O‘zbekiston Respublikasi Oila va xotin-qizlar qo‘mitasi

Matbuot anjumanida qoʻmita raisining birinchi oʻrinbosari Umida Abdullayeva soʻzga chiqib, 2025-yilda amalga oshirilgan ishlar yakunlari, erishilgan natijalar hamda 2026-yilga moʻljallangan ustuvor vazifalar haqida batafsil maʼlumot berdi. Taʼkidlanganidek, olib borilayotgan barcha chora-tadbirlar inson qadrini ulugʻlash, oilaviy barqarorlikni taʼminlash va xotin-qizlarning jamiyat hayotidagi rolini kuchaytirishga qaratilgan.

Shuningdek, matbuot anjumanida amalga oshirilgan ishlar va belgilangan vazifalar O‘zbekiston – 2030 strategiyasi maqsad va vazifalari bilan uzviy bogʻliqligi alohida qayd etildi. Jumladan, Strategiyada belgilangan aholi farovonligini oshirish, kambagʻallikni qisqartirish, gender tengligini taʼminlash, xotin-qizlarning iqtisodiy faolligini kengaytirish hamda sogʻlom va mustahkam oila muhitini shakllantirishga qaratilgan ustuvor yoʻnalishlar Qoʻmita faoliyatining asosiy mezonlari sifatida belgilangan.

Qayd etilishicha, “Oʻzbekiston – 2030” strategiyasi doirasida xotin-qizlar bandligini taʼminlash, tadbirkorlikni qoʻllab-quvvatlash, “Ayollar daftari” orqali manzilli yordam koʻrsatish, tazyiq va zoʻravonlikka nisbatan murosasiz muhitni shakllantirish, sogʻlom turmush tarzini keng targʻib etish kabi yoʻnalishlar izchil davom ettiriladi. 2026-yilda ushbu yoʻnalishlarda yangi mexanizmlar va innovatsion yondashuvlarni joriy etish rejalashtirilgan.

“Bugungi kunda oilaviy nizolarni barvaqt aniqlash va ularni chuqurlashmasdan turib hal etish masalasi ustuvor ahamiyat kasb etmoqda. Shu maqsadda respublika bo‘ylab tashkil etilgan Oila va xotin-qizlar maskanlari o‘zining samarali faoliyati bilan amaliy natijalar bermoqda. Ushbu maskanlar orqali oilalarga yaxlit — huquqiy, psixologik va mediativ xizmatlar ko‘rsatilib, nizolarning asosiy sabablarini joyida o‘rganish va manzilli yechimlar ishlab chiqish yo‘lga qo‘yildi.

Ayniqsa, "Oqila ayollar" harakati vakillarining mahallalardagi faolligi, ularning tarbiyaviy-ma’naviy ishtiroki oilalarda sog‘lom muhitni mustahkamlash, kelishmovchiliklarning oldini olish va ajrimlar sonini kamaytirishda muhim omil bo‘lib xizmat qilmoqda. Tajriba shuni ko‘rsatmoqdaki, profilaktika, muloqot va o‘zaro ishonchga asoslangan yondashuv orqali ko‘plab nizoli oilalarni yarashtirish, farzandlar manfaatlarini himoya qilish hamda oilani saqlab qolishga erishilmoqda”, — dedi qo'mita boshqarma boshlig'i Mavluda Nizomova.

Matbuot anjumani davomida ommaviy axborot vositalari vakillarining savollariga qoʻmita boʻlim boshliqlari Rahima Mirholiqova, Nodira Karimova hamda O‘giloy O‘razova atroflicha javob berib, “Oʻzbekiston – 2030” strategiyasi doirasida xotin-qizlar va oilalarni qoʻllab-quvvatlash borasida amalga oshiriladigan aniq vazifalar yuzasidan tushuntirishlar berdi.

Xulosa oʻrnida taʼkidlanganidek, 2025-yilda erishilgan natijalar va 2026-yilga belgilangan ustuvor vazifalar “Oʻzbekiston – 2030” strategiyasining maqsadlariga xizmat qilib, kelgusida ham har bir oilada sogʻlom muhitni qaror toptirish, xotin-qizlarning salohiyatini toʻliq roʻyobga chiqarish va jamiyatda barqaror taraqqiyotni taʼminlashga qaratilgan ishlar izchil davom ettiriladi.