Paytaxt ekonomikasında qosımsha ósiw noqatları belgilendi

Májiliste búgingi kúnde dúnyadaǵı siyasiy hám áskeriy kelispewshilikler, sırtqı bazarlardaǵı ózgerisler eksport shınjırları hám ónim jetkerip beriw múddetlerine unamsız tásir kórsetiwi múmkin ekeni atap ótildi. Bunday sharayatta qosımsha rezervlerdi anıqlap, olardı jedel iske qosıw tiykarǵı wazıypa ekeni kórsetip ótildi.

Paytaxt milliy ekonomikada ayrıqsha orın iyeleytuǵını atap ótildi. Búgingi kúnde Tashkent qalası jalpı ishki ónimniń 21 procentin támiyinlemekte. Bıyılǵı jıl “Paytaxtta jedel rawajlanıw hám xalıqtıń dáramatlarınıń ósiw jılı” dep járiyalanıp, qala ekonomikasın 12 procentke arttırıw, 3,6 milliard dollarlıq eksporttı támiyinlew, 9 milliard dollar investiciya tartıw hám 616 mıń xalıqtıń bántligin támiyinlew sıyaqlı úlken shekler belgilengen.

Usı múnásibet penen qala hákimligi, onıń 12 orınbasarı hám 12 rayon hákimi proaktiv jumıs shólkemlestirip, sanaat, eksport, investiciya hám turizm tarawlarındaǵı itimallı tómenlewlerdiń aldın alıwı zárúr ekenligi atap ótildi. Prezidentimiz bunıń ushın paytaxtta miynet resursları da, qarjı imkaniyatları da jeterli ekenin atap ótti.

Májiliste usı jılı jańasha qatnas tiykarında qalanıń 12 rayonı anıq bir sanaat yamasa xızmet kórsetiw tarmaǵına qánigelestiriletuǵını atap ótildi.

Sonıń ishinde, Bektemir rayonı ximiya sanaatı hám kótere sawdaǵa, Mırza Ulıǵbek rayonı kabel sanaatı, ilim, bilimlendiriw hám málimleme texnologiyalarına, Mirabad rayonı azıq-awqat sanaatı, turizm hám ulıwma awqatlanıwǵa, Uchtepa zergerlik, turmıslıq xızmet hám usaqlap satıwǵa, CHilanzar farmacevtika, sawda, xızmet kórsetiw hám sportqa, Shayxontohur mebel qurılısı hám gastroturizmge, Yunusabad qaǵaz sanaatı hám turizmge, Yashnabad elektrotexnika hám transport-logistikaǵa, Yakkasaray jeńil sanaat hám finanslıq xızmetlerge, Yangihayot avtomobil qurılısı hám logistikaǵa, Almazar qurılıs materialları sanaatı hám bilimlendiriwge, Sergeli bolsa metallurgiya, logistika hám avtoservis tarawlarına baǵdarlanadı.

Tashkent qalasında standart emes usınıslar islep shıǵıw maqsetinde sońǵı eki hápte dawamında 23 mıńnan aslam isbilermenler menen ushırasıwlar ótkerilgeni, 1 mıń 300 den aslam mashqala anıqlanǵanı, sonday-aq, isbilermenler tárepinen 162 jańa usınıs hám baslama bildirilgeni málim etildi. Bul usınıs hám mashqalalardıń hesh biri itibardan shette qalmawı kerek ekenligi atap ótildi.

Sonday-aq, paytaxtta arnawlı investiciya hám isbilermenlik ortalıǵın engiziw arqalı jańa tájiriybe jaratılatuǵını belgilendi. Sonıń ishinde, biznes ushın ruqsatnama hám licenziyalar beriw wákilligin tiyisli ministrlikler hám uyımlardan olardıń aymaqlıq bólimlerine túsiriw, eksportshı kárxanalardı qollap-quwatlawdıń jańa qatnasların engiziw, isbilermenlerdiń logistikaǵa baylanıslı mashqalaların jedel sheshiw sistemasın jolǵa qoyıw, aylanıs qarjı menen támiyinlew hám biznesti keńeytiw ushın qolaylı shártlerde qarjılandırıwdıń jańa mexanizmlerin islep shıǵıw názerde tutılǵanı atap ótildi.

Isbilermenler kótergen mashqala hám usınıslardı jedel sheshiw ushın óz aldına Muwapıqlastırıwshı keńes dúziw usınıs etildi. Oǵan rayonlardı drayver tarawlar tiykarında rawajlandırıw, ekonomikalıq hám sociallıq konyunkturanı turaqlı monitoring etiw, ósiw noqatları hám paydalanılmay atırǵan rezervlerdi anıqlaw, sistemalı tosqınlıqlardı saplastırıw, ideya hám baslamalardı qáliplestiriw, olardı qarjılandırıw hám orınlanıwın qadaǵalaw wazıypaları júklenedi.

Ulıwma, barlıq imkaniyatlardı jumsap, qosımsha 88 trillion sumlıq ónim islep shıǵarıw, 4,9 milliard dollarlıq eksporttı támiyinlew hám 5 milliard dollar investiciya tartıw, byudjetke 2,9 trillion sum túsim támiyinlew, 65,5 mıń joqarı dáramatlı hám turaqlı jumıs orınların shólkemlestiriw boyınsha anıqlanǵan jańa rezervlerdi iske qosıw wazıypası qoyıldı.

Sonday-aq, usı jılı Tashkent qalasına qosımsha 500 million dollar tartıw maqsetinde paytaxt evrobondların shıǵarıw usınıs etildi.
Paytaxt isbilermenlerin Tashkent, Nawayı, Qashqadárya, Ándijan, Buxara hám Ferǵana wálayatlarındaǵı iri sanaat kárxanaları menen baylanıstırıp, lokalizaciyalaw hám kooperaciyanı keńeytiw boyınsha baǵdarlamanı tastıyıqlaw tapsırıldı.

Keleshekte iri xalıqaralıq konsalting kompaniyaların tartqan halda Tashkent qalasınıń ekonomikasın tereń tallaw hám rawajlandırıw strategiyasın islep shıǵıw zárúrligi atap ótildi.