Oʻzbekistonda yaratilayotgan keng imkoniyatlar har bir ayolning taqdiridagi ijobiy oʻzgarishlarda oʻz ifodasini topmoqda. Bu yurtimizda olib borilayotgan “Inson qadri uchun” tamoyilining hayotiy tasdigʻidir
2026-02-26 16:35:00 / Yangiliklar
Bugungi brifingimizda yurtimizdagi islohotlarning xalqaro maydondagi eʼtirofini koʻrsatuvchi juda muhim yangilikni maʼlum qilmoqchimiz.
Soʻnggi yillarda davlat boshqaruvini samarali tashkil etish, iqtisodiy barqarorlik va ijtimoiy farovonlikni taʼminlash, fuqarolar va xalqaro hamkorlar uchun ochiq, shaffof va samarali muhit yaratishga qaratilgan tizimli islohotlar natijasida mamlakatimizning xalqaro reyting va indekslardagi koʻrsatkichlari tobora yaxshilanib bormoqda.
Bu borada genderga oid reyting va koʻrsatkichlarda mamlakatimiz oʻrnini yaxshilash borasida ahamiyatga molik ishlar amalga oshirilayotgani ushbu yoʻnalishdagi reyting va indekslarda mamlakatimiz yuqori natijalarni qayd etayotganida ham koʻrinmoqda.
Xabaringiz bor, Jahon bankining “Ayollar, biznes va qonun” indeksi mamlakatimiz uchun ustuvor reyting va indekslar qatoriga kiritilgan.
Kuni kecha Jahon banki yangilangan metodologiyasiga asoslangan "Ayol, biznes va qonun" indeksining 2026-yilgi hisobot natijalariga koʻra, Oʻzbekiston oʻz pozitsiyasini 43 pogʻonaga yaxshilab, 100 dan 82,1 ball bilan 190 ta davlat orasida 48-oʻrinni egalladi.
Taʼkidlash joizki, “Ayollar, biznes va qonun” indeksining yangilangan metodologiyasi faqat qonunchilik tahlili bilan cheklanib qolmay, huquqiy normalar ijrosini taʼminlovchi mexanizmlarni ham qamrab oldi.
Shu bilan birga, ekspertlar tomonidan qonunlarning ayollar hayotidagi amaliy ifodasi va koʻrilayotgan chora-tadbirlar samaradorligiga ham baho berildi.
Oʻzbekistonning gender tengligiga oid qonunchiligi 82,1 ball (maksimal 100 balldan) bilan baholandi. Bu koʻrsatkich:
Global oʻrtacha koʻrsatkichdan (66,9) qariyb 15 ballga;
Yevropa va Markaziy Osiyo mintaqasi oʻrtacha koʻrsatkichidan (80,6) esa 1,5 ballga yuqoridir.
Hisobotda mamlakatimizda amalga oshirilgan qator tizimli islohotlar ijobiy baholandi.
Jumladan, davlat xaridlari tizimida genderga yoʻnaltirilgan qoidalar joriy etildi, qonunchilikka ayollar tadbirkorligini ragʻbatlantiruvchi normalar kiritildi, shuningdek ijtimoiy himoya va mehnat sohasidagi ayrim cheklovlar qayta koʻrib chiqildi.
Hisobotda alohida qayd etilishicha, Oʻzbekiston Yevropa va Markaziy Osiyo mintaqasida davlat xaridlarida gender omilini hisobga oluvchi qonunchilikka ega boʻlgan sanoqli davlatdan biri hisoblanadi.
Shuningdek, soʻnggi yillarda tadbirkorlik sohasida gender tengligini taʼminlovchi yangi islohotlarni amalga oshirgan davlat sifatida eʼtirof etildi.
Natijada mamlakatimiz indeksning Qonunchilik tahlilidagi “Harakatlanish”, “Oila”, “Mehnatga haq toʻlash”, “Bola parvarishi” hamda “Mulk” indikatorlari boʻyicha maksimal 100 ball toʻpladi.
Shuningdek, “Mehnat” indikatorida koʻrsatkichlar 50 balldan 91,75 ballga, “Pensiya” indikatorida esa 50 balldan 66,75 ballgacha oshdi.
Oʻzbekistonning huquqiy islohotlar sohasidagi koʻrsatkichi uni jahonning eng ilgʻor mamlakatlari qatoriga olib chiqdi. Mamlakatimiz xotin-qizlar uchun teng huquqiy muhit yaratish borasida Yaponiya, Xitoy, Turkiya, Janubiy Koreya, Braziliya, Gruziya, Singapur, va Hindiston kabi davlatlarni ortda qoldirdi.
Mazkur nufuzli xalqaro indeksda qayd etilgan natija Yangi Oʻzbekistonda gender tenglikni taʼminlash yoʻlida olib borilayotgan tizimli islohotlar xalqaro miqyosda eʼtirof etilganini koʻrsatadi.
Davlatimiz rahbari boshchiligida xotin-qizlarning huquq va manfaatlarini taʼminlash, ularning jamiyatdagi mavqeini mustahkamlash borasida amalga oshirilayotgan tizimli islohotlar bugun oʻz amaliy samarasini bermoqda.
Yaratilayotgan keng imkoniyatlar shunchaki raqamlarda emas, balki har bir ayolning taqdiridagi ijobiy oʻzgarishlar, ularning ijtimoiy-siyosiy faolligi va ertangi kunga boʻlgan mustahkam ishonchida oʻz ifodasini topmoqda.
Bu yurtimizda olib borilayotgan “Inson qadri uchun” tamoyilining hayotiy tasdigʻidir!