Xalq deputatlari Vobkent tumani Kengashining Korrupsiyaga qarshi kurashish va xavfsizlik masalalari boʻyicha doimiy komissiyasining navbatdagi yigʻilishi boʻlib oʻtdi
2026-07-24 15:00:00 / Majlislar
Xalq deputatlari Vobkent tumani Kengashining Korrupsiyaga qarshi kurashish va xavfsizlik masalalari boʻyicha doimiy komissiyasining navbatdagi yigʻilishi boʻlib oʻtdi. Unda doimiy komissiya aʼzolari, tegishli tashkilot va idoralar rahbarlari hamda mutasaddi masʼullar ishtirok etdi.
Yigʻilish kun tartibiga kiritilgan masalalar yuzasidan mutasaddi rahbarlarning axborot va hisobotlari tinglanib, tumanda qonun ustuvorligini taʼminlash, jinoyatchilikning oldini olish, fuqarolar murojaatlari bilan ishlash samaradorligini oshirish hamda jamoat xavfsizligini mustahkamlash borasida amalga oshirilayotgan ishlar atroflicha muhokama qilindi.
Dastlab, Vobkent tumanida kriminogen vaziyatni yaxshilash, jinoyatlarning barvaqt oldini olish hamda jinoyat sodir etilishiga sabab boʻlayotgan omillarni bartaraf etish yuzasidan koʻrilgan chora-tadbirlar toʻgʻrisida tuman prokurorining axboroti eshitildi.
Axborotda tumanda jinoyatchilikni jilovlash, huquqbuzarliklarning kelib chiqish sabab va shart-sharoitlarini aniqlash hamda ularni bartaraf etish, profilaktik tadbirlarni kuchaytirish, mahallalarda "xavfsiz hudud" tamoyili asosida olib borilayotgan ishlar yuzasidan batafsil maʼlumot berildi. Komissiya aʼzolari tomonidan bu boradagi ishlar tahlil qilinib, mavjud kamchiliklarni bartaraf etish yuzasidan masʼullarga tegishli tavsiya va topshiriqlar berildi.
Shuningdek, Vobkent tumanida huquqbuzarliklarning oldini olish, ularning profilaktikasini tashkil etish hamda jamoat xavfsizligini taʼminlash boʻyicha 2026-yil II chorak davomida amalga oshirilgan ishlar yuzasidan tuman Ichki ishlar boʻlimi boshligʻining hisoboti koʻrib chiqildi.
Hisobot davomida jinoyatchilikni kamaytirish, yoʻl harakati xavfsizligini taʼminlash, voyaga yetmaganlar va yoshlar oʻrtasida huquqbuzarliklarning oldini olish, oilaviy zoʻravonlik va boshqa salbiy holatlarni bartaraf etish, profilaktika inspektorlari faoliyati samaradorligini oshirish borasida amalga oshirilgan ishlar yuzasidan axborot berildi. Deputatlar tomonidan hisobot yuzasidan savollar berilib, mavjud muammolar va ularni bartaraf etish yoʻllari muhokama qilindi.
Kun tartibidagi navbatdagi masala sifatida Oʻzbekiston Respublikasi Prezidentining Vobkent tumanidagi Xalq qabulxonasi tomonidan 2026-yil II chorak davomida aholi murojaatlari bilan ishlash, ularning muammolarini hal etish borasida amalga oshirilgan ishlar hamda yoʻl qoʻyilgan kamchiliklar toʻgʻrisidagi axborot tinglandi.
Unda fuqarolarning murojaatlarini oʻz vaqtida koʻrib chiqish, sayyor qabullarni tashkil etish, murojaatlar orqali koʻtarilgan dolzarb masalalarni ijobiy hal etish boʻyicha amalga oshirilgan ishlar tahlil qilindi. Shuningdek, murojaatlarni koʻrib chiqishda uchrayotgan ayrim kamchiliklar yuzasidan fikr-mulohazalar bildirilib, ularni bartaraf etish boʻyicha aniq vazifalar belgilab olindi.
Yigʻilish yakunida kun tartibidagi barcha masalalar yuzasidan doimiy komissiyaning tegishli qarorlari qabul qilinib, masʼul tashkilotlarga aniq topshiriq va tavsiyalar berildi. Belgilangan vazifalarning oʻz vaqtida va sifatli ijrosini taʼminlash yuzasidan deputatlik nazorati olib borilishi taʼkidlandi.
Tuman hokimligi matbuot xizmati