Hokim yordamchilari faoliyati tahlil qilindi: asosiy e’tibor bandlik va aholi daromadlarini oshirishga qaratildi
2026-10-22 13:05:00 / Majlislar
Vobkent tumani hokimligining katta majlislar zalida tuman hokimining birinchi o‘rinbosari Otabek Muqumov ishtirokida mahallalarda faoliyat yuritayotgan hokim yordamchilarining ish samaradorligi tanqidiy-tahliliy ruhda muhokama qilindi.
Yig‘ilishda mahallalardagi bitiruvchilar va ishsiz fuqarolarni doimiy ish o‘rinlari hamda barqaror daromad manbalari bilan ta’minlash, tadbirkorlik faoliyatini boshlash istagidagi fuqarolar bilan individual ishlash, imtiyozli kreditlar imkoniyatlarini keng targ‘ib qilish va tomorqa yer maydonlaridan samarali foydalanishni tashkil etish borasida amalga oshirilayotgan ishlar tahlil qilindi.
Muhokamalar davomida yuqori natijalarga erishayotgan hokim yordamchilarining ilg‘or tajribalarini ommalashtirish, faoliyatida sustkashlikka yo‘l qo‘ygan mutaxassislar ishlayotgan mahallalarda mavjud muammolarni aniqlash va ularni bartaraf etish bo‘yicha aniq hamda manzilli choralarni belgilashga kelishib olindi.
Ta’kidlanganidek, har bir mahallada aholi muammolarini joyida hal etish, fuqarolarning bandligini ta’minlash, tadbirkorlik tashabbuslarini qo‘llab-quvvatlash va daromadlarini oshirish hokim yordamchilarining kundalik faoliyatidagi ustuvor vazifalar bo‘lishi lozim.
Bosh maqsad — yil yakuniga qadar Vobkent tumanini kambag‘allik va ishsizlikdan xoli hududga aylantirish. Ushbu maqsadga erishishda har bir hokim yordamchisining tashabbuskorligi, mas’uliyati va amaliy natijadorligi muhim ahamiyat kasb etadi.
Tuman hokimligi axborot xizmati