PF–63-sonli Farmon mazmuni bo‘yicha inspeksiya xodimlariga tushuntirish berildi
2026-05-12 12:00:00 / Yangiliklar
Yig‘ilishda ta’kidlanishicha, farmonning asosiy maqsadi — tadbirkorlik faoliyatiga noqonuniy aralashuvlarni cheklash, korrupsion xavflarni kamaytirish hamda davlat organlari va biznes o‘rtasida shaffoflik va hisobdorlikni ta’minlashdan iborat.
2026-yil 1-iyuldan boshlab “Yagona davlat nazorati” axborot tizimi ishga tushiriladi. Ushbu tizim orqali tekshiruvlar va muloqotlar elektron ro‘yxatga olinadi, nazorat jarayonlari raqamlashtiriladi, shuningdek, davlat xodimlarining faoliyati bo‘yicha real vaqt rejimida ma’lumot olish imkoniyati yaratiladi.
Shuningdek, 2026-yil 1-avgustdan boshlab “Biznes himoya” QR-kodi tizimi joriy etiladi. Unga ko‘ra, barcha tekshiruvlar majburiy ravishda QR-kod orqali ro‘yxatga olinadi, tizimda qayd etilmagan nazorat tadbirlari esa noqonuniy hisoblanadi.
Farmonga muvofiq, davlat xizmatchilari va tadbirkorlar o‘rtasidagi har bir muloqot elektron tizimda qayd etilishi shart. Belgilangan tartibga rioya qilinmagan hollarda esa xizmat tekshiruvlari, intizomiy choralar hamda javobgarlik mexanizmlari qo‘llanilishi nazarda tutilgan.
Yig‘ilish yakunida inspeksiya xodimlariga farmon talablarini qat’iy bajarish, raqamli nazorat tizimlaridan samarali foydalanish hamda tadbirkorlik subyektlari bilan ishlashda shaffoflik va qonuniylik tamoyillariga amal qilish bo‘yicha topshiriqlar berildi.