın mólsherlengen. Bul jerde 1,5 mıń adamnıń bántligin támiyinlew názerde tutılǵan.

Bunnan tısqarı, “Silk City”, “Mavj” hám “Marjon” turaq jay kompleksleri jáne 120 orınlıq Jańa Tashkent oraylıq emlewxanası qurıladı.

Mámleketimiz basshısı bul joybarlar Jańa Tashkenttiń biznes, turizm hám mádeniyat orayı sıpatında qáliplesiwine xızmet etetuǵının atap ótip, qalanı qurıwda qatnasıp atırǵan qurılısshılar, injenerler, joybarlawshılar hám sırt elli birge islesiwshilerge minnetdarshılıq bildirdi.

Soń Prezident Shavkat Mirziyoev Jańa Tashkent qurılısın jedellestiriw máseleleri boyınsha investor hám isbilermenler menen ashıqtan-ashıq sóylesiw ótkerdi.

Jańa Tashkent joybarı sheńberinde mámleket infrastrukturalıq hám áhmiyetli sociallıq obektlerdiń qurılısına úlken qarjı qaratpaqta. Házirgi waqıtqa shekem jańa qalaǵa 2 milliard dollardan aslam investiciya kirgizildi. Biraq, qurılısqa jeke menshik sektordı tartıw pátleri bar imkaniyatlarǵa sáykes emes ekenligi atap ótildi.

Qala ushın jámi 20 mıń gektar jer ajıratılǵan. Birinshi basqıshta 6 mıń gektar maydanda 50 milliard dollarlıq joybarlardı ámelge asırıw názerde tutılǵan. Házir mıń gektardan aslam maydanda tiykarınan mámleket qarjısı esabınan qurılıs alıp barılıp atırǵan bolsa, isbilermenlerge 94 gektar jer ajıratılǵan.
– Jańa Tashkent tek ǵana jańa turaq jaylar qurılatuǵın aymaq emes,-dedi Prezidentimiz.

Jańa qala biznes, bilimlendiriw, medicina, turizm hám xızmet kórsetiwdi ózine tartatuǵın biyǵárez ekonomikalıq orayǵa aylanıwı zárúr. Usı kózqarastan, investorlarǵa ajıratılǵan jerlerdiń úshten eki bólegi turaq jay joybarlarına tuwra kelip atırǵanı, 28 lotta bolsa jedel qurılıs baslanbaǵanı kórsetip ótildi.

Mámleketimiz basshısı bunday jaǵdaydı investorlarda qarjı yamasa qızıǵıwshılıqtıń joq ekenligi menen túsindiriw durıs emes ekenligin ayttı. Eski talaplar, sozılatuǵın ruqsat beriw processleri hám ayırım uyımlardıń birge islesiwdiń ornına qadaǵalawshı sıpatında jumıs islewi joybarlarǵa tosqınlıq etpekte. Sonlıqtan, isbilermenge jer ajıratıwdan baslap, obektti iske qosıwǵa shekemgi processlerdi qayta kórip shıǵıw wazıypası qoyıldı.

Jıldıń aqırına shekem qalada 20 mıń kvartiranı paydalanıwǵa tapsırıw rejelestirilgen. Bul keminde 70 mıń adam ushın jańa jasaw ortalıǵın jaratıwdı ańlatadı. Prezidentimiz turaq jaylar menen bir waqıtta xalıqqa zárúr dem alıw, sport, sawda, bilimlendiriw hám medicinalıq xızmetler de jolǵa qoyılıwı kerek ekenligin atap ótti.

Qalada FIFA talaplarına juwap beretuǵın 55 mıń orınlıq stadion qurılmaqta. Kelesi jılı 20 jasqa shekemgi futbolshılar arasındaǵı jáhán chempionatı múnásibeti menen miymanxana, awqatlanıw hám kewilashar orınlarǵa talaptı esaplap, isbilermenlerge anıq investiciyalıq usınıslardı usınıw tapsırıldı.

Jańa qalada isbilermenlik ortalıǵın qáliplestiriwde mámleketlik uyımlardıń kóshiriliwi de áhmiyetli orın iyeleydi. Házir Qurılıs, Transport hám Energetika ministrlikleri bul jerde jumıs alıp barmaqta, basqa uyımlardıń xızmetkerleri ushın imaratlar qurılmaqta. Qalǵan ministrlik hám mámleketlik shólkemlerdiń de Jańa Tashkentke kóshiwin baslaw tapsırıldı.

Sóylesiwde qalanıń master rejesin ámelge asırıwda investorlardıń baslamasına keńirek jol ashıw zárúrligi atap ótildi. Qalanıń mápine xızmet etetuǵın ózine tán joybarlar ushın lot maydanı yamasa obekt túrin ózgertiw haqqındaǵı usınıslar tez hám anıq ólshemler tiykarında kórip shıǵılıwı kerek. Koncepciyası, joybar hújjetleri hám qurılıs ruqsatnaması aldınnan tayarlanǵan maydanlardıń sanın kóbeytiw wazıypası qoyıldı.

Iri kommerciyalıq obektlerdi tartıw ushın ashıq baslama hám “Swiss challenge” principi tiykarında jer ajıratıw ámeliyatı jolǵa qoyıladı. Bul processte investordıń baslaması járiyalanadı hám basqa qatnasıwshılar jaqsıraq shárt usınıs etpese, jer dáslepki baslamashıǵa ajıratıladı.

Xızmet kórsetiw hám sociallıq obektlerdiń qurılısın qollap-quwatlaw maqsetinde infrastruktura tólemleri qayta kórip shıǵıladı. Bazalıq stavka sawda, servis hám biznes orayları ushın úsh esege, miymanxana hám turizm obektleri ushın bes esege, mádeniyat hám kewilashar orınlar ushın on esege azaytıladı. Jeke menshik baqsha, mektep hám emlewxanalar ushın tólem bir procent etip belgilenedi. Bul tártip qurılısı baslanǵan joybarlarǵa da engiziledi.

Jańa Tashkentte “jasıl imarat” standartların qollanıwǵa baylanıslı qárejetlerdi jeńilletiw ilajları da belgilendi. Bahası 50 million dollardan joqarı bolǵan turaq jay emes joybarlar ushın “jasıl” sertifikat alıw qárejetleri mámleket tárepinen tolıq qaplanadı. Investor satıp alǵan hár bir jer maydanınıń 30 procentin kóklemzarlastırıw talabı bul jerde qollanılmaydı: qala aymaǵınıń 30 procentin jasıl maydanǵa aylandırıw bas reje tiykarında mámleket tárepinen támiyinlenedi.

Bahası 50 million dollardan joqarı bolǵan hár bir joybarǵa juwapker biriktirilip, ol obekt iske qosılǵansha investorǵa járdem beredi. Bunday joybarlar boyınsha óz aldına investiciyalıq kelisim dúzilip, onda táreplerdiń minnetlemeleri hám joybardıń ózgesheliklerine sáykes shártler belgilenedi.

Jańa imkaniyatlardan pútkil mámleket isbilermenleri paydalanıwı ushın paytaxttıń hár bir rayonına hám respublikanıń qalǵan 13 aymaǵına Jańa Tashkentten 100 gektardan maydan biriktiriledi. Bul jerler boyınsha dáslepki aukcionda tiyisli aymaq isbilermenleri qatnasadı.

Sırt elli investorlar ushın bolsa dáslepki 50 lot belgilendi. Olardıń jaylasıwı, ekonomikalıq esap-sanaqları hám jaratılǵan imkaniyatlar sáwlelengen usınıslar paketi diplomatiyalıq wákilxanalar arqalı jetkeriledi. Ministrlerge de iri sırt el kompaniyaları menen ushırasıwlarda Jańa Tashkent joybarların tanıstırıp barıw wazıypası qoyıldı.

Sonday-aq, Samarqand qalasındaǵı “Shirin” massiviniń qurılısı kórip shıǵıldı. Bul jerde jumıslardıń tómen dárejede baratırǵanı sınǵa alınıp, Jańa Tashkent ushın belgilengen jeńillik hám imkaniyatlar bul massivke de engiziletuǵını belgilendi.

Prezidentimiz investorlardı jergilikli hám sırt elge ajıratıwǵa múnásibet bildirip, “Kapitaldıń, aldıńǵı ideyanıń hám hadal miynettiń milleti joq!” dep atap ótti. Usı mánide, Jańa Tashkent hám “Shirin” massiviniń qurılısında qatnasıp atırǵan hár bir isbilermen elimizdiń rawajlanıwına úles qosıp atırǵanı atap ótildi.

Bunnan soń mámleketimiz basshısı investorlar menen sóylesti, olardıń usınıs hám baslamaların tıńladı.