O‘zbekiston Respublikasi Oila va xotin-qizlar qo‘mitasi

📍Bosh vazir o‘rinbosari — Oila va xotin-qizlar qo‘mitasi raisi Zulayho Maxkamova surxondaryolik bir guruh tadbirkor ayollar bilan ochiq muloqot o'tkazdi.

Uchrashuvda viloyatda faoliyat yuritayotgan tadbirkor xotin-qizlar, o‘z biznesini yo‘lga qo‘ygan tashabbuskor ayollar, tegishli tashkilotlar vakillari hamda mas’ullar ishtirok etdi. Tadbirni Surxondaryo viloyati Oila va xotin-qizlar boshqarmasi boshlig‘i Zulxumor Xidirova olib bordi.

Muloqot davomida xotin-qizlarning iqtisodiy salohiyatini oshirish, kambag‘allikni qisqartirish, ayollar tadbirkorligini rivojlantirish, ularni kasb-hunarga yo‘naltirish, bandligini ta’minlash hamda daromad manbalarini kengaytirish masalalari muhokama qilindi.

Shuningdek, tadbirkor ayollar uchun yaratilayotgan imkoniyat va imtiyozlar, subsidiya, kredit, kasbga o‘qitish, o‘zini o‘zi band qilish hamda yangi loyihalarni amalga oshirish borasidagi qo‘llab-quvvatlash mexanizmlari haqida atroflicha fikr almashildi.

Ta’kidlanganidek, bugun ayollar tadbirkorligini rivojlantirish oilalar farovonligini ta’minlash, mahallalarda yangi ish o‘rinlari yaratish, hududlar iqtisodiy salohiyatini oshirish va xotin-qizlarning jamiyatdagi faolligini kuchaytirishda muhim omil bo‘lib xizmat qilmoqda.

Uchrashuv davomida ayollarning zamonaviy bilim va ko‘nikmalarni egallashi, kasb-hunar o‘rganishi, raqamli savodxonligini oshirishi, ishlab chiqarish va xizmat ko‘rsatish sohalarida faol ishtirok etishi hamda intellektual salohiyatini yuksaltirish masalalariga alohida e’tibor qaratildi.

➡️Shundan so‘ng Bosh vazir o‘rinbosari Angor tumanida bo‘lib, "Bahor" va "Ilg‘or" mahallalarida amalga oshirilayotgan ishlar bilan tanishdi.


O‘rganishlar davomida mahallalarda ijtimoiy muhit barqarorligini ta’minlash, ehtiyojmand oilalar bilan manzilli ishlash, xotin-qizlar bandligini oshirish, oilaviy qadriyatlarni mustahkamlash va mavjud muammolarni joyida hal etish borasidagi ishlar tahlil qilindi.

Shuningdek, “Angor Farm” MChJ faoliyati bilan tanishilib, korxonadagi ishlab chiqarish jarayonlari, mavjud imkoniyatlar va kelgusidagi rivojlanish istiqbollari ko‘zdan kechirildi. Korxona faoliyati hududda yangi ish o‘rinlari yaratish, mahalliy ishlab chiqarishni rivojlantirish hamda xotin-qizlar bandligini ta’minlashda muhim ahamiyat kasb etishi qayd etildi.

Tumanda amalga oshirilishi rejalashtirilgan yangi loyihalar taqdimoti ham o‘tkazilib, ularning istiqbollari, hudud iqtisodiyotiga qo‘shadigan hissasi hamda aholi bandligini ta’minlashdagi o‘rni yuzasidan fikr almashildi.

Yakunda mas’ullarga xotin-qizlarning iqtisodiy faolligini oshirish, tadbirkor ayollar tashabbuslarini qo‘llab-quvvatlash, mahallalarda manzilli ishlarni kuchaytirish hamda yangi loyihalar samaradorligini ta’minlash bo‘yicha tegishli vazifalar belgilab berildi.

#Surxondaryo