Fuqarolik ishlari bo‘yicha Mirobod tumanlararo sudi binosida mustahkam oilaviy hayoti mavzusida seminar bo‘lib o‘tdi
2025-09-19 17:40:00 / Yangiliklar
Qo’mita raisi o’rinbosari Mukarram Ahmedova hamda mas’ul xodimlar ishtirok etgan seminarda ajrim yoqasida turgan nizoli oilalarni yarashtirish, qaynona va kelinlar o‘rtasidagi o‘zaro munosabatlarni mustahkamlash, ajrimlarning oldini olish hamda ayollar o‘rtasida ijtimoiy hamjihatlikni kuchaytirish mavzulari muhokama etildi.
Seminar davomida soha mutaxassislari – oila va xotin-qizlar bo‘limi rahbarlari, FHDYO bo‘limi vakillari, psixologlar, tibbiyot xodimlari, sudyalar va huquq-tartibot idoralari xodimlari tomonidan ma’ruzalar o‘qildi.
Bundan tashqari, fuqarolik ishlari bo‘yicha Mirobod tumanlararo sudi qoshidagi mediatsiya xonasida ajrim yoqasida turgan oilalar bilan individual ishlash jarayonlari muhokama qilindi. Mediatorlar ishtirokida bevosita mujozara va yarashtirish ishlarini tashkil etish, oilani saqlab qolish bo‘yicha amaliy yo‘l-yo‘riqlar berildi.
Tadbir yakunida savol-javoblar va ishtirokchilar fikrlari asosida jamiyatda oilani asrash, xususan, qaynona va kelinlar o‘rtasida sog‘lom munosabatlarni yo‘lga qo‘yish bo‘yicha aniq tavsiyalar ishlab chiqildi.
Bu kabi seminarlar – jamiyatda sog‘lom, mustahkam va tinch oila muhitini yaratish, ajrimlarni kamaytirish, avlodlar o‘rtasida o‘zaro hurmat va ma’naviy birlikni ta’minlashda muhim ahamiyatga ega.