Buxoro viloyati Vobkent tumani hokimligi

Vobkent tumanidagi “Changaron” mahalla fuqarolar yig‘ini Nayman qishlog‘ida yashovchi Umar Rajabov qishloq xo‘jaligida o‘ziga xos innovatsiya hisoblangan biogomus tayyorlashga qiziqib, avval o‘z hovlisidagi tomorqa yerida, keyinchalik tashlandiq holdagi 0,5 gektarga yaqin yerda “Kaliforniya qizil yomg‘ir chuvalchangi”ni ko‘paytirishga ahd qildi. Mana, 7 yildirki, ekin yeri unumdorligini oshirishda katta ahamiyatga ega biogomus o‘g‘it mahsulotini yetishtirish bu omilkor qishloq odami uchun daromad manbaiga aylandi. Bu faoliyati bilan Umar aka bir yilda 100 million so‘mgacha daromad olish harakatiga tushgan.

Viloyat hokimi Botir Zaripov Vobkent tumanida qishloq xo‘jaligida borayotgan agrotexnik tadbirlarni ko‘zdan kechirar ekan, Umar Rajabov xo‘jaligi faoliyatini ham borib ko‘rdi.  

— Tomorqamizda ixcham issiqxona qurib, unda har yili pomidor, bodring, kartoshka, ko‘katlar yetishtirib kelamiz. Hosildorlikni oshirish payida biogomus tabiiy organik o‘g‘itni tayyorlashga qiziqib qolganman, — deydi Umar Rajabov. — Dastlab 2 kvadrat metr hajmida Kaliforniya qizil yomg‘ir chuvalchangini sotib olib, mahalliy o‘g‘it bilan omuxta qilib ish boshlagandim. Bu o‘g‘itni o‘zim tomorqamizda, undagi 2,5 sotixdan iborat mevali intensiv bog‘imizda sinovdan o‘tkazib, yaxshi hosildorlikka erishib kelamiz. Tashlandiq yer maydonini 10 kvadrat metr qismiga tashlangan “qizil yomg‘ir chuvalchangi” yarim yilda 24 kvadrat metrga kengaytirildi. Shundan so‘ng biogomus o‘g‘it-mahsulotini yetishtirish uchun “Cho‘rikalon” MFY Vag‘onziyak qishlog‘idagi “Nurbek Yormat” fermer xo‘jaligi dala chetidan qariyb yarim gektar yer maydonini ijaraga olib, ishni rivojlantirishga kirishdik.    

Umar Rajabov ikki ishchisi ko‘magida o‘tgan yili 130 tonnaga yaqin biogomus o‘g‘itini tayyorlab, tuman obodonlashtirish boshqarmasi bilan hamkorlikda realizatsiya qilishga erishgan. Bunda xom ashyo, ya’ni mahalliy o‘g‘itni aholi xonadonlaridan yetkazib berishda obodonlashtirish boshqarmasi yordami qo‘l kelmoqda. Bugunga kelib uning organik mahsuloti hajmi 1 ming kvadrat metrga yetkazilgan bo‘lib, bultur tayyorlangan o‘g‘itdan 80 tonnasi boshqarma ko‘magida, 40 tonnadan oshig‘i yakka tartibda, aholi tomorqalari, dehqon xo‘jaliklariga sotilgan. 

Mutaxassislar fikricha, chuvalchanglar ko‘p urug‘ hosil qiladi. “Kaliforniya qizil yomg‘ir chuvalchangi” mahalliy “yovvoyi” chuvalchangga nisbatan faol va serpushtdir. Uzunligi 99 millimetrgacha, tana diametri 3-5 millimetr bo‘lib, qulay sharoitda har 7 kunda urug‘laydi. Biogomus tarkibida 40-50 foiz quruq organik massa, 10-12 foiz gomus, 0,8-0,3 foiz azot, 1,3-2,5 foiz fosfor, 1,2-3,9 foiz kaliy, 4,5-8,0 foiz kalsiy va boshqa mikroelementlar mavjud.

Hozirda Umar Rajabov ijtimoiy tarmoqda o‘z faoliyatini kengaytirib, organik modda tayyorlash uslubi va tadbirkorlik faoliyatini yorituvchi telegram kanalini tashkil etib, mazkur kanal orqali boshqa mahalla va qishloqlardagi tomorqa xo‘jaliklariga ham sifatli biogomus mahsulotini yetkazib berishni yo‘lga qo‘ygan. 

Tuman hokimligi matbuot xizmati