O‘zbekiston Respublikasi Oila va xotin-qizlar qo‘mitasi

Qarorga ko‘ra, Zulfiya nomidagi Davlat mukofoti talabgorlarini tanlash, ularning hujjatlarini rasmiylashtirish va taqdim etish tartibi hamda yo‘nalishlar bo‘yicha talabgorlarning yutuqlari, ilmiy-ijodiy va amaliy ishlarini baholash mezonlari belgilangan.

Talabgorlar 8 ta yo‘nalish — fan, ta’lim, adabiyot, madaniyat, san’at, sport, axborot texnologiyalari, va jamoatchilik faoliyati bo‘yicha tanlovlar orqali saralanadi.

Talabgorlar jamiyat hayotining turli soha va tarmoqlarida o‘z qobiliyat va imkoniyatlarini namoyon etib, a’lo xulqi, zukkoligi, o‘qish va mehnat faoliyatidagi muvaffaqiyatlari, jamoat ishlaridagi faolligi, tashabbuskorligi va iste’dodi bilan tengdoshlariga o‘rnak bo‘lib kelayotgan xotin-qizlar orasidan tanlab olinadi.

Talabgorlar fan, ta’lim, adabiyot, madaniyat, san’at, sport, axborot texnologiyalari va jamoatchilik faoliyati yo‘nalishlaridan biri bo‘yicha hujjatlar to‘plamini taqdim etishi lozim.

Zulfiya nomidagi Davlat mukofotini olish uchun talabgor doimiy yashash joyi bo‘yicha ro‘yxatga olingan hududdan tavsiya etiladi.

Tanlov jarayonida talabgorning so‘nggi 3 yil mobaynidagi ibratli faoliyati, fan, ta’lim, adabiyot, madaniyat, san’at, sport, axborot texnologiyalari va jamoatchilik faoliyati yo‘nalishlaridagi yutuqlari inobatga olinadi.

Talabgorlar:

respublika va xalqaro miqyosdagi tanlov, musobaqa va boshqa loyihalarda yuqori natijalarni qo‘lga kiritgan bo‘lishi;

faoliyat ko‘rsatayotgan sohada yangilik yaratgan, innovasion g‘oyalar, ilmiy-amaliy va muhim ishlanmalarni amaliyotga joriy etgan, o‘qishda va mehnat faoliyatida ulkan muvaffaqiyatga erishgan, zamonaviy axborot kommunikatsiya texnologiyalarini va xorijiy tillarni puxta o‘zlashtirgan, bilimi, iste’dodi, yetakchiligi hamda ijtimoiy hayotdagi faolligi bilan yoshlarga har tomonlama o‘rnak bo‘layotgan, shuningdek, tanlagan yo‘nalishi bo‘yicha yutuqlarga erishgan bo‘lishi lozim.

Hujjatlarni Zulfiya nomidagi Davlat mukofotiga talabgorlarni tanlash bo‘yicha tuman (shahar) komissiyalari ishchi organiga — tuman (shahar) oila va xotin-qizlar bo‘limlariga taqdim etishlari kerak.