Qurılıs joybarları tanıstırıldı

Mámleketimizdiń ekonomikalıq ósiwiniń joqarı pátleri, mámleketimizdiń belsendi sırtqı siyasatı sebepli xalıqaralıq birge islesiw keńeyip, elimiz isbilermenlik hám turizm orayına aylanıp atırǵanı infrastrukturanı soǵan sáykes rawajlandırıwdı talap etpekte.

Sonlıqtan, zamanagóy transport tarmaqları, xızmet kórsetiw obektleri hám jámiyetlik imaratlardı qurıwǵa ayrıqsha itibar qaratılmaqta.
Prezentaciyada túrli aymaqlardaǵı qurılıs rejeleri kórip shıǵıldı.

Sonıń ishinde, Xiywa qalasında Kongress orayı hám tariyxıy-etnografiyalıq baǵ qurılısı rejelestirilgen. Bul imaratlar qalada iri xalıqaralıq ánjumanlar ótkeriw hám turistler aǵımın kóbeytiwge xızmet etedi.

Qurılısı rejelestirilgen Konfuciy institutı hám Lu Ban ustaxanasında mádeniy-aǵartıwshılıq ilajlar ótkeriw, jaslardı zamanagóy kásiplerge oqıtıw ushın sharayatlar jaratıladı.

Úrgensh xalıqaralıq aeroportın modernizaciyalaw sheńberinde onıń infrastrukturasın keńeytiw, jolawshılar hám júklerge xızmet kórsetiwdiń sapasın, logistika imkaniyatların arttırıw arqalı aymaqtıń transport potencialın jańa basqıshqa alıp shıǵıw názerde tutılǵan.

Bunnan tısqarı, Úrgensh vokzalınan jańalanǵan aeroportqa óz aldına temir jol liniyasınıń tartılıwı nátiyjesinde jolawshılar ushın qolaylıq jáne de artadı.

Sonday-aq, ámeldegi Úrgensh – Xiywa avtomobil jolın abadanlastırıw hám kóklemzarlastırıw jáne oǵan alternativ bolatuǵın jańa avtomobil jolın qurıw rejeleri tanıstırıldı.

Ferǵana qalasında ekspooray qurıw joybarı da dodalandı. Bul komplekste xalıqaralıq kórgizbeler, biznes forumlar hám iri ilajlar ótkeriw ushın zárúr sharayatlar jaratılatuǵını, bul bolsa aymaqtıń investiciyalıq tartımlılıǵın arttırıwǵa xızmet etetuǵını atap ótildi.
Sonday-aq, Burxaniddin Marǵiloniy ilimiy-izertlew orayın shólkemlestiriw joybarı tanıstırıldı. Orayda ruwxıy miyras hám ilimiy izertlewler baǵdarında xalıqaralıq dárejedegi jumıstı jolǵa qoyıw, zamanagóy ilimiy mektep qáliplestiriw názerde tutılǵan.

Buxara mámleketlik universitetiniń jańa zamanagóy kampusın qurıw boyınsha usınıslar da kórip shıǵıldı. Universitette professor-oqıtıwshılar hám studentler ushın qolaylı bilimlendiriw hám ilimiy ortalıq jaratıw zárúr ekenligine itibar qaratıldı.

Rejelestirilgen joybarlardan biri – Tashkent qalasında zamanagóy kórkem gimnastika kompleksi. Bul orayda jaslardıń talantın júzege shıǵarıw hám professional kórkem gimnastikashılardı tayarlaw ushın zárúr sharayatlar jaratıladı.

Prezidentimiz joybarlardı ámelge asırıwda sapa, qolaylıq hám zamanagóy talaplarǵa qatań ámel etiw, qala qurılısı mádeniyatın arttırıw jáne xalıqtıń talapların esapqa alıw áhmiyetli ekenligin atap ótip, juwapkerlerge tiyisli kórsetpeler berdi.