G‘aribshohda yangidan qurilgan zamonaviy tibbiyot maskani 8 450 nafar aholiga xizmat ko‘rsatadi
2026-08-27 22:00:00 / Yangiliklar
O‘zbekiston Respublikasi davlat mustaqilligining 35 yilligi arafasida Vobkent tumanida aholi salomatligini muhofaza qilish, tibbiy xizmat sifatini oshirish va zamonaviy sharoitlar yaratishga qaratilgan bunyodkorlik ishlari davom etmoqda.
Bugun tumanda yana bir quvonchli voqea — G‘aribshoh mahallasidagi oilaviy shifokorlik punktining yangi binosi ochildi. Mazkur tibbiyot maskani mahalliy budjetning 1 milliard 100 million so‘m mablag‘i hisobidan “SHAVKAT SHOKIR SAVDO” MCHJ tomonidan zamonaviy talablar asosida qayta bunyod etildi.
Yangi oilaviy shifokorlik punkti 1 252 ta xonadon va 8 450 nafar aholiga tibbiy xizmat ko‘rsatadi. Muassasada 1 051 ta oila tibbiy nazorat va xizmat bilan qamrab olingan bo‘lib, ularga jami 11 nafar tibbiyot xodimi — 2 nafar oilaviy shifokor, 7 nafar o‘rta tibbiyot xodimi hamda 2 nafar kichik tibbiyot xodimi xizmat ko‘rsatadi.
Tantanali ochilish marosimida tuman hokimi o‘rinbosari Amonjon Axtamov ishtirok etib, G‘aribshoh mahallasi aholisini O‘zbekiston Respublikasi davlat mustaqilligining 35 yilligi hamda yangi, zamonaviy oilaviy shifokorlik punkti foydalanishga topshirilgani bilan samimiy muborakbod etdi.
— Yangi tibbiyot muassasasi xalqimiz salomatligini asrash yo‘lida uzoq yillar samarali xizmat qilsin. Aholiga ko‘rsatilayotgan tibbiy xizmat sifati va qulayligi yanada oshsin, — deya ta’kidlandi tadbirda.
Bugungi yangilanish — G‘aribshoh mahallasi aholisi uchun munosib tibbiy xizmatdan foydalanish imkoniyatlarini kengaytiradigan muhim qadamdir.
Tuman hokimligi matbuot xizmati