Buxoro viloyati Vobkent tumani hokimligi

Respublikamiz miqyosida “Yagona Vatan, yagona xalq bo‘lib, yangi hayot va kelajak yaratamiz!” shiori ostida o‘tkazilayotgan shukronalik tadbirlari Vobkent tumanida ham ko‘tarinki ruhda davom etmoqda. Ushbu ezgu tashabbusni munosib tashkil etish maqsadida Respublika Ma’naviyat va ma’rifat markazi tuman bo‘linmasi, “Nuroniy” jamg‘armasi tuman bo‘limi hamda Mahallalar uyushmasi tuman bo‘limi hamkorligida qo‘shma qaror imzoladi.

Mazkur qaror asosida ishchi guruh tuzilib, tadbirlar o‘tkaziladigan mahallalar hamda manzillar aniq belgilandi. Reja-jadval asosida bugun 27-son Madaniyat markazida bo‘lib o‘tgan tadbir ana shu hamkorlikning yorqin namunasi bo‘ldi.

Tadbirni tuman hokimi o‘rinbosari Sherzod Husenov kirish so‘zi bilan ochib, yurtimizda amalga oshirilayotgan keng ko‘lamli islohotlar, xalqimiz farovonligini oshirish yo‘lida olib borilayotgan bunyodkorlik ishlari haqida to‘xtaldi. Ayniqsa, tumanda yangi barpo etilayotgan ijtimoiy soha obyektlari, zamonaviy qiyofa kasb etayotgan maktablar, yangi maktabgacha ta’lim tashkilotlari, sport maydonchalari hamda tibbiyot muassasalari haqida berilgan ma’lumotlar yig‘ilganlarda faxr va ishonch tuyg‘usini yanada mustahkamladi.

Shundan so‘ng tuman bosh imomi G‘olibjon Ochilov so‘zga chiqib, bugungi tinch va osoyishta hayotimiz uchun shukronalik keltirish har birimizning burchimiz ekanini ta’kidladi. U o‘z nutqida tumanda faoliyat yuritayotgan 10 ta jome’ masjidi, haj va umra ziyoratlariga yaratilgan keng imkoniyatlar, bugungi erkinlik va bag‘rikenglik muhiti haqida so‘z yuritib, barchani ana shu ne’matlarning qadriga yetishga chaqirdi.

Kun tartibidagi masalalar yuzasidan “Nuroniy” jamg‘armasi tuman bo‘limi rahbari Baxtiyor Boboqulov hamda Mahallalar uyushmasi tuman bo‘limi rahbari Mahmud Halimovlar ham so‘zga chiqib, mahallalarda hamjihatlik, mehr-oqibat va ijtimoiy faollikni kuchaytirish borasidagi ishlar haqida fikr bildirdilar.

Tadbir davomida o‘zining fidoyiligi, jamoatchilik ishlaridagi faolligi bilan ajralib turgan bir guruh mahalla fuqarolari tuman hokimligining tashakkurnomalari va esdalik sovg‘alari bilan tantanali ravishda taqdirlandi. Bu esa tadbirga yanada ko‘tarinki ruh bag‘ishladi.

Madaniyat bo‘limi xushovoz xonandalari tomonidan taqdim etilgan konsert dasturi esa barchaga bayramona kayfiyat ulashib, qalblarda shukronalik, Vatanga muhabbat va kelajakka ishonch tuyg‘ularini yanada mustahkamladi.

Vobkentda o‘tkazilayotgan bunday shukronalik tadbirlari yurtdoshlarimiz qalbida birlik va hamjihatlikni mustahkamlab, “Yagona Vatan” g‘oyasini yanada teran anglashga xizmat qilmoqda.

Tuman hokimligi matbuot xizmati