Prezident: “Hár bir qarar, hár bir xızmet, hár bir process tek ǵana insan mápine xızmet etiwi zárúr”

Forumda Ózbekstan Respublikası hám Birlesken Arab Ámirlikleri húkimetleri, sırt mámleketler hám xalıqaralıq shólkemlerdiń joqarı mártebeli wákilleri, mámleketlik xızmet tarawındaǵı jetekshi ekspertler hám jámiyetlik belsendiler qatnaspaqta.
Mámleketimiz basshısı óziniń shıǵıp sóylegen sózinde ánjumandı shólkemlestiriwdegi járdemi ushın Birlesken Arab Ámirlikleriniń Húkimet isleri boyınsha ministri Muhammad bin Abdulloh al-Gargaviyge shın júrekten minnetdarshılıq bildirdi. Bul mámlekettiń xalqın hám basshılıǵın jaqınlasıp kiyatırǵan áyyyam – Birlesken Arab Ámirlikleri shólkemlestirilgen kún múnásibeti menen qutlıqladı.
– Biz Jańa Ózbekstandı qurıwda “Xalıq mámleketlik uyımlarǵa emes, mámleketlik uyımlar xalqımızǵa xızmet etiwi kerek” degen insanıylıq ideyaǵa ámel etip atırmız, – dedi Prezidentimiz.
Atap ótilgenindey, mámleketimizde xalıq hám biznes ushın byurokratiya, áweregershilik hám basqa da hákimshilik tosqınlıqlardı saplastırıwǵa ayrıqsha áhmiyet qaratılmaqta. Mámleketlik xızmetler kórsetiw milliy sistemasın túpkilikli reformalaw hám sanlastırıw, mámleketlik uyımlardıń jumısın optimallastırıw, xalıq penen mámleketlik uyımlar arasında tikkeley qarım-qatnas ornatıw boyınsha keń kólemli jumıslar ámelge asırıldı.
Keyingi jılları respublikamızda byurokratiyanı qısqartıwǵa qaratılǵan 9 párman hám qarar qabıl etildi. Mámleketlik xızmetler orayları, Birden-bir portal platforması, “Sanlı húkimet” sıyaqlı sistemalardıń shólkemlestiriliwi nátiyjesinde mámleketlik xızmetler xalqımız ushın jáne de qolaylı, operativ hám ashıq-aydın bolmaqta.
Atap aytqanda, 2017-jılı tek ǵana 444 túrdegi mámleketlik xızmetler kórsetilgen bolsa, búgingi kúnde bul kórsetkish 1 mıń 40 qa jetti. Onda kórsetilgen xızmetler sanı derlik 10 esege kóbeyip, 55 millionnan astı. 90 nan aslam xızmetlerdi proaktiv hám kompozit tárizde kórsetiw jolǵa qoyıldı.
Máselen, tuwılıw menen baylanıslı xızmetlerdiń kompozit tárizde kórsetiliwi hár jılı derlik 1 million puqaraǵa qolaylıq jaratpaqta. Xalıqtıń járdemge mútáj qatlamlarına sociallıq napaqalar, sonday-aq, jasqa baylanıslı pensiya tayınlaw xalıqtıń múrájatısız avtomat túrde ámelge asırılmaqta.
Sanlastırıw nátiyjesinde 30 túrdegi xızmetlerdi real waqıt rejiminde alıw imkaniyatı jaratıldı. Usı jıldıń ózinde 8 millionǵa shamalas xızmetler avtomat tárizde kórsetildi. Hújjet almasıwdıń elektron túrge ótkeriliwi xalıqtıń jılına 23 milliard sum qarjıların únemlew imkaniyatın bermekte.
Sonıń menen birge, biznes wákillerine de jeńillikler hám qolaylıqlar jaratıw maqsetinde 160 tan aslam licenziya hám ruqsatnamalar biykar etildi. 150 den aslam ruqsatnamalar búgingi kúnde elektron túrde berilmekte, 140 túrdegi hújjet hám maǵlıwmatlardı talap etiw ámeliyatına shek qoyıldı.
Mámleketlik xızmetler eksterritorial princip tiykarında kórsetile baslandı. Sonday-aq, “Biznesti 15 minutta baslaw” principi ámeliyatqa engizilmekte.
Mámleketimiz basshısı búgin byurokratiyanı azaytıw boyınsha ayrıqsha baǵdarlama tastıyıqlanǵanın málim etti. Bul hújjet, bárinen burın, mámleket hám xalıq, mámleket hám biznes jáne mámleketlik strukturanıń ishki qatnasıqlarında byurokratiyanı saplastırıw, hár tárepleme qolaylı mámleketlik xızmetler ekosistemasın jaratıwdı názerde tutadı.
– Tiykarǵı maqsetimiz – 2030-jılǵa shekem Ózbekstandı artıqsha byurokratiyadan jıraq aymaqqa aylandırıwdan ibarat, – dedi Prezident.
Baǵdarlama sheńberinde 2030-jılǵa shekem ámelge asırılatuǵın áhmiyetli wazıypalar belgilep alındı. Sonıń ishinde, mámleketlik xızmetlerdiń sanı 1,5 mıńǵa, elektron xızmetlerdiń úlesi 95 procentke jetkeriledi. Kelesi jıldıń ózinde 250 xızmet elektron túrge ótkeriledi. Máselen, avtotransport quralın dizimnen ótkeriw, qosımsha qun salıǵın qaytarıw sıyaqlı xızmetlerden elektron paydalanıw jolǵa qoyıladı.
Jańa Ózbekstanda “Qaǵazsız húkimet” sistemasına tolıq ótilip, qaǵaz aylanısınan pútkilley waz keshiledi. 40 million hújjetten 25 millionı, sonnan keyingi jıldıń ózinde 5 millionı sanlastırıladı.
Proaktiv hám kompozit xızmetlerdiń sanı 400 ge jetkeriledi. Kelesi jıldıń ózinde 180 túrdegi bunday xızmetler engiziledi.
– Nátiyjede puqara múrájat etpesten oǵan xızmet kórsetiletuǵın sistemaǵa ótemiz, – dedi mámleketimiz basshısı.
Sonday-aq, barlıq mámleketlik xızmetler xatlawdan tolıq ótkeriledi. Onda bir-birin qaytalaytuǵın, kereksiz, puqaralarǵa júk bolıp atırǵan talaplar biykar etiledi.
Licenziya hám ruqsatnamalar beriw, kommunallıq tarmaqlarǵa jalǵanıw, qurılıs tarawında 300 den aslam mámleketlik xızmetler ápiwayılastırıladı. Máselen, 4 kommunallıq tarmaqqa birden-bir arza tiykarında jalǵanıw imkaniyatı jaratıladı.
Xızmet kórsetiw múddetleri keskin qısqartıladı hám artıqsha hújjet hám maǵlıwmatlar talap etiw biykar etiledi.
100 den aslam mámleketlik xızmetlerdiń kórsetiliw múddetleri 50 procentke qısqaradı. 110 nan aslam maǵlıwmat hám hújjetler talap etiw tolıq biykar etiledi.
Mámleketlik xızmetler portalı, “Licenziya” sisteması, “Bir ayna” bajıxana platforması hám koll-oraylar tolıq jasalma intellekt tiykarında islewge ótedi.
Hár jılı ministrlikler hám uyımlardıń jumısı arnawlı sanlı platforma arqalı bahalanadı. Eń jaqsı nátiyjege erisken uyımlar hám xızmetkerlerdi xoshametlew tártibi engiziledi.
Baǵdarlamanıń nátiyjeliligin turaqlı monitoring etiw, ministrlikler hám uyımlardıń byurokratiyanı qısqartıwǵa baylanıslı jumısın muwapıqlastırıw ushın óz aldına Baǵdarlama ofisi jumısı jolǵa qoyıladı.
Xalıq hám biznes wákilleri ushın baǵdarlamaǵa qosımshalar hám jańa baslamalardı tikkeley kirgiziw, sonıń menen birge, olar tárepinen ministrlikler hám uyımlardıń baǵdarlama sheńberindegi jumısın bahalaw imkaniyatı jaratıladı. Bunıń ushın 3 million dollar muǵdarında sıylıq qorı shólkemlestiriledi.
Bul qor esabınan byurokratiyanı saplastırıw boyınsha jańa baslama menen shıqqan xalıq, biznes wákilleri hám mámleketlik xızmetkerler ayrıqsha aqshalay sıylıqlar menen xoshametlenedi.
Sonday-aq, qosımsha nominaciyalar boyınsha da xoshametlew mexanizmleri engiziledi.
– Byurokratiyanı saplastırıw – mámlekettiń xalıqqa xızmet etiwge qaratılǵan tiykarǵı wazıypası. Biz birgelikte sonday sistemanı jaratıwımız kerek, puqara mámleketlik uyımǵa emes, mámlekettiń ózi hár bir puqaranıń aldına barıwı hám mashqalasın sheshiwi kerek. Bul – Jańa Ózbekstan mámleketlik basqarıwınıń zamanagóy hám adamgershilikli kelbeti bolıwı zárúr, – dedi Prezidentimiz.
Bunnan soń mámleketimiz basshısı rámziy túymeni basıp, Byurokratiyanı saplastırıw baǵdarlamasın iske qostı.
Ashılıw máresiminen soń Prezidentimiz forumnıń teması, alǵa qoyılǵan baslamalardıń áhmiyeti haqqında jámiyetshilik wákilleri menen sáwbetlesti. Elimizde “Insan qádiri ushın” ideyası barlıq reformalardıń tiykarın qurap atırǵanı, byurokratiyanı saplastırıw tiykarında hár bir qarar, hár bir xızmet, hár bir process tek ǵana insan mápine xızmet etiwi zárúr ekenligi atap ótildi.