Mámleketlik basqarıwda birden-bir sanlı platformanı engiziw ilajları kórip shıǵıldı

Sońǵı jıllarda elimizde sanlı mámleketlik xızmetlerdi keńeytiw, mámleketlik uyımlardıń jumısına zamanagóy málimleme sistemaların engiziw, xalıq hám isbilermenler ushın qolaylıqlardı arttırıw boyınsha keń kólemli jumıslar ámelge asırıldı.

Bunıń nátiyjesinde Ózbekstan BMShtıń “Elektron húkimet” reytinginde 24 tekshe joqarıladı. 2030-jılǵa shekem elimizdi bul baǵdarda kúshli 30 mámleket qatarına kirgiziw maqset etilgen.

Usı jılı sanlı xızmetler sanı 880 ge, olardan paydalanıwshılar sanı bolsa 15,5 millionǵa jetiwi kútilmekte. Salıstırıw ushın, 2024-jılı sanlı xızmetler sanı 525, paydalanıwshılar sanı 4 million bolǵan.

Qalaberdi, mámleketlik basqarıwda maǵlıwmatlar bazaları hám málimleme sistemaları túrli uyımlar kesiminde tarqalǵan halda qálipleskeni, olardı tallaw hám qarar qabıl etiw processlerinde birden-bir kózqarastıń jetispey atırǵanı kórsetip ótildi.

Sonlıqtan, mámleketlik basqarıwdıń birden-bir integraciyalasqan sanlı platformasın basqıshpa-basqısh engiziw usınıs etildi. Bul sistema arqalı aymaqtıń ekonomikası, investiciya, ekologiya, qáwipsizlik máseleleri, xalıqtı qıynap atırǵan mashqalalar, máhállelerdiń abadanlıq dárejesi, kosmoslıq maǵlıwmatlar, obektler hám karta qatlamları birden-bir platformada sáwlelendiriledi.

Platforma jasalma intellekt texnologiyaları tiykarında maǵlıwmatlardı tallaw, aymaqlar kesiminde mashqalalardı erte anıqlaw, qararlardıń orınlanıwın monitoring etiw, resurslardı durıs baǵdarlaw hám basqarıw nátiyjeliligin arttırıw imkaniyatın beredi.

Mámleketimiz basshısı usı jılı bul sanlı basqarıw sistemasın paytaxtta, kelesi jıldan bolsa barlıq aymaqlarda engiziw zárúr ekenligin atap ótti.

Prezentaciyada tovarlar hám xızmetlerdi birden-bir milliy klassifikaciyalaw sistemasın iske qosıw máselesi de kórip shıǵıldı. Házirgi waqıtta bajıxana, salıq, statistika hám basqa da uyımlar túrli tovar klassifikatorlarınan paydalanbaqta. Bul bolsa biznes qárejetleriniń artıwı, esabatlardıń anıqlıǵınıń tómenlewi hám uyımlararalıq maǵlıwmat almasıwda qıyınshılıqlarǵa sebep bolmaqta.

Birden-bir milliy klassifikaciyalaw sisteması engizilse, isbilermenler ushın artıqsha byurokratiyalıq processler qısqaradı, mámleketlik uyımlar arasında maǵlıwmat almasıwı ápiwayılasadı, statistikalıq esabatlardıń anıqlıǵı artadı.

Sonday-aq, milliy navigaciya sistemasın jaratıw usınısı bildirildi. Búgingi kúnde elimizde bul baǵdarda tiykarınan sırt el platformalarınan paydalanılıp atırǵanı atap ótildi. Milliy navigaciya sisteması geomaǵlıwmatlardı birden-bir standart tiykarında qáliplestiriw, transport, logistika, operativ xızmetler, qala qurılısı hám mámleketlik xızmetlerdi sapalı shólkemlestiriwge xızmet etedi.

Prezentaciyada MT tarawınıń eksportı hám startaplar ekosistemasın rawajlandırıw rejeleri de kórip shıǵıldı. 2030-jılǵa shekem MT eksportın 5 milliard dollarǵa jetkeriw, 5 mıń jedel startap shólkemlestiriw hám 2 milliard dollar investiciya tartıw maqset etilgen.

Xalıqaralıq “StartupBlink” reytinginde Ózbekstan 31 tekshe joqarılap, dúnyadaǵı eń tez ósip atırǵan startap ekosistema sıpatında bahalanǵanı, Tashkent qalası Oraylıq Aziya qalaları arasında 1-orındı ielegeni, Samarqand hám Ferǵana birinshi márte dúnyanıń TOP-1000 startap qalaları reytingine kirgeni atap ótildi.

Bul baǵdarda “Talent Hub” baǵdarlamasınıń iske qosılıwı belgilengen. Ol arqalı sırt elli qánigeler hám investorlarǵa aralıqtan kárxana, bank esap beti hám xalıqaralıq karta ashıw imkaniyatı jaratıladı. IT-Park rezidentleriniń xızmetkerleri ushın salıq jeńilliklerin 2040-jılǵa shekem sozıw, “IT visa” hám “Zero Risk” baǵdarlamaların keńeytiw usınıs etildi.

Sonday-aq, MT eksport etiwshi kárxanalarǵa aylıq miynet haqı qárejetleriniń bir bólegin qaplap beriw, xalıqaralıq sertifikatlaw qárejetlerin kompensaciyalaw, sırt elli buyırtpashılar hám qánigelerdi tartıw ushın relokciya qárejetleriniń bir bólegin qaplap beriw sıyaqlı qollap-quwatlaw mexanizmleri názerde tutılmaqta.

Buxara hám Ferǵanada 20 dan aslam akseleraciya baǵdarlamaların shólkemlestiriw, startaplardı iri xalıqaralıq bazarlarǵa alıp shıǵıw boyınsha da usınıslar usınıs etildi.

Májiliste telekommunikaciya infrastrukturasın rawajlandırıw máselelerine ayrıqsha itibar qaratıldı. Sońǵı jılları elatlı punktlerdi telekommunikaciya xızmetleri menen qamtıp alıw dárejesi 41 procentten 98 procentke jetti, ulıwma internet ótkeriw qábileti 65 esege arttı.

Sonıń menen birge, jergilikli isbilermenler ushın telekommunikaciya xızmetlerin kórsetiw ele jeterli dárejede tartımlı emes ekenligi, alıs aymaqlarda sımlı internetten paydalanıwshılardıń úlesi júdá tómen ekenligi kórsetip ótildi.

Tarawda biznes ortalıǵın jaqsılaw maqsetinde telekommunikaciya tarmaqların joybarlaw hám qurıw boyınsha házirgi 2 licenziya túrin birewge birlestiriw, licenziya beriw múddetin 25 jumıs kúninen 10 jumıs kúnine qısqartıw usınıs etildi.

Kóp qabatlı turaq jaylardı joqarı tezliktegi internetke jalǵanıw texnologiyası tiykarında joybarlaw hám qurıw talabı engiziledi. Bul jańa turaq jaylarda optikalıq talshıqlı internet infrastrukturasın aldınnan esapqa alıw, xalıqqa sapalı sanlı xızmetler kórsetiw imkaniyatın beredi.

Tarawda óz jumısın baslamaqshı bolǵan jaslar ushın “Keleshek isbilermen” baǵdarlaması sheńberinde 2 jıllıq jeńilletilgen dáwir menen 7 jıl múddetke 15 procent stavkada 530 million sumǵa shekem kreditler ajıratıw usınıs etildi. Alıs hám shetki aymaqlarda jumıs alıp baratuǵın isbilermenler ushın jeńilletilgen tarif rejeleri islep shıǵıladı.

Prezidentimiz usınıslardı maqullap, mámleketlik uyımlardıń maǵlıwmatların integraciyalaw, sanlı xızmetlerdiń sapasın arttırıw, kiberqáwipsizlik hám jeke maǵlıwmatlardıń qorǵalıwın támiyinlew, tarawda jeke menshik sektor ushın jáne de qolaylı ortalıq jaratıw boyınsha juwapkerlerge anıq tapsırmalar berdi.