Bekobod qalası jáne de abat hám rawajlanǵan mákanǵa aylanadı

Mámleketimiz basshısı Bekobod qalasına elektropoezdda keldi.

Prezidentimizdiń 2025-jıl 27-dekabrde qabıl etilgen “2030-jılǵa shekem temir jol transportında jergilikli jónelislerde jolawshı tasıw kórsetkishlerin arttırıw ilajları haqqında”ǵı qararı tiykarında aymaqlarda transport infrastrukturası jańalanıp, jergilikli qatnawlar keńeytilmekte. Nátiyjede xalıq ushın qolaylı hám sapalı transport xızmetleri jolǵa qoyılmaqta.

Bekobod vokzalında Prezidentimizge paytaxt hám usı qalanı baylanıstıratuǵın jóneliste ámelge asırılǵan jumıslar haqqında málimleme berildi.

192 kilometrlik “Tashkent – Bekobod” temir jol qatnawı kúnine derlik mıń, jılına bolsa 300 mıń jolawshıǵa xızmet kórsetiwi rejelestirilgen. Endi onda altı vagonnan ibarat, 586 jolawshıǵa mólsherlengen elektropoezd saatına 120 kilometrge shekemgi tezlikte háreketlenedi. Bul, ásirese, hár kúni jumıs hám oqıwǵa qatnaytuǵın puqaralar ushın qosımsha qolaylıq jaratadı.

Elektropoezdda jolawshılar ushın barlıq zárúr sharayatlar jaratılǵan. Atap aytqanda, mayıplıǵı bolǵan shaxslar ushın arnawlı kótergishler ornatılǵan. Vagonlar kondicioner hám ısıtıw sistemaları, jumsaq orınlıqlar, USB quwatlaw noqatları hám Wi-Fi tarmaǵı menen úskenelengen. Sonday-aq, videobaqlaw sistemaları, elektron málimleme tabloları hám velosipedler ushın arnawlı orınlar bar.

Tez júrer elektropoezddıń qatnawǵa qoyılıwı avtomobil jollarındaǵı transport júgin azaytıw hám ekologiyalıq taza transport úlesin arttırıwǵa xızmet etedi.
Prezidentimiz temir jol infrastrukturasın bunnan bılay da rawajlandırıw, jolawshılar ushın sharayatlardı jaqsılaw, tarmaqlardı elektrlestiriw hám temir jollarǵa tutas aymaqlardı abadanlastırıw boyınsha juwapkerlerge tiyisli tapsırmalar berdi.

Sonday-aq, mámleketimiz basshısı vokzal infrastrukturası, xızmet kórsetiw sapası hám jolawshılar háreketin nátiyjeli shólkemlestiriw máselelerine ayrıqsha itibar qarattı.

Bunnan soń Prezident Shavkat Mirziyoev Bekobod qalasındaǵı Ózbekstan metallurgiya kombinatında qurılǵan jańa Quyıw-prokatlaw kompleksin iske qosıw máresiminde qatnastı.

Mámleketimiz basshısı kombinat jámáátin, miynet veteranların hám sırt elli birge islesiwshilerdi usı áhmiyetli waqıya menen qutlıqladı.

Atap ótilgenindey, sońǵı jılları elimizde kán-metallurgiya tarawın jańa texnologiyalıq basqıshqa alıp shıǵıw boyınsha keń kólemli reformalar ámelge asırılmaqta.
Ótken on jılda tarawǵa derlik 2 milliard dollar sırt el investiciyası tartılıp, 31 iri óndiris quwatlılıǵı iske qosıldı. Jeke menshik sektorǵa keńnen jol ashılǵanı nátiyjesinde tarmaqta jumıs alıp barıp atırǵan kárxanalardıń sanı 150 den astı.

Usı dáwirde jergilikli metall ónimlerin islep shıǵarıwdıń jıllıq kólemi 3 million tonnaǵa, bahası bolsa 23 trillion sumǵa jetti. Salıstırıw ushın 2016-jılı 1,5 trillion sumlıq 800 mıń tonna ónim islep shıǵarılǵan.

Burın tiykarınan qurılıs tarawı ushın metall prokat jetkerip bergen tarmaq búgingi kúnde mashina qurılısı, elektrotexnika, qorǵanıw sanaatı hám energetika sıyaqlı tez rawajlanıp atırǵan baǵdarlar ushın 80 túrdegi jańa ónim islep shıǵarmaqta.

Prezidentimiz metallurglardıń miyneti Jańa Ózbekstannıń zamanagóy kelbetin jaratıw, iri dóretiwshilik jumısların ámelge asırıw hám ekonomika tarmaqların rawajlandırıwda áhmiyetli orın iyeleytuǵının atap ótti.

Elimiz ekonomikasın texnologiyalıq hám innovaciyalıq ósiw modeline ótkeriw, jalpı ishki ónim kólemin 2030-jılǵa barıp, 240 milliard dollarǵa jetkeriw maqset etilgen.

Kelesi bes jılda ekonomikaǵa 180 milliard dollar sırt el investiciyasın tartıw, 27 milliard dollarlıq sociallıq hám óndirislik infrastruktura joybarların ámelge asırıw, 800 mıń kvartiralı kóp qabatlı turaq jaylar qurıw rejelestirilgen.

Bunday úlken shekler metall ónimlerine bolǵan talaptı házirgige salıstırǵanda 1,5 esege arttıradı.

Usı mánide, 5,5 mıńnan aslam tatıw hám pidayı miynet jámáátine iye Ózbekstan metallurgiya kombinatınıń ayrıqsha ornı bar ekenligi atap ótildi.

Jańa Quyıw-prokatlaw kompleksi kombinatta energiya únemlewshi texnologiyalar hám sanlı sheshimlerdi engiziw, miynet ónimdarlıǵın hám ónimniń sapasın arttırıwda jańa dáwirdi baslap beredi.

Bul kompleks elimizde ıssı prokatlanǵan polat listler islep shıǵarıw boyınsha birinshi joybar sıpatında tariyxtan orın aladı.

Onıń iske qosılıwı nátiyjesinde jılına 8 trillion sumlıq 1 million tonna ıssı prokatlanǵan polat list islep shıǵarıladı. Tashkent hám Samarqand metallurgiya zavodlarınıń prokat listlerge bolǵan talabı tolıq qaplanadı. Sonday-aq, 1 mıń 200 joqarı dáramatlı jumıs ornı jaratıladı.

Mámleketimiz basshısı kompleksti qurıwda qatnasqan qurılısshı hám injenerlerge, texnolog hám mashinistlerge, jumısshı-xızmetkerlerge, miynet veteranları jáne sırt elli birge islesiwshilerge minnetdarshılıq bildirdi.

Saltanatlı máresimde Ózbekstan metallurgiya kombinatın bunnan bılay da rawajlandırıw boyınsha keleshektegi rejeler de belgilep berildi.

Kombinattıń shiyki zatqa bolǵan talabın jergilikli resurslar esabınan támiyinlew eń tiykarǵı wazıypa bolatuǵını atap ótildi. Elimiz aymaqlarında 1,5 milliard tonna temir rudasınıń rezervi bar.

Jaqın úsh-tórt jılda “Tebinbulaq” kánin iske qosıw arqalı jılına 1 million tonna polat islep shıǵarıw rejelestirilgen.

“Surun-ata” kánindegi rudalardı bayıtıw nátiyjesinde bolsa jılına 600 mıń tonna temir shiyki zatın alıw jolǵa qoyıladı. Bul shiyki zattı qayta islew ushın kombinatta bahası 180 million dollarlıq zamanagóy metallurgiya zavodınıń qurılısı baslanadı.

Kelesi úsh jılda 30 million dollar investiciya esabınan polat sharlar islep shıǵarıw liniyaları basqıshpa-basqısh modernizaciyalanıp, olardıń quwatlılıǵı 250 mıń tonnadan 500 mıń tonnaǵa shekem arttırıladı.

Usı jıldıń ózinde bul sanaat parkinde úlken diametrli qubırlar, kóterme kranlar hám filtrlew úskenelerin islep shıǵarıw boyınsha ulıwma bahası 70 million dollar bolǵan 6 joybar baslanadı. Olardıń ámelge asırılıwı nátiyjesinde jáne 660 joqarı dáramatlı jumıs ornı jaratıladı.

Prezidentimiz metallurgiya awır, biraq maqtanıshlı taraw ekenin atap ótip, kombinat jumısshı-xızmetkerleriniń mashaqatlı hám pidákerlik miyneti joqarı húrmet jáne maqtawǵa ılayıq ekenin atap ótti.

Derlik bir ásirlik tariyxqa iye kombinatta ustaz-shákirt dástúri tiykarında jumıs alıp barıp atırǵan qánigelerdiń bilimi, tájiriybesi hám kásiplik potencialı kóplegen miynet jámáátleri ushın haqıyqıy úlgi ekeni atap ótildi.

Bunnan soń mámleketimiz basshısı rámziy túymeni basıp, Quyıw-prokatlaw kompleksiniń jumısına start berdi.

Taraw veteranları, kombinat xızmetkerleri hám sırt elli birge islesiwshiler menen sóylesti.

Prezident Shavkat Mirziyoev Ózbekstan metallurgiya kombinatı Quyıw-prokatlaw kompleksiniń birden-bir basqarıw pulti arqalı metaldı prokatlaw processlerin kózden ótkerdi.

Sońǵı jılları kombinattı modernizaciyalaw hám onıń óndirislik potencialın arttırıwǵa ayrıqsha itibar qaratılmaqta. Nátiyjede kombinattıń sap paydası 2017-jıldaǵı 14 million dollardan 2025-jılǵa kelip, 23 million dollarǵa jetken.

Mámleketimiz basshısı 2018-jıl 29-avgust kúni Bekobodqa saparı waqtında Quyıw-prokatlaw kompleksiniń qurılıs joybarına tırnaq tasın qoyǵan edi.

Joybardıń ulıwma bahası 839 million dollardı quraydı. 18 gektar maydanda qurılǵan bul strategiyalıq áhmiyetke iye kompleks elimizde metall ónimlerine bolǵan talaptı qanaatlandırıwǵa xızmet etedi.

Bul jerde ónim islep shıǵarıw kólemin 2 million tonnaǵa jetkeriw, qosımsha túrde 1,04 million tonna oramlı polat list prokatın islep shıǵarıw hám kombinattaǵı jámi jumıs orınların 7 mıńǵa jetkeriw rejelestirilgen.

Komplekste Italiyanıń “Danieli” kompaniyasınıń tájiriybesi tiykarında birinshi márte úzliksiz polat quyıw úskenesi basqa da barlıq texnologiyalıq úskeneler menen integraciyalanıp, birden-bir basqarıw pulti arqalı basqarılmaqta.

Aldınǵı texnologiyalarda 4-5 basqarıw pulti paydalanılǵan hám olarda 9 xızmetker miynet etken bolsa, búgingi kúnde birden-bir basqarıw sisteması arqalı processti tek ǵana 3 qánige qadaǵalap atır.

Prezidentimiz birden-bir basqarıw sistemasına jasalma intellekt texnologiyaların engizip, komplekstiń turaqlılıǵı hám ekonomikalıq nátiyjeliligin bunnan bılay da arttırıw zárúrligin atap ótti.

Úskenelerdiń qáwipsizligi hám operativligi boyınsha bul kompleks Oraylıq Aziyada uqsası joq joybar bolıp esaplanadı. Atap aytqanda, óndiris procesin toqtatpastan insan faktorınıń qatnasıwısız tiykarǵı vallardı burınǵı 30-40 minuttıń ornına tek ǵana 5-7 minutta avtomatikalıq túrde almastırıw imkaniyatı jaratılǵan.

Prezidentimiz list prokatınan tayarlanǵan ónimlerdiń úlgilerin de kózden ótkerdi.

Juwapkerlerdiń málimlemeleri de tıńlandı. Atap aytqanda, ıssı prokatlanǵan list ónimleri qosımsha qun shınjırı, respublikada óndiristi ózlestiriw usınıs etiletuǵın ónimler haqqında málimleme berildi.

Qurılısta armatura óniminiń aylanısın tártipke salıw, qurılıs obektlerinde qara metall prokatınıń qollanılıwı ústinen qadaǵalaw hám seysmikalıq qáwipti azaytıw boyınsha ámeliy jumıslar túsindirildi.

Bul jerde Prezident Shavkat Mirziyoev Ózbekstan metallurgiya kombinatında qara metallurgiya sanaatın jańa basqıshqa alıp shıǵıw boyınsha tiykarǵı wazıypalar boyınsha májilis ótkerdi.

Mámleketimiz basshısı qara metallurgiya qurılıs, qurılıs materialları, avtomobil qurılısı, mashina qurılısı, energetika hám elektrotexnika sıyaqlı jámi 50 milliard dollarlıq ekonomika tarmaqları ushın tiykarǵı shiyki zatlardan biri ekenin atap ótti.

Ekonomikanı texnologiyalıq hám innovaciyalıq ósiw modeline ótkerip, jalpı ishki ónimdi 2030-jılı 240 milliard dollarǵa jetkeriw ushın jılına keminde 8-9 procentlik ósiwdi támiyinlew zárúr. Bul processte metallurgiya sanaatı turaqlı shiyki zat bazası, básekige shıdamlı ónim hám zamanagóy texnologiyalarǵa súyeniwi shárt.

Sonıń menen birge, tarawda importqa baylanıslılıq, ózine túser bahası hám energiyanıń jumsalıwınıń joqarılıǵı, sanlastırıw hám jasalma intellektti engiziw boyınsha nátiyjeler jeterli emes ekenligi kórsetip ótildi. Dúnyadaǵı kelispewshilikler hám tiykarǵı transport koridorlarındaǵı logistika mashqalaları sharayatında mine usı máseleler jáne de ayrıqsha áhmiyetke iye ekeni atap ótildi.

Sońǵı on jılda elimizde polat list, sortlı prokat, qubırlar hám metall konstrukciyalarǵa talap 3 esege artıp, 5,5 million tonnaǵa jetti. Jańadan qurılıp atırǵan atom elektr stanciyası, Tórtinshi mıs bayıtıw fabrikası hám jańa mıs eritiw zavodınıń ózine 2,5 million tonnaǵa shamalas polat list hám armatura kerek boladı.

Kelesi bes jılda 180 milliard dollar muǵdarında jańa quwatlıqlar iske qosıladı, 27 milliard dollar muǵdarında infrastrukturalıq joybarlar ámelge asırılıp, 800 mıń kvartiralı kóp qabatlı turaq jaylar qurıladı. Sonıń nátiyjesinde metall ónimlerine jıllıq talap 2030-jılǵa shekem 1,5 esege kóbeyip, 8 million tonnadan artadı.

Búgingi kúnde Bekobod metallurgiya kombinatı metall prokatınıń 40 procentin ekilemshi metalldan, 60 procentin import esabınan islep shıǵarmaqta. Respublika boyınsha hár jılı 700 mıń tonna qara metallom kombinatqa tapsırılıp atırǵan bolsa da, jáne 500 mıń tonna metallom jasırın aylanısta qalmaqta.

Sonlıqtan, qara metall aylanısı menen baylanıslı barlıq processler elektron platforma arqalı real waqıt rejiminde monitoring etiledi. Tarawda salamat báseki ortalıǵın hám bahanıń turaqlılıǵın támiyinlew, tásirsheń qadaǵalaw mexanizmlerin ornatıw ushın Húkimette óz aldına Joybarlaw ofisi shólkemlestiriledi. 1-avgusttan “E-lom” elektron platformasın iske qosıp, qara metall aylanısın qadaǵalawǵa alıw tapsırıldı.

Elimizde 1,5 milliard tonna temir rudası rezervi bar. “Surun-ata” káninen jılına 650 mıń tonna temir shiyki zatın alıw boyınsha qıtaylı sherikler menen kelisimge erisilgen. Sonday-aq, “Tebinbulaq” kánin iske qosıw arqalı jılına 1 million tonna polat islep shıǵarıw imkaniyatı jaratılatuǵını, Tájikstan metallurgiya kombinatınan jılına 700 mıń tonna temir shiyki zatın alıp keliw boyınsha shártnamanı rásmiylestiriwdi tezletiw zárúr ekenligi kórsetip ótildi.

Iri jeke menshik kárxanalar geologiyalıq-izlew jumısları, kánlerden shiyki zat qazıp alıw hám tayar ónimge shekemgi tolıq texnologiyalıq shınjırdı shólkemlestiriwge tayar ekeni atap ótilip, bunıń ushın olarǵa sharayat jaratıw zárúrligi atap ótildi.

Mámleketimiz basshısı temirdiń sapasın arttırıw ushın marganec hám ferrosiliciy shiyki zatına da talap artatuǵının atap ótti. Juwapkerlerge perspektivalı maydanlardı jasalma intellekt járdeminde tallap, temir hám onı bayıtıwǵa zárúr minerallar rezervin kóbeytiw boyınsha geologiyalıq baǵdarlamasın islep shıǵıw tapsırıldı.

Metallurgiya tarawında 150 ge shamalas orta hám kishi jeke menshik kárxanalar jumıs alıp barmaqta. Olardı shiyki zat penen turaqlı támiyinlew maqsetinde shetten shiyki zattı oraylasqan halda alıp keliw boyınsha óz aldına kompaniya shólkemlestiriledi. Bul kompaniyaǵa 200 million dollar ajıratıladı, import shiyki zat tek ǵana birja arqalı satıladı.

Májiliste metall ónimleriniń assortimentin keńeytiw, iri kombinatlar hám jeke menshik kárxanalar arasında kooperaciyanı kúsheytiw máselelerine ayrıqsha itibar qaratıldı.

Búgin iske qosılǵan Quyıw-prokatlaw kompleksi esabınan avtomobil qurılısı, arnawlı transport, texnologiyalıq úskeneler, turmıslıq hám awıl xojalıǵı texnikaları, qurılıs materialları tarawlarında 1,5 milliard dollarlıq ónimlerdi ózimizde islep shıǵarıw imkaniyatı jaratılmaqta.

Juwapkerlerge tigissiz truba, suwıq prokat, metalldı 3D usılda basıp shıǵarıw hám joqarı anıqlıqta qayta islew boyınsha joybarlar toplamın tayarlaw tapsırıldı.

Bekobod metallurgiya kombinatındaǵı 90 gektar maydanda tayar infrastrukturaǵa iye “Ózbekstan ekologiyalıq texnologiyalar sanaat parki” shólkemlestiriledi. Ol jerde qara metallar boyınsha R&D orayı hám xalıqaralıq sertifikat beretuǵın zamanagóy laboratoriya iske qosıladı.

Sonday-aq, Samarqand, Jizzaq, Namangan hám Sırdáryadaǵı iri metallurgiya kárxanaları átirapında jámi 100 million dollarlıq kooperaciya joybarlarınıń baǵdarlamasın islep shıǵıw wazıypası qoyıldı. Bul aymaqlarda qosımsha qun shınjırın keńeytiw hám jańa ónimlerdi lokalizaciyalawǵa xızmet etedi.

Májiliste metallurgiya sanaatında sanlastırıw hám jasalma intellektti engiziw máselesi de dodalandı. Almalıq kán-metallurgiya kombinatında jasalma intellekt arqalı operaciyalıq qárejetler, ózine túser bahası hám energiya jumsalıwın azaytıw, miynet ónimdarlıǵın arttırıw boyınsha nátiyjeler bar ekenligi atap ótildi.

Metallurgiya kárxanalarında jasalma intellekt hám sanlastırıw arqalı úskenelerden paydalanıw nátiyjeliligin 20 procentke arttırıw, ózine túser bahasın 10 procent, energiya jumsalıwın 15 procent, texnikalıq xızmet kórsetiw qárejeti hám texnologiyalıq úzilislerdi 20 procentke qısqartıw boyınsha baǵdarlama islep shıǵıladı.

Metallurgiya sanaatına “aqıl orayı” sıpatında Ekonomikalıq izertlewler hám reformalar orayı belgilendi. Sonday-aq, tarawǵa Nawayı hám Almalıq kán-metallurgiya kombinatlarınıń ilimiy orayları, Ózbekstan texnologiyalıq metallar kombinatınıń “Ózbekstan – Koreya” ilimiy-texnologiyalıq orayı, Tashkent mámleketlik texnika universiteti, Nawayı mámleketlik kánshilik hám texnologiyalar universiteti, Almalıq mámleketlik texnika institutı jáne “Moskva polat hám aralaspalar institutı”nıń Almalıq filialı biriktirildi.

Bul ilimiy mákemeler hám joqarı oqıw orınları jańa túrdegi materiallarǵa talaptı, onı qaplaw ushın qaysı aymaqta qanday joybar islew hám qanday texnologiyadan paydalanıw zárúr ekenligin, qaysı baǵdarlarda kadrlar tayarlaw kerek ekenligin tallaydı. Hár bir aymaq kesiminde bir jıllıq, úsh jıllıq hám bes jıllıq baǵdarlamalar islep shıǵıladı.

Jańa oqıw jılınan Bekobod kombinatında qara metallurgiya boyınsha kafedra ashılıp, dual bilimlendiriw jolǵa qoyıladı.

Ekonomikalıq izertlewler hám reformalar orayına metallurgiya tarawındaǵı mashqalalardı bir jerge jámleytuǵın sanlı platformanı iske qosıw tapsırıldı. Ilimiy qollanbalardı qarjılandırıw hám ámeliyatqa engiziw boyınsha venchur fond shólkemlestiriledi.

Mámleketimiz basshısı tarawda “texnologiyalıq sekiriw” islew zárúrligin atap ótip, qara metallurgiyada shiyki zat bazasın keńeytiw, importqa baylanıslılıqtı azaytıw, sanlastırıw hám jasalma intellektti keńnen engiziw, jańa ónimlerdi lokalizaciyalaw hám jeke menshik sektor menen kooperaciyanı kúsheytiwdi tiykarǵı wazıypalar sıpatında belgilep berdi.

Májiliste taraw juwapkerleri hám aymaqlar basshılarınıń esabatları tıńlandı.

Prezident Shavkat Mirziyoev Bekobod qalasına saparı dawamında “Xos yoz” kanalınıń boyı hám Doslıq máhállesinde ámelge asırılǵan dóretiwshilik jumısları menen de tanıstı.

Bir waqıtları itibardan shette qalǵan, qarawsız hám tártipsiz bolǵan “Xos yoz” kanalınıń boyı búgin qalanıń eń gózzal múyeshine aylandı. Endi máhálleler janında barlıq qolaylıqlarǵa iye zamanagóy ekologiyalıq mákan payda boldı.

Aymaqtı kompleksli rawajlandırıw boyınsha master-reje sheńberinde 3 kilometr uzınlıqta arnawlı piyadalar jolı hám 5,4 kilometrlik bekkem tosıqlar qurıldı, 2 kópir boy tikledi. Sonday-aq, joybar nátiyjesinde jaǵalıq boyında 27 jańa sawda hám zamanagóy xızmet kórsetiw obekti shólkemlestirilip, 167 jańa turaqlı jumıs ornı jaratıldı.

Mámleketimiz basshısı bul jerde sport penen shuǵıllanıp atırǵan jaslar menen sáwbetlesti.

Doslıq máhállesi aymaǵı házir 28 gektardı quraydı. Bul jerde 33 kóp qabatlı turaq jay, jeke menshik mektepke shekemgi bilimlendiriw shólkemi, futbol maydanı, 16 sport hám balalar maydanshaları jáne kitapxana bar.

Usı jılı isbilermenler tárepinen 1,1 milliard sum investiciya kirgizilip, 10 xızmet kórsetiw obekti hám 1 ulıwma awqatlanıw shaqapshası shólkemlestirildi. Nátiyjede 25 jańa jumıs ornı jaratıldı. Sonday-aq, intakerlerdiń qarjıları esabınan “Watan pidayısı baǵı” da qurıldı. Onda áskeriy-texnika úlgileri ornatılıp, xızmet kórsetiw obektleri qurıldı.

“Baslamalı byudjet” qarjıları esabınan máhálle aymaǵında Bekobod qalası muzeyi shólkemlestirildi. Máhállede nuranıylar hám miynet veteranlarınıń dem alıwı, ushırasıwlar, dógerek sáwbetleri jáne ruwxıy-aǵartıwshılıq ilajlar ótkeriw ushın aǵash konstrukciyalı jazǵı ılashıq boy tikledi.

Mámleketimiz basshısı máhálledegi qurılıs jumısların kózden ótkerip, xalıq ushın jaratılǵan sharayatlar menen tanıstı. Máhálle belsendileri hám miynet veteranları menen qızǵın sóylesti.

– Barlıq ámelge asırıp atırǵan jumıslarımız, qurılıp atırǵan obektlerimiz hám joybarlarımız, bárinen burın, xalıqqa xızmet etiwi, adamlardıń turmısın jaqsılawı kerek. Adamlar óz máhállesinde, qalasında bolıp atırǵan ózgerislerdi seziwi, olardıń nátiyjesin kúndelikli turmısında kóriwi kerek.

Hár saparı aymaqlarǵa kelgenimizde adamlar Jańa Ózbekstan reformalarınıń nápesin, onıń jańalanıw hám rawajlanıw samalın seziwi zárúr. Bekobod qalası da óziniń miynetkesh hám pidayı xalqı, qábiletli jasları, turmıslıq tájiriybege iye nuranıyları menen jáne de abat hám rawajlanǵan orınǵa aylanıwı kerek.

Biz jaslarımızdıń arzıw-niyetleri, nuraniylarımızdıń jaqsı niyet hám maqsetleri ámelge asıwı ushın barlıq imkaniyatlardı jumsaymız, – dedi Prezidentimiz.

Sonıń menen Prezidentimizdiń Bekobodqa saparı juwmaqlandı.