Statistika tarawındaǵı jumıslardıń barısı hám aldaǵı rejeler kórip shıǵıldı

Usı jıl fevral ayında “Statistika jumısların shólkemlestiriw hám júrgiziw sistemasın jańa basqıshqa alıp shıǵıw boyınsha qosımsha ilajlar haqqında”ǵı Prezident pármanı qabıl etilgen edi. Pármanǵa bola, Prezident janındaǵı Statistika agentligi Milliy statistika komiteti sıpatında qayta shólkemlestirildi hám statistika jumıslarınıń nátiyjeliligin bunnan bılay da arttırıwdıń tiykarǵı baǵdarları belgilendi.
Májiliste ótken dáwirde ámelge asırılǵan jumıslar kórip shıǵıldı.
Sonıń ishinde, uyımlararalıq maǵlıwmat almasıw keńeytilip, 60 integraciya engizilgeni nátiyjesinde esabat júklemesi 27 procentke qısqardı. Sonıń ishinde, salıq uyımlarınıń onlayn-kassa maǵlıwmatları, elektr energiyası hám tábiyǵıy gazden paydalanıw, awıl xojalıǵınıń egislik maydanları hám zúráát haqqındaǵı maǵlıwmatlardı avtomatlastırılǵan túrde qabıl etiw jolǵa qoyıldı.
Májiliste jalpı milliy ónimniń nominal kólemin esaplawdı jaqsılaw boyınsha islengen jumıslar haqqında málimleme berildi.
Bazar xızmetleri, qurılıs, awıl xojalıǵı, sanaat hám byudjet qárejetlerin statistika menen jáne de keńirek qamtıp alıw nátiyjesinde qosımsha 81 trillion sum qosımsha qun esapqa alınıp, 2024-jıldıń juwmaqları boyınsha JIÓ kólemi 115 milliard dollardan 121,4 milliard dollarǵa arttı.
Sonıń menen birge, jasırın ekonomikanıń úlesi 2017-jıldaǵı 50 procentten 2024-jılı 35 procentke shekem azayǵanı atap ótildi. Jaqın keleshekte jáne 79 trillion sumlıq rásmiy emes ekonomikanı statistika menen qamtıp alıw, jasırın ekonomika úlesin 29 procentke shekem túsiriw imkaniyatı bar ekenligi málim etildi.
Prezidentimiz globallıq bazarda elektron sawda kólemi jedel ósip atırǵanın atap ótti. Mámleketimizde bul tarawdıń ósiw pátleri 9-11 procentke jetiwi kútilmekte. Sonday-aq, málimleme texnologiyaları hám aralıqtan xızmetler, frilans sıyaqlı jańa tarawlar tez rawajlanbaqta. Milliy statistika sisteması aldında bul tarawlardı da qamtıp alıw boyınsha áhmiyetli wazıypalar turǵanı kórsetip ótildi.
Tutınıw bahaları indeksin dúziwde maǵlıwmatlardı qolda jıynaw ámeliyatınan waz keship, MT hám jasalma intellekt texnologiyalarına basqıshpa-basqısh ótiw zárúr ekenligi atap ótildi.
Milliy statistikanı zamanagóy hám xalıqaralıq dárejede tán alınatuǵın sistemaǵa aylandırıw máseleleri de kórip shıǵıldı.
Xalıqaralıq “Deloitte” konsalting kompaniyası tárepinen 23 baslama hám 70 joybar islep shıǵılǵanı aytıldı. Olardı basqıshpa-basqısh ámelge asırıw statistikanıń anıqlıǵı, operativligi hám ashıq-aydınlıǵın arttırıwǵa xızmet etetuǵını atap ótildi. Bunnan tısqarı, Jáhán banki menen birgelikte 2030-jılǵa shekemgi dáwirde statistikanı rawajlandırıw milliy strategiyası islep shıǵılmaqta.
Kelesi jılı yanvar ayında baslanatuǵın xalıqtı dizimge alıw jumıslarına tayarlıq máseleleri dodalandı.
Házirgi waqıtqa shekem 9008 máhálle boyınsha shólkemlestiriw rejeleri tastıyıqlandı, dizimge alıwda qatnasatuǵın 60 mıńnan aslam “máhálle jetiligi” wákilleri hám juwapker xızmetkerleri ushın arnawlı oqıw kursları ótkerildi.
Dizimge alıw elektron túrde – arnawlı portal arqalı ótkeriledi. Maǵlıwmatlar portalǵa dizimge alıwshılar tárepinen úyme-úy júrip, planshet qurılmaları járdeminde kirgiziledi. Processler geomálimleme sisteması arqalı monitoring etip barıladı. Bunıń ushın dizimge alınatuǵın kvartiralar hám turaq jaylardıń geomanzilleri qáliplestirildi.
Mámleketimiz basshısına aymaqlarda bul baǵdardaǵı jumıslardıń tayarlıq jaǵdayı boyınsha esabat berildi.
Dizimge alıw processlerin bunnan bılay da jetilistiriw jolları, sonıń ishinde, sanlı platformalardan paydalanıw kónlikpelerin arttırıw, sırt elge jumıs islew, oqıw yamasa xızmet saparına ketken puqaralardı dizimge alıw, úyme-úy hám onlayn jıynalǵan maǵlıwmatlardı integraciyalaw boyınsha anıq sheshimler islep shıǵıw zárúr ekenligi atap ótildi.
Prezidentimiz anıq, operativ hám isenimli statistika mámleketlik siyasattı belgilew, ekonomikalıq hám sociallıq reformalardı ámelge asırıwdıń áhmiyetli faktorı ekenin atap ótip, tarawdı strategiyalıq qatnas tiykarında transformaciyalawdı dawam ettiriw tapsırıldı.
Juwapkerlerge xalıqtı hám awıl xojalıǵın dizimge alıw ilajların joqarı dárejede ótkeriw boyınsha kórsetpeler berildi.