O‘zbekiston Respublikasi Oila va xotin-qizlar qo‘mitasi

Tadbir O’zbekiston Respublikasi Prezidentining «Oilalarni mustahkamlash va xotin-qizlarning faolligini oshirish bo’yicha qo’shimcha chora-tadbirlar to’g’risida» 2023 yil 21 dekabrdagi PQ-401-son qarori hamda Vazirlar Mahkamasining «15 may – Xalqaro oila kunini keng nishonlash» bo’yicha topshiriqlari ijrosi yuzasidan tashkil etilayotgan «Oilamiz – kelajagimiz» oyligi doirasida Oila va xotin-qizlar qo’mitasi tashabbusi bilan o’tkazildi. Festivalda Bosh vazir o’rinbosari — Oila va xotin-qizlar qo’mitasi raisi Zulayho Maxkamova ishtirok etdi va tadbir ishtirokchilariga muvaffaqiyat tiladi. Ta’kidlanganidek, ushbu festival milliy o’yinlar namoyishi bo’lishi bilan birga farzandlarimiz ruhiyatiga milliy g’ururni singdirish, xalqimizning ming yillik davlatchilik tarixini ulug’lash hamda yosh avlodni vatanparvarlik ruhida tarbiyalash maqsadida tashkil etilgan mazmunli tadbirdir. Festival doirasida asrlar osha sayqallanib kelgan «Oqsoq bo’ri va qo’ylar», «Bo’ri, echki va uning bolalari», «Laylak keldi», «Qiz va qushlar», «Durra otar», «Tayoq tepdi», «Oshqovoq uzdi», «Chavandozlar» va «Qarmoqcha» kabi o’nlab an’anaviy xalq o’yinlari yosh avlod ishtirokida jonlantirildi. To’maris, Barchin va Alpomish kabi xalqimizning mardlik hamda jasorat timsoli bo’lgan obrazlar sahnalashtirildi. Shuningdek, hunarmandchilik ko’rgazmalari, milliy taomlar namoyishi, etnik kiyimlar va moda ko’rgazmasi, milliy ohanglar hamda mahalliy san’atkorlarning konsert dasturlari tashkil etildi. Dorbozlar, qo’g’irchoq o’ynatuvchilar, baxshilar, folklor jamoalari va yosh rassomlarning ishtiroki tadbirga o’zgacha milliy ruh bag’ishladi. «Biz oiladagi va mahallalarimizdagi barcha ma’naviy-ma’rifiy ishlarni mazkur tadbirlar misolida targ’ib etamiz. Hamkor tashkilotlar bilan birgalikda o’tkazilayotgan bugungi festival orqali milliy o’yinlarimizning farzandlarimiz tarbiyasida muhim ekanini yana bir bor ta’kidlaymiz. Xulosa qilib aytganda, bugundan boshlab respublikamizning barcha hududlarida, barcha maktablarda, barcha mahallalarda bu jarayonlar davom etadi. Natijada ushbu festivallar orqali xalqimiz, ta’lim muassasalari hamda jamoat tashkilotlari o’rtasidagi hamkorlik yanada mustahkamlanadi, farzandlarimizning yozgi ta’tili mazmunli o’tadi», — dedi Bosh vazir o’rinbosari. Tadbir Oila va xotin-qizlar qo’mitasi tomonidan Maktabgacha va maktab ta’limi vazirligi, Sport vazirligi, Madaniyat vazirligi, Respublika Ma’naviyat va ma’rifat markazi, «Ayol ma’rifati» harakati hamda boshqa hamkor tashkilotlar bilan birgalikda tashkil etildi. Festival yakunida har bir tumandan kelgan 12 ta jamoa Oila va xotin-qizlar qo’mitasi va hamkor tashkilotlarning esdalik sovg’alari bilan taqdirlandi.