Joqarı ekonomikalıq ósim pátlerin támiyinlew boyınsha wazıypalar belgilep alındı

Májilis aldında ótken jılǵı makroekonomikalıq nátiyjeler atap ótildi. Mámleketimizdiń jalpı ishki óniminiń kólemi 7,7 procentke ósip, 147 milliard dollardan astı. Ekonomikalıq ósimniń yarımınan kóbi xızmetler esabınan támiyinlendi. Awıl xojalıǵında gektarınan ortasha dáramat 4,5 mıńnan 5 mıń dollarǵa kóbeydi, miynet ónimdarlıǵı 4,7 procentke arttı.

Ekonomikaǵa aldınǵı, energiyanı únemleytuǵın texnologiyalar kirip kiyatırǵanı hám joqarı qosımsha qun beretuǵın joybarlar kóbeyip atırǵanı nátiyjesinde bir jıl ishinde bir dollarlıq qosımsha qun jaratıwǵa jumsalǵan energiya qárejetleri 15 procentke azaydı.

Prezidentimiz 2026-jıl ushın belgilengen kórsetkishlerge toqtap ótip, 6,6 procentlik ekonomikalıq ósim arqalı jalpı ishki ónim kólemin 167 milliard dollarǵa jetkeriw rejesi geosiyasiy jaǵday hám ekonomikalıq ózgerislerdi esapqa alǵan halda qáliplestirilgen itibarlı prognoz ekenin atap ótti.

Sonıń menen birge, hár bir ministr, hákim hám tarmaq basshısı tarawǵa jańasha basqarıw usılın alıp kirip, resurslardan nátiyjeli paydalansa, dástúriy eksport bazarlarına baylanıp qalmastan, jańa baǵdarlar ashsa, sanlastırıw hám jasalma intellekt boyınsha qánigelerdi jámlep, innovaciyalar kirgizse, jaslardı tartıp, “startap klublar” shólkemlestirse, ekonomikalıq ósimdi bunnan bılay da joqarı pátlerde támiyinlew ushın barlıq imkaniyatlar bar ekenligi kórsetip ótildi.

Májiliste strategiyalıq kárxanalardıń nátiyjeliligi hám qárejetlerdi qısqartıw máseleleri de hár tárepleme dodalandı.
Milliy investiciya qorın basqarıwǵa tartılǵan. “Franklin Templeton” kompaniyasınıń tallawına bola, korporativ mádeniyattı kúsheytiw, logistika, sanlastırıw hám energiya nátiyjeliliginde úlken rezervler bar ekenligi atap ótildi. 19 strategiyalıq kárxana basshılarına satıp alıw sisteması, logistika, sanlastırıw hám energiya nátiyjeliligi boyınsha keskin ilajlar kórip, ózine túser bahanı 10-15 procentke qısqartıw wazıypası qoyıldı.
– Únemlew rejesi óndiristi qısqartıwdıń esabınan emes, al ónimniń ózine túser bahasın qısqartıw arqalı támiyinleniwi shárt,-dedi

Prezidentimiz.
Sonday-aq, strategiyalıq kárxanalardı “Birden-bir ǵaznaxana” málimleme sisteması menen qamtıp alıw, satıp alıwlardı risk-tallaw tiykarında kategoriyalastırıw arqalı nátiyjesiz qárejetlerge shek qoyıw áhmiyetli ekenligi atap ótildi.

Aymaqlıq sanaattı rawajlandırıwdaǵı kemshilikler keskin sınǵa alındı. Úsh jılda respublika sanaatı 21 procentke ósken bolsa da, bir qatar rayonlarda bul kórsetkish 10 procentke de jetpegeni, ayırım aymaqlarda kredit resursları hám investiciyalardıń ósimi sanaattıń ósimine sáykes tásir kórsetpey atırǵanı kórsetip ótildi.

Wálayat hákimleriniń birinshi orınbasarlarına 12 rayonǵa barıp, bir ay ornında islew, óndirisi tómenlegen kárxanalardı “ayaqqa turǵızıw” hám bul rayonlarda sanaattıń ósiwin támiyinlew wazıypası qoyıldı.
Ulıwma, respublika sanaatın keminde 8,5 procentke ósiriw boyınsha tarmaq hám aymaqlar boyınsha rejelerdi tastıyıqlaw, birinshi sherek juwmaǵında anıqlanǵan mashqalalar hám olardıń sheshimine qarap, basshılardıń jumısına baha beriw belgilendi.

Elimizde jılına 650 mıń dana avtomobil islep shıǵarıw quwatlılıǵına iye 4 iri kárxana bar ekenligi, usı jılı 300 den aslam jergilikli kárxanalar menen kooperaciya tiykarında jáne 763 detal islep shıǵarıwdı baslaw jáne avtomobil islep shıǵarıwdı 510 mıńǵa jetkeriw zárúr ekenligi atap ótildi. Xalıqtıń talabın xoshametlew maqsetinde avtokredit stavkaların tómenletiw hám kólemin arttırıw ilajların kóriw tapsırıldı.

Investiciyalardı tartıw hám joybarlardı nátiyjeli ámelge asırıw boyınsha jańa basqarıw kózqarasları belgilendi.
Usı jılı 50 milliard dollar sırt el investiciyasın alıp keliw rejesi qoyılǵanı, jańa joybarlar birinshi gezekte joqarı qosımsha qunlı hám eksportqa jaramlı ónim islep shıǵarıwǵa, resurslardan nátiyjeli paydalanıw hám joqarı dáramatlı jumıs orınların jaratıwǵa xızmet etiwi zárúr ekenligi atap ótildi.

Ministrler hám hákimlerge 2026-jılǵı investiciyalıq baǵdarlamaǵa kirgizilip atırǵan hár bir joybardıń bazarı, eksportı, qosımsha qunı hám jaratatuǵın jumıs orınların tolıq tallaw tapsırıldı.

Endi investiciyalıq joybarlar menen islesiwde joybardı iske túsiriw menen sheklenip qalmastan, onıń tolıq islewi, joqarı qosımsha qun jaratıwı hám sırtqı bazarǵa shıǵıwı boyınsha da qatań qadaǵalaw ornatıladı. Usı maqsette baǵdarlamaǵa kirgen hár bir joybardı iske qosılǵannan keyin úsh jıl dawamında monitoring etetuǵın “Birden-bir milliy joybar basqarması” platforması jaratıladı.

Ótken jılı hár qıylı shólkemlestiriw mashqalaları sebepli 55 iri joybar keshigip qalǵanı atap ótilip, bıyıl bahası 165 milliard dollarlıq 377 strategiyalıq joybar ayrıqsha qadaǵalawǵa alınatuǵını belgilendi.
Sonday-aq, sırt el saparları sheńberinde 135 milliard dollarlıq kelisimlerge erisilgeni, usı jıldıń ózinde Túrkiya menen 9 milliard,

Pakistan menen 1 milliard 428 million dollarlıq investiciyalıq kelisimlerge qol qoyılǵanı málim etildi.
Investiciyalardıń kóbeyiwi esabınan qurılıs kólemin arttırıw wazıypası qoyıldı. Juwapkerlerge bıyılǵı qurılıs kólemin 400 trillion sumǵa alıp shıǵıp, tarawda keminde 17 procent ósimdi támiyinlew tapsırıldı. Sociallıq hám óndirislik infrastruktura ushın byudjetten 40 trillion sum ajıratılıp atırǵanı qurılıs, qurılıs materialı, metallurgiya hám elektrotexnika kárxanaları ushın úlken bazar ekeni atap ótildi.

Sonıń menen birge, aymaqlardaǵı “Birden-bir buyırtpashı xızmeti” injiniring kompaniyalarınıń qadaǵalawın kúsheytiw, Qaraqalpaqstan, Samarqand hám Ferǵanada buyırtpashı xızmetlerine tájiriybe tárizinde jeke menshik sektordı tartıw áhmiyetli ekenligi atap ótildi.

Energiya nátiyjeliligin arttırıw máseleleri boyınsha da anıq kórsetpeler berildi.
Kishi hám orta kárxanalardıń jıllıq energiya tutınıwınıń úlkenligin esapqa alıp, bul kategoriyadaǵı kárxanalarda energiya nátiyjeliligi boyınsha jańa sistema engiziletuǵını hám úsh jıllıq baǵdarlama islep shıǵılatuǵını belgilendi. 2026-jılı kishi hám orta kárxanalarda 100 million kub metr gaz hám 500 million kilovatt-saat elektrdi únemlew ilajların kóriw áhmiyetli ekenligi atap ótildi.

Sonday-aq, respublikadaǵı 917 mıń jaqtılandırıw shıraqlarınıń jılına 330 million kilovatt-saat elektr jumsap atırǵanı hám kúndiz de janıp qalıw jaǵdayları ushırasıp atırǵanı kórsetilip, jaqtılandırıw baǵanalarına kishi quyash paneli, batareya hám kúnniń jaqtılanıwına qarap, ózi óship-janatuǵın datchik ornatıwdı baslaw tapsırıldı.

Májiliste mámleketlik satıp alıwlarda jergilikli islep shıǵarıwshılardıń úlesin arttırıw máselesine de ayrıqsha itibar qaratıldı.
Atap ótilgenindey, 300 trillion sumlıq mámleketlik satıp alıwlarda jergilikli ónimlerdiń úlesi 68 procentke jetken bolsa da, Almalıq kombinatı, “Óztransgaz”, “Milliy elektr tarmaqları”, “Uzbekistan Airports” hám “Ózbekstan hawa jolları” sistemalarında bul kórsetkish 40 procentke de jetpey atırǵanı kórsetip ótildi. Sonday-aq, isbilermenler mámleketlik satıp alıw, ekspertiza hám sertifikatlaw processlerinde byurokratiya kóp ekeni, ayırım basshılar bolsa “shet eldiń sapası jaqsıraq” degen eski kózqarastan elege shekem waz keshpey atırǵanın aytpaqta.

Endi ministrler, tarmaq basshıları hám hákimler hár bir joybarda sóylesiw, tender, qurılıs hám shiyki zat támiynatınıń barlıq basqıshlarında jergilikli ónimlerdiń úlesin kóbeytiwge jeke juwapker bolatuǵını belgilendi.
Ekonomikalıq ósimdi sırtqı bazarlardıń esabınan támiyinlew máselesi májilistiń ayrıqsha baǵdarı boldı.

Prezidentimiz “ishki bazardaǵı talaptıń ózi menen joqarı ekonomikalıq ósiwdi támiyinlep bolmaytuǵının” atap ótip, ministrler, tarmaq basshıları hám hákimlerdiń tiykarǵı wazıypası jańa ónimler menen jańa bazarlarǵa kirip barıw bolıwı zárúrligin atap ótti.
Ótken jılı eksport 22 procentke ósip, 24 milliard dollarǵa jetken bolsa da, kóp ǵana basshılar eksportta eski jumıs usılınan waz keshe almay atırǵanı mısallar menen kórsetip ótildi. Endi eksport boyınsha talap tek ǵana kólem emes, al jańa ónim hám jańa bazarlar boyınsha da bolıwı belgilendi.

Ishki bazarda baha turaqlılıǵın támiyinlew, inflyaciyaǵa tásir etiwshi faktorlardı aldınnan anıqlap, ámeliy sheshim tabıw wazıypaları da belgilep berildi.
Yanvar ayında jıllıq inflyaciya 7,2 procentti quraǵanı, inflyaciyanıń 45 procenti azıq-awqat ónimleri esabınan, ásirese, 13 procenti gósh bahası esabınan qálipleskeni atap ótildi.

Ekonomika hám qarjı ministrligi janındaǵı Tarmaq bazarları hám miynet ónimdarlıǵı orayına inflyaciya boyınsha ishki hám sırtqı qáwip-qáterlerdi aldınnan anıqlap barıw, hár hápte rayon hám qala bazarların tallaw, talap prognozın qáliplestiriw jáne hár sherekte tiykarǵı azıq-awqat ónimleriniń balansın islep shıǵıw wazıypası júklendi.

Keyingi hápteden múbárek Ramazan ayı baslanıwı múnásibeti menen ishki bazarlarda bahanıń turaqlılıǵın támiyinlew hár qashanǵıdan da áhmiyetli ekeni atap ótilip, diyqan bazarları hám iri sawda komplekslerinde arzanlasqan azıq-awqat yarmarkaların baslaw boyınsha tapsırma berildi.

Awıl xojalıǵında da bahanıń turaqlılıǵın támiyinlew hám xalıqtıń dáramatların arttırıwǵa qaratılǵan wazıypalar kórsetip ótildi.
Góshte importqa baylanıslılıqtı qısqartıw ushın azıqlıq bazasın bekkemlew zárúr ekenligi atap ótildi. Múbárek rayonında 5 mıń gektar jer paydalanıwǵa kirgizilip, mákke egiw baslanǵanı úlgi sıpatında keltirildi. Usı jılı qosımsha 60 mıń gektarda usı jumıslardı shólkemlestiriw tapsırıldı. Bul arqalı qosımsha 350 mıń qaramal ushın kepillengen ot-jem bazası jaratılatuǵını atap ótildi.

Sonday-aq, ótken jılı 772 mıń tonna kartoshka import etilgeni atap ótilip, usı jılı 4,5 million tonna kartoshka ónimin alıw zárúr ekenligi kórsetip ótildi.
Májiliste tarmaq hám aymaqlar basshılarınıń esabatları tıńlandı.