O‘zbekiston Respublikasi Oila va xotin-qizlar qo‘mitasi

Forum SHHTga a’zo davlatlarda xotin-qizlarning siyosiy, iqtisodiy va ijtimoiy hayotdagi ishtirokini kengaytirish, ularning qarorlar qabul qilish jarayonidagi rolini mustahkamlash, innovatsion rivojlanish hamda mintaqaviy hamkorlikni yangi bosqichga olib chiqish masalalariga bag‘ishlandi.

Nufuzli tadbirda SHHTga a’zo mamlakatlarning davlat organlari rahbarlari, xalqaro tashkilotlar vakillari, ekspertlar, ilmiy doiralar hamda xotin-qizlar masalalari bo‘yicha mas’ul idoralar ishtirok etdi.

Forumda O‘zbekiston Respublikasi Bosh vaziri o‘rinbosari — Oila va xotin-qizlar qo‘mitasi raisi Zulayho Maxkamova ma’ruza bilan qatnashib, mamlakatimizda xotin-qizlarning huquq va manfaatlarini ta’minlash, ularning iqtisodiy mustaqilligini mustahkamlash, davlat va jamiyat boshqaruvidagi ishtirokini kengaytirish hamda gender tenglikni ta’minlash borasida amalga oshirilayotgan izchil islohotlar va ularning amaliy natijalari haqida so‘z yuritdi.

Shuningdek, O‘zbekistonda xotin-qizlarni tadbirkorlikka keng jalb etish, innovatsion tashabbuslarni qo‘llab-quvvatlash, zamonaviy kasb va ko‘nikmalarni egallashi uchun zarur shart-sharoitlar yaratish hamda ularning yetakchilik salohiyatini ro‘yobga chiqarishga qaratilgan tizimli chora-tadbirlar xalqaro ishtirokchilarda alohida qiziqish uyg‘otdi.

Forumning yalpi va panel sessiyalarida ayollarning davlat boshqaruvidagi ishtiroki, iqtisodiy taraqqiyot va raqamli transformatsiyadagi o‘rni, tadbirkorlikni rivojlantirish, moliyaviy resurslardan foydalanish imkoniyatlarini kengaytirish, shuningdek, SHHT makonida xotin-qizlar o‘rtasida innovatsion hamkorlikni rivojlantirish masalalari yuzasidan fikr almashildi.

Ta’kidlanganidek, bugungi globallashuv va texnologik transformatsiya sharoitida ayollar salohiyatidan to‘laqonli foydalanish barqaror rivojlanishning muhim omillaridan biri hisoblanadi. Shu bois SHHT doirasida xotin-qizlar o‘rtasidagi muloqot va hamkorlikni institutsional asosda rivojlantirish, ilg‘or tajribalarni ommalashtirish hamda qo‘shma tashabbuslarni qo‘llab-quvvatlash ustuvor vazifalardan biri sifatida e’tirof etildi.

Mazkur forum SHHT mamlakatlari o‘rtasida xotin-qizlar masalalari bo‘yicha o‘zaro tajriba almashish, amaliy hamkorlikni mustahkamlash hamda ayollar yetakchiligini qo‘llab-quvvatlashga qaratilgan yangi tashabbuslarni ilgari surish uchun muhim xalqaro platforma bo‘lib xizmat qildi.