Prezident Olimpiadasınan-Jáhán Olimpiadasına: Jaslarımız qábiletin kórsetetuǵın úlken sport bayramı baslandı

Úlken sport bayramına shaqırıq muzıkası jańladı. Stadionǵa aymaqlıq saylap alıw jarıslarınan tabıslı ótken sportshılar hám komandalar, jáhán, Aziya hám Olimpiada oyınlarınıń chempionları shıǵıp keldi.
Ózbekstan Respublikası Prezidenti Shavkat Mirziyoev shıǵıp sóyledi.
– Búgin Jańa Ózbekstannıń tımsalı bolǵan mine usı sawlatlı Olimpiada qalashasında sizler menen birgelikte Prezidentlik Olimpiada oyınlarına start bermektemiz. Mámleketimizde birinshi márte ótkerilip atırǵan, pútkil elimiz jasların olimpiada háreketiniń iygilikli ideyaları tiykarında birlestirip atırǵan bul sport bayramı bárshemizge múbárek bolsın! – dedi mámleketimiz basshısı.
Reformalardıń dáslepki kúnlerinen-aq barlıq tarawlar qatarında dene tárbiya hám sporttı rawajlandırıwǵa da úlken itibar qaratılmaqta.
Sońǵı segiz jılda byudjetten sportqa berilip atırǵan jıllıq qarjı 250 milliard sumnan 3 trillion sumǵa arttı, sport trenerleriniń ortasha miynet haqısı 7 esege kóbeydi, 250 den aslam iri sport obektleri jańadan qurıldı, 100 ge shamalası rekonstrukciyalandı.
Máhállelerde, ásirese, shetki awıllarda 2 mıńǵa shamalas sport maydanshaları qurıldı, 14 Olimpiada hám Paralimpiada orayları tolıq zamanagóy infrastruktura menen támiyinlendi.
Bul jumıslar elimizdiń abıraylı xalıqaralıq jarıslarda joqarı nátiyjelerge erisiwi hám sportı joqarı rawajlanǵan mámleketler qatarınan orın alıwına bekkem tiykar jaratpaqta.
Sonıń ishinde, Parij Olimpiada hám Paralimpiada oyınlarında márt hám bahadır sporotshılarımız haqıyqıy mártlik kórsetip, 13-orındı iyeledi. Mine, usınday tabıslı júristiń dawamı sıpatında bıyılǵı jılı jaslarımız jáhán universiadasında da 13-orındı, Baxreynde ótkerilgen Jaslar oyınları hám Saudiya Arabstanındaǵı Islam tileklesligi jarıslarında sıylı 2-orındı iyeledi.
Ásirese, ul-qızlarımız jáhán, Aziya hám Olimpiada oyınlarında 50 den aslam rekord nátiyjelerge eriskeni elimizdiń xalıqaralıq Olimpiada háreketindegi ornın hám abırayın anıq kórsetip tur.
Futbol boyınsha Ózbekstan milliy saylandı komandası birinshi márte jáhán chempionatına jollamanı qolǵa kirgizgeni xalqımız 34 jıl kútken tariyxıy waqıya boldı.
– Jańa Ózbekstannıń sport tariyxın, álbette, júzlegen erk-ıqrarı bekkem, márt hám jigerli, joqarı intellektuallıq potencialǵa iye ul-qızlarımız jaratpaqta. Mine, usınday qaharman sportshılarımızǵa abıray bolsın! Olardıń bası ústinde Watanımız bayraǵı hámiyshe maqtanısh penen jelbirep tursın! – dedi Prezidentimiz.
Búgingi kúnde dúnyada barlıq tarawlar qatarında sport áleminde de keskin gúres hám báseki bolıp atırǵanı atap ótildi. Bul bolsa abıraylı xalıqaralıq sport jarısları, sonıń ishinde, Olimpiada oyınlarına tayarlıq sistemasın jáne de jetilistiriwdi talap etpekte.
Bul jumıslardı eń tómengi buwın bolǵan máhálleden baslaw ushın usı jılı bes basqıshlı ǵalabalıq sport jarısları menen 15 million xalıq qamtıp alındı. Adaptiv sportqa berilip atırǵan itibar sebepli keyingi úsh jılda parasportshılardıń sanı derlik jeti esege artıp, 70 mıńnan aslam mayıplıǵı bolǵan shaxslar ǵalabalıq sportqa tartıldı.
Tarawdı sanlastırıw hám ashıq-aydınlıǵın arttırıw esabınan barlıq 10 mıń mektep hám 9 mıń máhálledegi ul-qızlar óz potencialın kórsetiw imkaniyatına iye boldı.
Endi eń qábiletli jaslardı selekciyalaw hám olardı úlken sportqa baǵdarlaw boyınsha pútkilley jańa sistema – Prezident Olimpiadası oyınları baslanbaqta.
Jarıstıń rayonlıq hám wálayatlıq basqıshlarında ulıwma bilim beriw mekteplerindegi sport dógerekleri, jeke menshik sport klubları hám 310 sport mektebinen 100 mıńnan aslam jaslarımız qatnastı.
Eń joqarı nátiyjege erisken 3 mıńnan aslam ul-qızlar Prezident olimpiadasına keldi. Olar sporttıń 10 baǵdarı boyınsha óz-ara bellesiwlerdi basladı.
Jeńimpazlar arnawlı sawǵalar hám aqshalay sıylıqlar menen sıylıqlanadı. Eń tiykarǵısı, olar saylandı komandalarǵa tikkeley baǵdarlanadı.
Joqarı dárejedegi tayarlıqtı dawam ettiriw ushın olar Olimpiada hám Paralimpiada oraylarına qabıl etiledi hám hár birine stipendiya beriledi.
Bir sóz benen aytqanda, bunnan bılay hár jılı ótkeriletuǵın Prezident olimpiadası jańa talantlardı ashıp, nátiyjeli selekciya sistemasına aylanadı.
Kelesi jıldan baslap, suw sportı, velosport, triatlon, qılıshlasıw hám komandalıq oyınlar boyınsha da jarıslar ótkerilip, Prezident olimpiadasındaǵı sport túrleri 20 ǵa jetkeriledi.
2026-jılı 46-Pútkil jer júzilik shaxmat olimpiadası, 2027-jılı 20 jasqa shekemgi futbolshılar arasında Jáhán chempionatı hám 2029-jılı Jaslar Aziya oyınları Ózbekstanda ótkeriledi.
– Bunday iri jarıslar xalqımız, ásirese, jaslarımız ushın úlken bayram, úlken sheberlik mektebi boladı, mámleketimizdiń doslıq hám birge islesiw eli sıpatında xalıqaralıq abırayın jáne de arttıradı. Prezident Olimpiadası sisteması bolsa bunday jarıslarǵa bay sportshılardı tańlap alıwǵa, atap aytqanda, 2028-jılı Los-Anjeleste ótetuǵın Olimpiada oyınları ushın hár bir aymaqtan licenziyalar sanın kóbeytiwge xızmet etetuǵınına gúman joq, – dedi Prezidentimiz.
Mámleketimiz basshısı jıllı xabardı járiyalaw ushın shıǵıp sóylegen sózinde tánepis aldı. Shaxmat boyınsha Jáhán kubogi finalında grossmeysterimiz Javohir Sindorov jeńiske eriskeni haqqındaǵı jańalıq gúwlegen qol shappatlawlar menen kútip alındı.
Sózin dawam ettirip, Prezidentimiz sporttıń tárbiyalıq áhmiyetine toqtap ótti. Hár qıylı zıyanlı ideya hám tásirler kúsheyip baratırǵan házirgi qıyın dáwirde jas áwladımızdı hár tárepleme salamat etip tárbiyalaw sheshiwshi áhmiyetke iye ekeni atap ótildi.
– Men bul baǵdarda sporttı tárbiyadan, tárbiyanı bolsa sporttan ajıratıp kóz aldına keltire almaytuǵın sizdey húrmetli sportshılar, veteranlarımız hám ustaz-trenerlerge súyenemen, – dedi Prezidentimiz.
Mámleketimiz basshısı sóziniń juwmaǵında Olimpiada qatnasıwshılarına áwmet hám tabıslar tiledi.
Stadionǵa Ózbekstan bayraǵı alıp shıǵıldı hám kóterildi, mámleketimiz gimni atqarıldı.

Olimpiada fakeli jaǵılıp, úlken sport bayramı baslandı. Ilaj teatrlastırılǵan mádeniy baǵdarlama menen dawam etti.
Máresimnen soń Prezident Shavkat Mirziyoev shaxmatshımız Javohir Sindorov penen telefon arqalı sóylesti.
Mámleketimiz basshısı grossmeysterimizdi Hindstanda ótken shaxmat boyınsha jáhán kuboginde erisken jeńisi menen óziniń atınan hám barlıq watanlaslarımızdıń atınan qızǵın qutlıqlap, bul tariyxıy waqıya pútkil xalqımızdı quwandırǵanın atap ótti. Jas sportshımızǵa kelesi jılı Kiprde bolıp ótetuǵın Talabanlar turnirinde tabıslar tiledi.