Qashqadárya wálayatın rawajlandırıw boyınsha tiykarǵı wazıypalar dodalandı

Qashqadárya óziniń úlken aymaǵı, bay tábiyǵıy resursları, rawajlanǵan sanaatı, miynetkesh hám isbilermen xalqı menen úlken potencialǵa iye ekeni atap ótildi.

Ótken jılı jalpı aymaqlıq ónimde 6,8 procent, sanaatta 7,2 procent, xızmetler tarawında 13,6 procent, awıl xojalıǵında 4,3 procentlik ósiw júz berdi. 2017-2025-jıllarda xalıqtıń jan basına jalpı aymaqlıq ónimniń kólemi 3,2 esege ósip, 26,9 million sumǵa jetti. Jumıssızlıq hám kámbaǵallıq dárejesi sáykes túrde 4,9 hám 6,5 procentke tústi.

2026-jılı ekonomika tarmaqlarında jańa joybarlardı ámelge asırıw esabınan sanaatta 8,6 procentlik ósiwdi támiyinlew, 3,5 milliard dollar investiciya esabınan 727 million dollarlıq ónim eksport etiw rejelestirilgeni atap ótildi. Nátiyjede wálayat ekonomikası 8,2 procentke, xızmetler 15,9 procentke, qurılıs 13,2 procentke, awıl xojalıǵı 5,8 procentke ósiwi kútilmekte.

Sanaatta 1,7 milliard dollarlıq 195 joybardı iske qosıw, óndiris quwatlıqların keńeytiw hám mikro sanaat orayların shólkemlestiriw arqalı tarmaqlarda joqarı ósiw pátlerin támiyinlew zárúr ekenligi atap ótildi.

Wálayatta bir qatar iri sanaat joybarların ámelge asırıw rejeleri haqqında málimleme berildi. Sonıń ishinde, gezleme, kiyim-kenshek hám gigienalıq qurallar, awıl xojalıǵı texnikası hám úskeneleri, elektromobiller ushın quwatlandırıw stanciyaları, fibrocement paneller hám diywal plitaların islep shıǵarıw quwatlıqların shólkemlestiriw názerde tutılǵan.

Sonday-aq, Múbárek arnawlı innovaciyalıq sanaat zonasın hám Qarshı jasıl texnologiyalar sanaat zonasın shólkemlestirip, 2026-2027-jıllarda olarda 1,1 milliard dollardan aslam bolǵan 36 joybardı ámelge asırıw hám 6 mıńǵa shamalas jańa jumıs ornın jaratıw rejelestirilgen.

Jańa kózqaraslar tiykarında máhállelerdi tereń hám orta qánigelestiriw, jeńilletilgen kredit hám subsidiyalar ajıratıw esabınan kámbaǵallıqtı qısqartıw zárúr ekenligi kórsetip ótildi. Atap aytqanda, máhállelerde 820 milliard sumlıq kreditler, 52,3 milliard sumlıq ssuda hám subsidiyalar ajıratıw, ózin-ózi bánt etkenlerdi qollap-quwatlaw arqalı 48 mıń isbilermenlik subekti shólkemlestiriledi, 31 mıń mikrojoybar ámelge asırıladı.

Nátiyjede 2026-jıldıń aqırına shekem jumıssızlıqtı 3,2 procentke, kámbaǵallıqtı 3 procentke túsiriw, onda Ǵuzar, Qamashi, Kókdala, Mirishkor, Shahrisabz hám Yakkabaǵ rayonların kámbaǵallıq hám jumıssızlıqtan jıraq aymaqqa aylandırıw maqset etilgen.

Dúnyada gósh bahaları artıp baratırǵan házirgi sharayatta wálayatta sharwashılıq hám ot-jem bazasın bekkemlew, jaylaw jerlerinen únemli paydalanıw boyınsha jańa sistema engizilip atırǵanı atap ótildi.

Onda 2030-jılǵa shekem 200 mıń gektar, sonıń ishinde, 2026-jılı 15 mıń gektar jerdi ózlestiriw, infrastruktura menen támiyinlew arqalı azıqlıq eginler, kartoshka, ovoщ, sobıqlı hám maylı ósimlikler jetistiriw kólemlerin arttırıw wazıypası qoyıldı.

Usı jılı ǵálle zúráátliligin ortasha 84,8 centnerge, paxta zúráátliligin 47,5 centnerge, kartoshka zúráátliligin 175 centnerge shekem arttırıw rejelestirilgen. Sonday-aq, 48 ǵálle kombaynı, 272 shigit egiw seyalkasın satıp alıw, suwdı únemleytuǵın texnologiyalardı hám zamanagóy agrotexnologiyalardı engiziw esabınan awıl xojalıǵında dáramattı 20-35 procentke arttırıw imkaniyatı bar ekenligi kórsetip ótildi.

Suw támiynatı Qashqadárya ushın eń awır máselelerden ekeni atap ótildi.

Eginlerdiń úlken bólegi nasos arqalı suwǵarılatuǵın sharayatta 2026-jılı 320 kilometr magistral hám 3,3 mıń kilometr ishki kanallardı betonlaw, 70,6 mıń gektarda suwdı únemleytuǵın texnologiyalardı engiziw, 27,4 mıń gektarda lazerli tegislew jumısların ámelge asırıw jáne 16 nasos stanciyasın modernizaciyalaw wazıypaları belgilendi. Bul arqalı 800 million kub metrge shekem suw únemleniwi kútilmekte.

Ishimlik suwı támiynatın jaqsılaw maqsetinde Hisorak suw saqlaǵıshınan Qarshı qalasına suw tartıw joybarı islep shıǵılıp atırǵanı málim etildi. Bul joybar sheńberinde 16 ishimlik suwı obekti hám 416 kilometr tarmaq qurıladı. Qarshı hám Shahrisabz qalaları, Diyqanabad hám Qamashi rayonlarındaǵı kanalizaciya tarmaqları rekonstrukciyalanadı.

Turizm potencialın tolıq iske qosıw boyınsha jılına 1 million turistti tartıp atırǵan Miraki qalashasınıń tájiriybesi tiykarında jańa joybarlardı qalǵan rayonlarda da keńeytiw zárúr ekenligi atap ótildi.

Qamashi rayonında “Maydanak” biyik taw turizm orayın shólkemlestiriw, Shahrisabz rayonında bir waqıttıń ózinde 13 mıń sayaxatshıǵa xızmet kórsetetuǵın “Ǵelon” xalıqaralıq ulıwma máwsimlik kurortın qurıw, Yakkaboǵ rayonı Tatar awılında turizmdi rawajlandırıw, Házireti Sultan shoqqısı aymaǵında treking baǵdarları hám shatırlı úyler dem alıw ornın shólkemlestiriw joybarları usılardıń qatarına kiredi.

Ulıwma, usı jılı 45 miymanxana hám miyman úyi shólkemlestirilip, qosımsha 1130 orın jaratılatuǵını belgilendi.

Wálayatta jol, turaq jay hám injenerlik-kommunikaciya infrastrukturasın jaqsılaw boyınsha da anıq baǵdarlamalar dodalandı. “Jańa Ózbekstan” kórinisindegi 2 rayon hám 46 máhállede, sonday-aq, awır kategoriyadaǵı 3 rayon hám 108 máhállede ishki jollar, suw támiynatı, suwǵarıw infrastrukturası jáne elektr tarmaqların jaqsılaw ushın jámi 864 milliard sum qarjı qaratılatuǵını belgilendi.

Sociallıq baǵdarda shańaraq hám hayal-qızlardı qollap-quwatlaw, densawlıqtı saqlaw sistemasın rawajlandırıw boyınsha kórsetkishler belgilendi. Sonıń ishinde, jańa mámleketlik hám jeke menshik baqsha, mektepler shólkemlestiriw, 120 mıń hayal-qızlardıń bántligin támiyinlew, 21,1 mıńın kásip-óner hám isbilermenlikke oqıtıw, “Hayal-qızlar dápteri” arqalı 102 mıńǵa járdem kórsetiw ilajları názerde tutılǵan.

Germaniya menen birgelikte tártipli miynet migraciyası hám kásiplik tayarlaw boyınsha jańa baslamalar usınıldı. 2026-jılı 3000, 2027-jılı 5000 jastı Germaniyaǵa jumısqa baǵdarlaw, olardı oqıtıw ushın Qarshı qalasında Bilimlendiriw hám texnologiyalar orayın ashıw rejelestirilgen.

Májilis juwmaǵında mámleketimiz basshısı belgilengen wazıypalardıń orınlanıwın qatań qadaǵalawǵa alıw, investiciya hám eksport kórsetkishlerin támiyinlew, jańa jumıs orınların jaratıw jáne xalıqtıń turmıs dárejesin arttırıw boyınsha juwapkerlerge anıq tapsırmalar berdi.