Jaslardıń ómirden múnásip ornın tabıwında bilim, kásip hám texnologiya eń bekkem súyenish boladı

Sońǵı jılları elimizde jaslardı zamanagóy kásip-ónerge úyretiw, jumıs penen támiyinlew hám isbilermenligin qollap-quwatlawǵa ayrıqsha itibar qaratılmaqta. Bul bir qaraǵanda mámlekettiń ápiwayı sociallıq wazıypası sıyaqlı kórinedi. Negizinde bolsa bul process eldiń tınıshlıǵı, ekonomikalıq turaqlılıǵı hám ullı keleshegin kepilleytuǵın tiykarǵı shárt bolıp esaplanadı.

Búgin jaslardıń kúsh-ǵayratı, bilimge bolǵan umtılısı durıs baǵdarlansa, erteń hámmesi ayrıqsha dárejede boladı. Sebebi, endi zamanagóy dúnyada mámleketler aymaǵınıń úlkenligi yamasa tábiyiy baylıqları menen emes, al texnologiyaları hám bilimli jasları menen jarıspaqta.

Eger jaslar máselesine, olardıń mashqalalarına bir zaman bolsa da itibarsız qalınsa, jámiyette úlken qıyınshılıqlar payda bolıwı sózsiz. Jaslar arasındaǵı jumıssızlıq bolsa kóplegen mashqalalardıń payda bolıwına sebepshi boladı. Mámleket bul qáwipti jaqsı túsinedi. Sonıń ushın da Ózbekstanda jaslardıń táǵdirine biypárwa bolıwǵa hasla jol qoyılmaydı.

Sońǵı jılları elimizde jaslardı qollap-quwatlaw boyınsha pútkilley jańa hám uqsası joq sistema jaratıldı. Búgin shetki awıldaǵı jigit-qızlardıń da qábiletin júzege shıǵarıw, jol ashıw ushın mámleket zárúr sharayatlardı jaratpaqta.
Ózbekstan jasları úlken sheklerge qaray isenim menen umtılmaqta. Sebebi olar ómirde hesh qashan jalǵız emesligin, artında bárqulla súyene alatuǵın qúdiretli mámleketi bar ekenin jaqsı biledi.

Mámleketimiz basshısı dáslep Olimpiada qalashasında shólkemlestirilgen arnawlı kórgizbede elimizdiń belsendi hám izleniwsheń jasları menen ushırastı.
Prezidentimiz olardıń máhálle turmısı, ekologiya, startaplar, injenerlik hám kitapqumarlıq mádeniyatın arttırıw sıyaqlı tarawlardaǵı joybarları menen tanıstı, joybar intakerleri menen jeke sóylesti.

Ferǵana rayonındaǵı Abat máhállesi jaslar jetekshisi Islombek Muhammadjonov óziniń máhállesinde shólkemlestirgen “Abat tálim” oqıw orayı arqalı 600 zamanlasın zamanagóy kásipler hám shet tillerge oqıtqan. Ol óz jumısın Germaniyanıń abıraylı kompaniyaları menen xalıqaralıq shártnamalar tiykarında globallıq bazarǵa alıp shıǵıwǵa eriskenin aytıp berdi. Usı ámeliy háreket sebepli máhálle jaslar jumıssızlıǵı hám jınayatshılıǵınan jıraq aymaqqa aylandırılǵan.

Sonday-aq, “Jasıl baslamalar” qorınıń koordinatorı, “Green University” magistrantı Gulirano Mamirovanıń baslamaları itibarǵa ılayıq. Onıń ekologiyalıq-sociallıq hám “jasıl” innovaciyalar startapların jolǵa qoyıw baǵdarındaǵı jumısları mámleketimiz basshısınıń ayrıqsha itibarın tarttı.

Reńli súwretler tańlawında “Eń original ideya” nominaciyasınıń jeńimpazı Odinaxon Mamurjonovanıń dóretiwshilik umtılısları, fizikalıq imkaniyatı sheklengenine qaramastan, úyde bilim alıp atırǵan balalar ushın “Oqı hám rawajlan” joybarın ámelge asırıp kiyatırǵan CHinora Ǵulomovanıń mártligi Prezidentimiz tárepinen joqarı bahalandı. Olardıń jámiyettegi inklyuziv ortalıqtı bekkemlewge qaratılǵan baslamaların sistemalı qollap-quwatlaw boyınsha juwapkerlerge tapsırmalar berildi.

Kórgizbeniń startaplar, isbilermenlik hám kásip-óner maydanında jaslarımızdıń xalıqaralıq kólemde básekilese alatuǵın intellektuallıq potencialı kórsetildi.

Prezident mektebi pitkeriwshisi, CHikago universiteti studenti Asilbek Ashurov on segiz jasında “Makon AI” startapına tiykar salıp, jasalma intellektke tiykarlanǵan SAT/AP testlerine tayarlıq platformasın jarattı. Búgingi kúnde startap AQSh hám Jaqın Shıǵıs hám Arqa Afrika regionında 100 mıńnan aslam qarıydar hám investorlardan 380 mıń dollar investiciya tartqanın, joybar bahası 3 million dollarǵa bahalanǵanın málim etti.

Dúnyanıń jetekshi akseleratorı esaplanǵan “Y Combinator” baǵdarlamasınıń birinshi ózbek qatnasıwshısı Sardorbek Rahmatulloevtıń AQShta jıllıq dáramatı kóp mıń dollarlıq startapqa tiykar salǵanı hám “Meta Superintelligence” kompaniyasında arttırǵan tájiriybesi de milliy startap ekosistemamızdıń jetiskenligi sıpatında tán alındı.

Prezidentimiz bunday joqarı texnologiyalı joybarlardı mámleketimizde keńnen engiziw hám jas isbilermenlerge sırt el bazarlarına shıǵıwda járdemlesiw mámleketlik siyasattıń tiykarǵı baǵdarı bolıp qalatuǵının atap ótti.
Injenerlik hám innovaciya tarawındaǵı prezentaciyalar sheńberinde studentlerdiń jasalma intellekt hám de robototexnika baǵdarındaǵı jetiskenlikleri kórip shıǵıldı.

Tashkent qalasındaǵı Turin politexnika universitetiniń studenti, dronlar jarısı boyınsha mámleket chempionı Biloliddin Ismoilov jergilikli antidron sistemaların jaratıw hám jetilistiriwde qatnasıp atırǵanın málim etti.
Nókis mámleketlik texnika universiteti studenti, Nókis jaslar texnoparki rezidenti Ayzada Asanovanıń “Jańa áwlad avtomobilleri” baǵdarındaǵı tabıslı joybarı bolsa aymaqlarda da injenerlik mektepler jedel rawajlanıp atırǵanınan derek beredi. Mámleketimiz basshısı bul innovaciyalıq qollanbalardı hár qıylı tarmaqlarda engiziw zárúrligin atap ótti.

Jas áwladtıń mádeniy-aǵartıwshılıq tarawdaǵı hám kitapqumarlıq mádeniyatın arttırıw baǵdarındaǵı jetiskenlikleri de ushırasıwdıń tiykarǵı temalarınan biri boldı.

Xalıqaralıq gózzallıq hám kórkem óner tańlawlarınıń jeńimpazı Nigina Faxriddinova hám jas muzıkashı Amina Avazovanıń jetiskenlikleri milliy mádeniyatımızdıń xalıqaralıq abırayın arttırıwǵa xızmet etip atırǵanı atap ótildi.

Sonıń menen birge, xalıq arasında kitapqumarlıqtı keńnen en jaydırıwǵa qaratılǵan sanlı joybarlar kórsetildi. “Oqıw” joybarınıń basshısı Sirojiddin Olimov jaratqan mobil qosımsha derlik 5 million márte júklep alınǵanı hám onda oqılıp atırǵan kitaplardıń sanı 18 millionnan artqanın atap ótti.

Zulfiya atındaǵı Mámleketlik sıylıqtıń iyesi Nilufar Ergasheva “Jasıl sóz” kitabınıń avtorı, “Sóz” joybarınıń qatnasıwshısı. Ol Ózbekstannıń ádebiy kartasın jaratıw arqalı ádebiy turizmdi rawajlandırıw jáne “Burhoniddin Marǵinoniy” ilimiy-aǵartıwshılıq hám turizm kompleksinde ózbek dóretiwshileriniń iri  poeziyalıq -muzıkalıq, ádebiy kesheler sıyaqlı ǵalabalıq kórkem koncert baǵdarlamaların shólkemlestiriw usınısın bildirdi.

Prezident Shavkat Mirziyoev jaslar menen bolıp ótken qızǵın sóylesiwde olar tárepinen alǵa qoyılǵan perspektivalı joybar hám baslamalardı qollap-quwatladı.

Bunnan soń, Prezident Shavkat Mirziyoev jaslar menen ushırasıw ótkerdi.
Mámleketimiz basshısı sóziniń aldında elimizdegi barlıq jigit-qızlardı bayram menen qızǵın qutlıqladı.
– Biz reformalarımızdıń dáslepki kúnlerinen jaslardı qollap-quwatlaw, olardıń arzıw-niyetlerin júzege shıǵarıwdı mámleketlik siyasattıń eń tiykarǵı baǵdarlarınan biri sıpatında belgilep alǵanbız,-dedi Prezidentimiz.

Sońǵı jılları bul baǵdarda pútkilley jańa sistema jaratıldı. Hár bir máhállede jaslar jetekshileriniń jumısı jolǵa qoyıldı, jigit-qızlardıń baslamaların qollap-quwatlaw, bántligi, bilim alıwı, kásip-óner iyelewi hám isbilermenlik baslawı ushın keń imkaniyatlar ashıldı. Hár hápteniń piyshembi kúni “Jaslar kúni” etip belgilenip, ministrlikler hám uyımlar jaslardıń mashqalaların úyreniw jáne olarǵa sheshim tabıwǵa jumsaldı.

Ámelge asırılǵan jumıslardıń nátiyjesinde “Jaslar dápteri” arqalı 1,5 million jastıń mashqalası sheshildi. Jas isbilermenlerdiń sanı 5 esege kóbeyip, 287 mıńnan astı. Shet tillerin intensiv úyrenip atırǵan jigit-qızlardıń sanı 3,5 millionǵa jetti. Qábiletli oqıwshı hám studentler abıraylı pán olimpiadalarında 434, jas sportshılar xalıqaralıq jarıslarda 2 mıń 245 medaldı qolǵa kirgizdi.

Mámleketimiz basshısı búgingi global báseki sharayatında mámleketlerdiń ústinligi, bárinen burın, bilim, texnologiya hám insan kapitalı menen belgilenetuǵınına itibar qarattı.
– Bilińler, endi mámleketler aymaǵı menen emes – bilimi menen, xalıqtıń sanı menen emes – texnologiyası menen, tábiyiy baylıqları menen emes – insan kapitalı menen básekilese baslaydı. Ilim hám oy-pikir jemisi bolǵan jańa ekonomika – bilimler ekonomikası sheshiwshi kúshke aylanıp barmaqta,-dedi Prezidentimiz.

Mámleketimiz basshısı jaslardı ullı ata-babalarımızǵa múnásip miyrasxor bolıwǵa, Jańa Ózbekstanda Úshinshi Renessans tiykarın jaratıwǵa shaqırdı.

Ushırasıwda Prezidentimiz Ózbekstan milliy saylandı komandasınıń futbol boyınsha jáhán chempionatındaǵı qatnasıwına da toqtap ótti. Futbolshılarımız kúshli qarsılaslar menen oyınlar arqalı úlken tájiriybe arttırǵanı, Abbos Fayzullaev hám Eldor Shomurodovtıń jáhán chempionatındaǵı dáslepki golları xalqımızǵa quwanısh baǵıshlaǵanı atap ótildi.
– Watanımızdıń abırayın qorǵaǵan saylandı komandamız aǵzalarına artıqsha sezim menen narazılıq bildiriw, olardan ayıp izlew xalqımızǵa tán is emes. Kerisinshe, búgin olardı qollap-quwatlaw, ruwxın kóteriw hár qashanǵıdan da áhmiyetli, – dedi Prezidentimiz.

Úlken jeńisler ele aldında ekeni, bunıń ushın balalar futbolına itibar kúsheytilip, futbol ulıwma milliy háreketke aylandırılatuǵını, kelesi jılı yanvar ayında Saudiya Arabstanında bolıp ótetuǵın Aziya kubogine tayarlıq házirden baslanatuǵını atap ótildi.
Prezidentimiz jaslardıń turmısta múnásip orın tabıwı ushın bilim, kásip hám texnologiyanı eń áhmiyetli súyenish sıpatında kórsetti.

Usı maqsette hár jılı 500 mıń ul-qızdı zamanagóy kásipke oqıtıwǵa qaratılǵan “Keleshek bilimleri ekosisteması” jolǵa qoyıladı. Oqıw orayların shólkemlestiriw tilegindegi jaslarǵa jeńilletilgen shártlerde jer hám mámleketlik obektler beriledi, zárúr infrastruktura mámleket esabınan jaratıladı, oraylardı qurıw hám úskenelew ushın kredit stavkası kompensaciyalanadı.

Qolında kásibi bar, biraq jańa kónlikpelerdi iyelewdi qálegen jaslar ushın “kásip vaucher”i engiziledi. Hár jılı 50 mıń jastıń zamanagóy kásiplerdi úyreniw qárejetleri procentsiz ssuda esabınan qaplanadı. Járdemge mútáj shańaraqlardaǵı 85 mıń jumıssız jasqa jeke menshik oqıw oraylarında kásip iyelewi ushın biypul vaucher beriledi. Usı jıldıń ózinde bul sistema ushın 120 milliard sum ajıratıladı.

Texnikumlarda jeke menshik sektordıń qatnasıwı keńeytilip, licenziya talapları ápiwayılastırıladı. Jańa oqıw jılınan jeke menshik texnikumlarǵa da kásipke oqıtıw boyınsha mámleketlik grant ajıratıladı. Xalıqaralıq kásiplik tańlawlardıń jeńimpazları hám olardıń ustazları aqshalay sıylıqlar menen xoshametlenedi.

Shet tillerin jetik biletuǵın 650 mıńnan aslam jastıń potencialınan elimizdiń bay tariyxı, mádeniy miyrası, turizm hám eksport imkaniyatların xalıqaralıq maydanda úgit-násiyatlawda paydalanıw áhmiyetli ekenligi atap ótildi. Usı maqsette Sanlı kontent platforması iske qosılıp, hár jılı 20 milliard sumnan ajıratıladı.

Sırt elde bilim alıp atırǵan jaslar menen islesiw boyınsha da jańa sistema jaratıladı. Jetekshi sırt el joqarı oqıw orınlarında oqıp atırǵan 14 mıńnan aslam jigit-qızlar dem alıs dáwirinde elimizdegi ministrlik, hákimlik, mámleketlik hám jeke menshik kompaniyalarda ámeliyat hám stajirovka ótewi ushın sanlı baylanıs platforması iske qosıladı. “El-yurt umidi”qorı arqalı jaslardı jeke menshik sektor buyırtpası tiykarında da abıraylı sırt el joqarı oqıw orınlarında oqıtıw imkaniyatı jaratıladı.

Prezidentimiz joqarı oqıw ornı pitkeriwshisin jumısqa alǵan isbilermenler ushın jas qánigege dáramat hám sociallıq salıq bir jıl dawamında 1 procent etip belgilenetuǵının járiyaladı. Bul 200 mıńǵa shamalas pitkeriwshini jumısqa jaylastırıw ushın áhmiyetli stimul boladı.

Ata-ana qaramaǵınan ayırılǵan, áskeriy xızmet, migraciya hám jazanı ótep qaytqan, fizikalıq imkaniyatı sheklengen jaslardı qollap-quwatlaw ushın “Kepillengen birinshi qádem” paketi engiziledi. “Ustaz – student” baǵdarlaması tiykarında jámlespegen jaslarǵa járdem bergen studentler de xoshametlenedi.

Sonday-aq, “Jaslar mini-franshizası” baǵdarlaması iske qosıladı. Jergilikli brendlerdiń franshizasın alatuǵın jigit-qızlarǵa Jaslar isbilermenligi qorınan 300 million sumǵa shekem procentsiz ssuda ajıratıladı. Bul baǵdarlamalar ushın 500 milliard sum qaratıladı.

Jaslar ushın kásip hám til úyreniw, jumısqa jaylasıw, isbilermenlik boyınsha xızmetlerden “bir ayna” principi tiykarında paydalanıw imkaniyatın beretuǵın “Jaslar xabları” shólkemlestiriledi. Bul tájiriybe Surxandáryadan baslanıp, basqıshpa-basqısh basqa aymaqlarda da engiziledi.

Mámleketlik basqarıwda jaslarǵa isenimdi kúsheytiw maqsetinde 5 baǵdarda “TOP-100” baǵdarlaması ámelge asırıladı. Jeńimpazlar sıylıqlanıp, basshılıq lawazımlarına usınıs etiledi. Hár bir ministrlik hám tarmaq óz baǵdarında qábiletli jaslardı tańlap, xalıqaralıq shólkemlerge stajirovkaǵa jiberedi. Jılına 2 mıń jastı usınday stajirovkalarǵa jiberiw rejesi islep shıǵıladı.
Jaslardı xoshametlew hám birden-bir maqset átirapında birlestiriw ushın “Ózbekstan jaslar ligası” platforması iske qosıladı.

Onda jaslardıń bilimlendiriw, kásip, isbilermenlik, ilim hám jámiyetlik jumısındaǵı nátiyjeleri bahalanadı. Joqarı nátiyjege eriskenlerge grant, kontraktqa shegirme, kásiplik vaucher, jeńilletilgen kredit, sırt elde stajirovka, kadrlar rezervine kiriw hám ipoteka boyınsha imkaniyatlar beriledi.

Jaslar isbilermenligin rawajlandırıwda Bank-finans akademiyası “aqıl orayı” sıpatında belgilenedi. Akademiya tıńlawshıları aymaqlarda tayar biznes joybarlardı qáliplestiredi, Jaslar isbilermenligi qorı bolsa olardı qolaylı shártlerde jaslarǵa usınadı. Qor joqarı dáramat hám kóplegen jumıs orınların jaratatuǵın joybarlarǵa 5 milliard sumǵa shekem investiciya kirgizedi. Bul sistema keminde 300 mıń jasqa óz biznesin baslaw ushın jol ashadı.

Innovaciyalıq startaplardı qollap-quwatlaw boyınsha da jańa wazıypalar belgilendi.
– Biz 2030-jılǵa shekem ekonomika kólemin 240 milliard dollardan arttırıwdı rejelestirgenbiz. Oǵan erisiw ushın barlıq tarawlarǵa jańa ideya alıp keletuǵın innovaciyalıq startaplar kerek,-dedi mámleketimiz basshısı.

Keyingi toǵız jılda jergilikli startap ekosisteması 15 esege ósip, 4 milliard dollardan artqanı, 1 mıń 200 den aslam perspektivalı startap joybarlar payda bolǵanı atap ótildi. Endi hár bir ministr, tarmaq basshısı hám hákim “1 mıń máselege – jaslardan 1 mıń sheshim” joybarın iske qosadı. Jaslar isleri agentligi biznes, málimleme texnologiyaları hám kreativlik ekonomika baǵdarındaǵı 100 eń jaqsı joybarǵa 1 milliard sumǵa shekem investiciya kirgizedi.

Málimleme texnologiyaları hám jasalma intellekt tarawında jaslar ushın jáne de keń imkaniyatlar jaratıladı. Sanlı húkimet orayında birinshi superkompyuter klasteri iske qosıldı, kelesi jılı onıń quwatlılıǵı 3 esege arttırıladı. Usı jılı 20 joqarı oqıw ornında jasalma intellekt laboratoriyaları shólkemlestiriledi. Jaslar bul imkaniyatlardan biypul paydalanıp, aymaq hám tarmaqlardaǵı mashqalalarǵa sheshimler islep shıǵadı.

Jańa IT parkler qurılıwı esabınan 20 mıńnan aslam jigit-qızlar ushın joqarı dáramatlı jumıs orınları jaratıladı. “Meniń birinshi kompyuterim” baǵdarlaması arqalı járdemge mútáj shańaraqlardaǵı 10 mıń jasqa noutbuk satıp alıwı ushın járdem beriledi.
IT hám jasalma intellekt baǵdarlarında bilim alıp atırǵan studentler ushın “dual bilimlendiriw” keńeytiledi. Muhammad al-Xorezmiy atındaǵı mámleketlik stipendiya hám qábiletli qızlar ushın “Injener qızlar” stipendiyası shólkemlestiriledi. Xalıqaralıq olimpiadalar jeńimpazlarına berilip atırǵan 1 milliard sum muǵdarındaǵı xoshamet jasalma intellekt boyınsha xalıqaralıq olimpiada jeńimpazlarına da engiziledi.

Jaslar qálbinde milliy ruwxtı bekkemlew, sanlı mákanda milliy kontentti kóbeytiw maqsetinde IT parklerde kompyuter hám mobil oyınlar jaratıwshılar ushın inkubaciyalıq oraylar ashıladı. Hár jılı milliy ruwxtaǵı keminde 20 kompyuter hám mobil oyın jaratıw boyınsha mámleketlik buyırtpa beriledi.
– Biz jaslarǵa jaratıp berip atırǵan imkaniyatlardan hesh bir ul-qızımız shette qalmawı kerek, – dedi Prezidentimiz.
Usı maqsette “Watan mehri – sociallıq baslamalar” tańlawı, sociallıq qáwip toparındaǵı balalardı qollap-quwatlawǵa qaratılǵan “Qanat” joybarı jolǵa qoyıladı. “Jaslar baslamaları marafonı”nda alǵa qoyılǵan ideyalardı ámeliy joybarǵa aylandırıw ushın “Baslamalar ofisi” shólkemlestiriledi hám bul jumıslarǵa 50 milliard sum ajıratıladı.

Ushırasıwda náshebentlik hám psixotrop zatlar menen baylanıslı jınayatlar jaslardıń keleshegi hám millet genofondına úlken qáwip tuwdırıp atırǵanı da atap ótildi.
– Bul illettiń jaslarımız arasında tamır jayıwına hasla jol qoymaymız, bul báleni tamırı menen qurıtpaǵansha toqtamaymız. Náshebentlik insannıń eń bahalı baylıǵı – densawlıǵı, aqıl-iradası, arzıw-maqsetlerinen ayıradı. Umıtpań, ómir adamǵa bir márte beriledi. Bunday illetlerge mawasasız bolıń, ómirdiń hár bir minutın iygilikli islerge jumsań, – dedi mámleketimiz basshısı.

Prezidentimiz ata-analarǵa da múrájat etip, perzenttiń kamalǵa keliwi, onıń aydın keleshegi ushın bekkem tiykar, bárinen burın, shańaraqta jaratılatuǵının atap ótti. Ata-analardı búgingi tez ózgerip atırǵan qıyın sharayatta perzent tárbiyasına hár qashanǵıdan da itibarlı hám juwapkershilikli bolıwǵa shaqırdı.

Ushırasıwda jaslar menen ashıq pikirlesiw bolıp ótti. Olar ózleriniń usınıs hám baslamaların bildirdi.
Mámleketimiz basshısı sóylesiw juwmaǵında jigit-qızlardı úlken sheklerge qaray isenimli umtılıwǵa, bilim, kásip hám zamanagóy texnologiyalardı puqta iyelewge shaqırdı.
– Men sizlerdegi kúsh-ǵayrat, bilimge qushtarlıq hám jańalıqqa umtılıwdı kórip, bárqulla ruwxlanaman. Úlken-úlken sheklerge qaray alǵa qádem taslań, oqıń, jańa bilim, jańa kásip hám zamanagóy texnologiyalardı iyeleń, qıyınshılıqtan qorıqpań, miynetten, úyreniwden hám umtılıwdan hesh qashan toqtamań!

Sonı biliń, artıńızda sizlerdi úlken arzıw-niyetler menen kamalǵa keltirgen ata-anańız, sizlerge bilim hám tárbiya bergen, kásip úyretken ustaz hám trenerlerińiz, sizlerge isenip, bárqulla qollap-quwatlap kiyatırǵan xalqımız, Prezident tawday súyenish bolıp turıptı! – dedi Prezident Shavkat Mirziyoev.

Ózbekstan Respublikası Prezidentiniń 29-iyundegi pármanı hám qararına muwapıq, óziniń bilimi, talantı, intakerligi hám pidayılıǵı menen Jańa Ózbekstannıń rawajlanıwına múnásip úles qosıp atırǵan bir topar jaslar “Kelajak bunyodkori” medalı hám “Mard wǵlon” mámleketlik sıylıǵı menen sıylıqlanǵan edi.

30-iyun – Jaslar kúninde Tashkenttegi Olimpiada qalashasında áne, usı sıylıqlardı tapsırıw máresimi boldı.
Mámleketimiz basshısı elimiz jaslarınıń hár birinde úlken potencial, talant hám qábilet bar ekenligin atap ótti.
– Sizler óz dáwirinde ullı oylap tabıwları menen dúnya civilizaciyasına úlken úles qosqan, Birinshi hám Ekinshi Renessanstıń “aqıl shıraǵı” bolǵan ullı ata-babalarımızdıń múnásip miyrasxorısız. Álbette, miyrasxorlıq tek ǵana maqtanısh emes, miyrasxorlıq bul úlken juwapkershilik!

Ata-babalarımız insaniyat rawajlanıwı ushın qanday ullı isler islegen bolsa, sizler Jańa Ózbekstanda jańa oyanıw dáwiri – Úshinshi Renessans tiykarın jaratatuǵın kúsh bolıwıńız kerek, – dedi Shavkat Mirziyoev.
Bunnan soń Prezidentimiz jaslarǵa mámleketlik sıylıqlardı tapsırdı.
– Pútkil xalqımız atınan búgingi mámleketlik sıylıqlardıń iyelerin jáne bir márte qutlıqlayman. Bul joqarı tán alıw sizlerdi jańa sheklerge baslasın, qatarıńız jáne de keńeye bersin, – dedi Ózbekstan jetekshisi.

Sıylıqlanǵan jaslar mámleketimiz tárepinen jaratılıp atırǵan imkaniyatlar ushın minnetdarshılıq bildirip, bunnan bılay da óz bilimi, miyneti hám baslamaları menen Watanımızdıń rawajlanıwına múnásip úles qosıwǵa tayar ekenin atap ótti.

Usı kúni Olimpiada qalashasında Jaslar kúni múnásibeti menen koncert baǵdarlaması shólkemlestirildi.