O‘zbekiston Respublikasi Oila va xotin-qizlar qo‘mitasi

2026-yil 13-mart kuni Davlat rahbari boshchiligida “Xalq murojaatlari bilan ishlash tizimini yangi darajaga ko‘tarish va jamoatchilik fikrini chuqur tahlil qilish”ga bag‘ishlangan videoselektor yig‘ilishida belgilangan vazifalar ijrosini ta’minlash, inson qadrini ulug‘lash hamda har bir fuqaroning bugungi kundan rozi bo‘lib yashashiga erishish maqsadida tizimli ishlar olib borilmoqda.

Mazkur vazifalar ijrosi doirasida, 2026-yil 18-mart kuni O‘zbekiston Respublikasi Oila va xotin-qizlar qo‘mitasi raisi birinchi o‘rinbosari U.Abdullayeva hamda Toshkent shahar hokimi o‘rinbosari – Oila va xotin-qizlar boshqarmasi boshlig‘i Sh.Sultanova tomonidan Toshkent shahrida istiqomat qiluvchi jismoniy va yuridik shaxslarning murojaatlari yuzasidan sayyor qabul  tashkil etildi.

Qabul davomida jami 15 nafar xotin-qizlar ishtirok etib, ularning uy-joy bilan ta’minlash, moddiy yordam ajratish, sog‘ligini tiklash, bandligini ta’minlash, huquq va manfaatlarini qo‘llab-quvvatlash masalalariga oid murojaatlari ko‘rib chiqildi.

Ko‘rib chiqilgan murojaatlar natijasida: 5 nafar fuqaroga homiylik asosida bir martalik moddiy yordam hamda oziq-ovqat mahsulotlari taqdim etildi; 1 nafar fuqaroning davolanishi uchun order ajratish masalasi nazoratga olindi; 2 nafar fuqaroga tadbirkorlik yo‘nalishida bilimlarini oshirish uchun yo‘llanma berildi. Qolgan murojaatlar yuzasidan tegishli tashkilotlarga topshiriqlar berilib, ularning ijrosi nazoratga olindi.