O‘zbekiston Respublikasi Oila va xotin-qizlar qo‘mitasi

Kuni kecha Oila va xotin-qizlar qo‘mitasida jismoniy va yuridik shaxslarning murojaatlarini o‘rganish natijalariga bag‘ishlangan muhokama yig‘ilishi bo‘lib o‘tdi.
Yig‘ilishda O‘zbekiston Respublikasi Prezidenti Administratsiyasi mas’ul xodimi M.Ishbekov tomonidan Oila va xotin-qizlar qo‘mitasi hamda uning joylardagi bo‘linmalari  jismoniy va yuridik shaxslarning murojaatlari bilan ishlash holati, amalga oshirilgan ishlar va mavjud kamchiliklar chuqur tahlil qilindi, zaruriy vazifalar belgilandi.  
Joylarda fuqaro murojaatlariga nisbatan e’tiborsizlik qilayotgan yoki ijrosini ta’minlash bo‘yicha sustkashlikka yo‘l qo‘yayotgan xodimlar ogohlantirildi, hududiy rahbarlarga mavjud kamchiliklarni tezkor bartaraf etish, Xalq qabulxonalari bilan samarali hamkorlik qilish bo‘yicha muddatli topshiriqlar berildi. 
Yig‘ilishda Qoraqalpog‘iston Respublikasi, Jizzax, Navoiy va Qashqadaryo viloyatlarining hududiy rahbarlari joylarda fuqaro murojaatlari bilan ishlash borasidagi kamchiliklar va ularni bartaraf etish bo‘yicha hisobot berdi. 
O.Parpiboyeva tomonidan joylarda murojaatlarga e’tiborsizlik bilan qarash, ularni chuqur o‘rganmaslik va yuzaki yondashish, fuqarolarga yetarli axborot materiallari va tushuntirishlar berilmayotgani oqibatida takroriy ariza va shikoyatlar soni ortayotgani; xodimlar xatti-harakatlari va faoliyatidan norozilik mazmunidagi shikoyatlarga e’tiborsizlik yoki asosli javob bermaslik; sayyor qabullarning tashkil qilinishidagi kamchiliklar;  shaxsiy qabullarni ro‘yxatga olishdagi hamda murojaatlarni noto‘g‘ri tasniflashdagi kamchiliklarni bartaraf etish, tizimda Jismoniy va yuridik shaxslarning murojaatlari bilan ishlashni  yangi bosqichga ko‘tarish bo‘yicha alohida dastur ishlab chiqilishi bo‘yicha topshiriq berilib, ijrosi nazoratga olindi. 
Shuningdek, ayrim hududlarda ijtimoiy tarmoqlarda e’lon qilinadigan materiallarga sovuqqonlik bilan munosabatda bo‘lish hollari mavjudligi bo‘yicha tegishli mas’ullar faoliyati tanqid qilinib, materiallarni o‘z vaqtida va manzilli o‘rganish hamda o‘z vaqtida munosabat bildirib borish bo‘yicha hududiy mas’ullarga ko‘rsatma berildi. 
Qo‘mita raisi ta’kidlaganidek,  Davlatimiz rahbarining: «Xalq bilan muloqot va inson manfaatlarini ta’minlash – vaqtinchalik kampaniya emas, balki davlat siyosatining ustuvor yo‘nalishi bo‘lib, doimo e’tiborimiz markazida turadigan masaladir" degan da’vatlari kundalik amalimizga aylanishi zarur. 
Ma’lumot uchun - 2024 yilning o‘tgan davrida  Oila va xotin-qizlar qo‘mitasi hamda hududiy bo‘linmalarga jami 42 mingdan ortiq murojaatlar kelib tushgan. Mazkur murojaatlardan 58 foizi ijobiy hal etilgan, 35 foizi bo‘yicha tushuntirish berilgan, qolgan murojaatlar o‘rnatilgan tartibda ko‘rib chiqilmoqda.
Murojaatlarning ko‘p qismi Qashqadaryo (3545  ta), Surxondaryo (2989 ta), Samarqand (2982 ta), Farg‘ona (2792 ta), va Toshkent (2741 ta) viloyatlariga to‘g‘ri keladi. Shuningdek, Oila va xotin-qizlar qo‘mitasi rahbari va o‘rinbosarlari, Qoraqalpog‘iston Respublikasi, viloyatlar va Toshkent shahar Oila va xotin-qizlar boshqarmalari boshliqlari, tuman-shaharlar bo‘lim boshliqlari tomonidan 713 ta sayyor qabullar o‘tkazildi. Sayyor qabullar davomida 4 230 nafar fuqaroning 8 201 ta masala bo‘yicha murojaatlari qabul qilindi.