O‘zbekiston Respublikasi Oila va xotin-qizlar qo‘mitasi

Assalomu alaykum, hurmatli yurtdoshlar,

Vazirlar Mahkamasining tegishli bayoniga muvofiq, 8-mart xalqaro xotin-qizlar kuni munosabati bilan 3-10-mart kunlari mamlakatimizda “Ayolga ehtirom” haftaligi o‘tkaziladi.

Haftalik doirasida xotin-qizlarni qo‘llab-quvvatlash, ularning huquq va qonuniy manfaatlarini himoya qilish, iqtisodiy, ijtimoiy va siyosiy faolligini oshirish, bandligini ta’minlash, tadbirkorlikka keng jalb etish, ehtiyojmand xotin-qizlarni ijtimoiy qo‘llab-quvvatlashga qaratilgan keng ko‘lamli tadbirlar, islohotlarning amaliy natijalarini o‘zida mujassam etgan mediatanlovlar va tadbirlar o‘tkazish nazarda tutilgan. Jumladan:

 Jamiyat va davlat hayotida faollik va tashabbuskorlik ko‘rsatgan, o‘zining samarali mehnati bilan jamiyat rivojiga munosib hissa qo‘shayotgan xotin-qizlarni “Moʻtabar ayol” ko‘krak nishoni bilan taqdirlash marosimlarini tashkil etiladi.

Uzoq yillar vazirlik va idoralarda ishlab fidoyilik, vatanparvarlik, ibrat namunasini ko‘rsatib xizmat qilgan nuroniy onaxonlar, “Ayollar daftari” va “Yoshlar daftari”ga kiritilgan xotin-qizlar “Yangi O‘zbekiston bog‘i” hamda muzeylar, tarixiy maskanlar, obidalar, ziyoratgoh va qadamjolar, teatr, konsert, kino, ko‘ngilochar maskanlarga imtiyozli asosda tashriflari tashkil etiladi.

Xotin-qizlarni qo‘llab-quvvatlash, ularning ijtimoiy faolliklarini oshirishga qaratilgan turli kitob va risolalar taqdimotlari o‘tkaziladi.

Umumta’lim maktablari o‘quvchilari o‘rtasida “Ona - oilamiz timsoli, mehr bulog‘i” mavzusida insholar tanlovi o‘tkazish nazarda tutilgan.

Ijtimoiy tarmoqlarda yoshlar ishtirokida “Ayolni e’zozlash – ezgulik va adolat mezoni”, “Ona – mehr bulog‘i”, “Men onam bilan faxrlanaman”, “Yurt taraqqiyotiga mening hissam” mavzularida fleshmob va chellenjlar  tashkil etiladi.

“Doim e’tibordasiz!" shiori ostida “Tibbiyot avtobuslari” tashkil etiladi va mahallalarda ijtimoiy himoyaga muhtoj xotin-qizlar chuqurlashtirilgan tibbiy ko‘rikdan o‘tkaziladi.

Jazoni ijro etish muassasalarida ma’naviy-ma’rifiy tadbirlar tashkil etiladi.

 Vazirliklar va idoralarda, korxona va tashkilotlarda faoliyat ko‘rsatayotgan xotin-qizlar o‘rtasida “Sport nafislik va salomatlik manbai” shiori ostida sport musobaqalari o‘tkaziladi.

 Joylarda “Tabarruk onaxonlarni e’zozlaylik!” mavzuida tadbirlar o‘tkaziladi. Uzoq yillar xalq farovonligi yo‘lida mehnat qilgan, xalq tinchligi yo‘lida halok bo‘lganlarning onalari, turmush o‘rtoqlari va qizlariga bayram sovg‘alarini tashkil etiladi.

Mahallalarda istiqomat qilayotgan shoiralar, yozuvchi va san’atkorlar o‘rtasida “Nazm gulshani”, “Qalam sehri”, “Onajonlar moʻtabar”, “Milliy raqs – munavvar qadriyat” mavzusida ko‘rik-tanlovlar o‘tkaziladi.

Vazirliklar va idoralarda, korxona va tashkilotlarda uzoq yillardan buyon fidoyilik bilan mehnat qilayotgan ayollar ishtirokida "Matonat timsollari" mavzusida muloqot uchrashuvlari o‘tkaziladi.

Rahbar ayollar va liderlik salohiyatiga ega bo‘lgan xotin-qizlar, shuningdek, yetakchi tadbirkor ayollarning mahallalarda “Ayollar daftari”ga kiritilgan ishsiz va tadbirkorlikni boshlash istagida bo‘lgan xotin-qizlar bilan muloqot uchrashuvlari tashkil etiladi.

“O‘zbekiston – umumiy uyimiz” shiori ostida mahallalarda turli millat vakillari bo‘lgan xotin-qizlar ishtirokida madaniy-ma’rifiy tadbirlar o‘tkaziladi.

Hududlarda “Yangi O‘zbekistonni barpo etishda xotin-qizlarning o‘rni” mavzusida ma’naviy-ma’rifiy tadbirlar bo‘lib o‘tadi.

“Oqila ayollar” harakati hamda Oila va xotin-qizlar qo‘mitasi huzuridagi “Ayol ma’rifati” jamoatchilik kengashi a’zolari ishtirokida  “Ayol ma’naviyati”, “Onalik baxti”, “Muammoli vaziyatlar va oqilona yechim”, “Muloqot psixologiyasi”, “Sog‘lom ovqatlanish”, “Sog‘lom turmush tarzi” kabi mavzularda; “Tomorqalarda gul va meva-sabzavotlarni yetishtirish, issiqxonalarni tashkil etishda ijobiy tajribalar” mavzusida;  “tikuvchilik”, “pazandalik”, “to‘qish” kabi yo‘nalishlarda mahallalarda mahorat darslari, seminar-treninglar tashkil etiladi.

Hurmatli yurtimiz ayollari, dalbar qizlar, “Ayolga ehtirom” haftaliga tadbirlarida faol ishtirok eting!

O‘zbekiston Respublikasi Prezidentining “Respublika mahallalarida jinoyatchilikning barvaqt profilaktikasi samaradorligini yanada oshirish bo‘yicha tashkiliy chora-tadbirlar to‘g‘risida” 2025-yil 3-yanvardagi PQ-1-son qaroriga muvofiq, oilalarda huquqiy madaniyatni oshirish, ular o‘rtasida huquqbuzarliklar profilaktikasini tashkil etish, xotin-qizlarni tazyiq va zo‘ravonlikdan himoya qilish yo‘nalishlarida ham qator amaliy ishlar olib borilmoqda.

Jumladan, tazyiq va zo‘ravonlikdan jabrlangan 5 472 nafar xotin-qizlarning oilalari bilan ishlash natijasida 2 546 ta oilalar yarashtirildi, 2 747 ta oilalardagi nizolar bartaraf etildi, 12 nafar ayollar “Ayollarni reabilitatsiya qilish va moslashtirish markazlari”ga yuborildi.

Profilaktik hisobda turgan 489 nafar xotin-qizlarning ishga joylashishiga ko‘maklashildi, 624 nafariga moddiy va ijtimoiy yordamlar ko‘rsatildi, 196 nafarining davolanishga muhtojligi aniqlanib, tibbiy muassasalarga joylashtirildi.

271 nafariga shaxsini tasdiqlovchi hujjatlarini qayta tiklashda amaliy yordam ko‘rsatilib, 73 nafar qizlar ta’lim muassasalariga qaytarildi va 25 nafari “Ayollarni reabilitatsiya qilish va moslashtirish markazlari”ga yuborildi.

Hududlarda tashkil etilgan profilaktik, axborot-ma’rifiy guruhlari tomonidan jami 20 994 ta, shundan, mahallalarda 10 943 ta, ta’lim muassasalarida 6 112 ta, korxona va tashkilotlarda 2 212 ta targ‘ibot tadbirlari o‘tkazildi.

Tadbirlarga 58 281 nafar malakali mutaxassislar,  huquqshunoslar, psixologlar, shifokorlar, “Oqila ayollar” harakati a’zolari va ijtimoiy faol shaxslar va nuroniylar jalb etildi.

Oila institutini mustahkamlash bo‘yicha qonunchilik hujjatlari ijrosini ta’minlash, oila-turmush munosabatlari doirasida va xotin-qizlar o‘rtasida huquqbuzarliklarni barvaqt oldini olish, xotin-qizlarni va bolalarni tazyiq va zo‘ravonlikdan himoya qilish, oilada huquqiy madaniyatni oshirish maqsadida Oila va xotin-qizlar qo‘mitasi hamda Ichki ishlar vazirligi hamkorligida 3-31-mart kunlarida “Oila huquqi” targ‘ibot oyligi o‘tkaziladi.

“Oila huquqi” targ‘ibot oyligini o‘tkazishdan maqsad jamiyatimizda yuz berayotgan salbiy hodisalar, sodir etilayotgan g‘ayriijtimoiy hatti-harakatlar, jumladan, xotin-qizlarga nisbatan o‘tkazilayotgan tazyiq va zo‘ravonliklar, notinch, ajrim yoqasidagi va sudlarda nizolashayotgan oilalar, oila-turmush munosabatlari doirasida va xotin-qizlar o‘rtasida sodir etilayotgan huquqbuzarliklar kabi salbiy voqeliklarni barvaqt oldini olish va mavjud muammolarni bartaraf etishda aholining huquqiy madaniyatini oshirishdan iborat.

Targ‘ibot tadbirlariga davlat organlari va tashkilotlaridan, malakali huquqshunoslar, psixologlar, pedagoglar, shifokorlar, va imom-xatiblar, mahallalardagi  jamoatchilik tuzilmalari faollari, “Oqila ayollar” harakati azolari, “Ayol ma’rifati” jamoatchilik kengashi a’zolari va boshqa ijtimoiy faol fuqarolar jalb qilinadi.

Hurmatli vatandoshlar, Siz ham ushbu oylik davomidagi tadbirlarda faol ishtirok eting!

O‘zbekiston Respublikasi Vazirlar Mahkamasining 2018-yil 2-apreldagi “Moʻtabar ayol” ko‘krak nishonini ta’sis etish chora-tadbirlari to‘g‘risida” 257-son qarorida belgilangan vazifalarga  muvofiq vazirlik, idoralardan hamda Oila va xotin-qizlar qo‘mitasining Qoraqalpog‘iston Respublikasi, viloyatlar va Toshkent shahar boshqarmalari tomonidan mazkur ko‘krak nishoni bilan taqdirlashga nomzodlar hujjatlari ko‘rib chiqish uchun taqdim etildi.

Joriy yilning 24-fevral kuni Respublika komissiyasi tomonidan 68 ta vazirlik va idoralardan 182 nafar, hududiy boshqarmalar tomonidan taqdim etilgan 708 nafar nomzodlarning hujjatlari o‘rganildi.

Bunda, nomzodning faoliyati to‘g‘risidagi hujjatlarida ko‘krak nishoni to‘g‘risida Nizomda belgilangan talablarga muvofiq, jamiyat va davlat hayotida faollik va tashabbuskorlik ko‘rsatganligi, o‘zining samarali mehnati bilan oilaning shakllanishiga va farovonligi mustahkamlanishiga, onalik va bolalik muhofazasiga munosib hissa qo‘shgan, shuningdek, sog‘lom va barkamol avlodni voyaga yetkazish, ularni vatanparvarlik va istiqlol g‘oyalariga sadoqat ruhida tarbiyalash, joylarda ma’na viy-axloqiy muhitni sog‘lomlashtirish va milliy qadriyatlarimizni keng targ‘ib etish borasidagi ibratli faoliyatiga e’tibor qaratildi.

Bundan tashqari, Vatanimiz va uning sarhadlarini himoya qilish chog‘ida halok bo‘lgan 10 nafar harbiy xizmatchilarning, shuningdek, Olimpiada va Paralimpiya sport musobaqalari chepmpionlarining onalarini 18 nafar ham ushbu ko‘krak nishoni bilan taqdirlash  taklifi kiritildi.

Respublika komissiyasining yakuniy xulosasiga ko‘ra, 2025-yilda jami 331 nafar faol, fidoyi va tashabbuskor ayollar “Moʻtabar ayol” ko‘krak nishoni bilan taqdirlash uchun tavsiya etildiyu

Taqdirlash uchun tavsiya etilgan nomzodlarning 56 nafari ta’lim, 30 nafari sog‘liqni saqlash, 25 nafari tadbirkor, fermer va hunarmandlar, 13 nafari huquq-tartibot, 22 nafari mahalla tizimida, 16 nafari olimalar, 20 nafari iqtisodiyot va ishlab-chiqarishning turli sohalarida, 18 nafari transport va kommunal soha, 16 nafari jamoat tashkilotlari, 16 nafari mehnat faxriylari, 11 nafari xotin-qizlarni qo‘llab-quvvatlash tizimida faoliyat olib borayotganlarni tashkil etdi.

E’tiboringiz uchun raxmat!