Vobkentda oilalar mustahkamligini ta’minlashga qaratilgan maslahat markazi faoliyati yo‘lga qo‘yildi
2026-10-22 13:00:00 / Yangiliklar
Vobkent tumanida Ma’naviy-ma’rifiy va diniy masalalar bo‘yicha maslahat markazi tashkil etildi. Markaz faoliyatining asosiy yo‘nalishlaridan biri — yosh oila quruvchilar maktabi tinglovchilarini o'qitish hamda oilaviy nizolar va ajrimlarning oldini olish, yoshlar ongida oila muqaddasligi, nikohning mas’uliyati hamda oilaviy qadriyatlarga hurmat tuyg‘usini mustahkamlashdan iborat.
Mazkur ezgu maqsad yo‘lida tuman hokimligi xotin-qizlar bo‘limi hamda hamkor tashkilotlar tomonidan olib borilayotgan ishlar, avvalo, yosh avlodga milliy an’analarimizga xos bo‘lgan oilaviy mas’uliyat, o‘zaro hurmat, mehr-oqibat va murosaga asoslangan munosabatlarning ahamiyatini tushuntirishga qaratilgan. Zero, mustahkam oila — jamiyat barqarorligi va farovonligining muhim poydevoridir.
Markazda fuqarolarga oilaviy nizolar, nikoh va taloq, fiqhiy masalalar, milliy urf-odatlar, psixologik ko‘mak, turli bid’at va xurofotlarning oldini olish, shuningdek, yot g‘oyalar ta’siriga tushib qolishdan saqlanish kabi masalalarda maslahat va tavsiyalar beriladi. Bu jarayonda tuman yetakchi imom-xatiblari, islomshunos va dinshunos mutaxassislar, otinoyilar hamda psixologlarning ko‘magi yo‘lga qo‘yilgan.
🔹Manzil: “Mir Xurd Vobkandiy” (Qassoblik) jome masjidi.
🔹Qabul kunlari: dushanba, chorshanba va juma kunlari.
🔹Vaqti: soat 09:00 dan 12:00 ga qadar.
Tuman hokimligi axborot xizmati