Paxtachida infratuzilma yangilanmoqda: o‘zgarishlar mahalla hayotiga kirib bormoqda
2026-08-21 14:55:00 / Yangiliklar
O‘zbekiston Respublikasi Prezidentining PQ-49-son qarori asosida tumandagi Birlik, Navoiy, Paxtachi, Yog‘du va Ozod mahallalari “Og‘ir toifadagi mahallalar” dasturiga kiritilgan.
Dastur doirasida har bir mahalla uchun Respublika byudjetidan 2 milliard so‘mdan, jami 10 milliard so‘m, mahalliy byudjetdan esa 1 milliard so‘mdan, jami 5 milliard so‘m mablag‘ yo‘naltirilgan. Ushbu mablag‘lar mahallalarning muhandislik-kommunikatsiya va ijtimoiy infratuzilmasini yaxshilashga xizmat qilmoqda.
Shu ishlar izchil davom etayotgan Paxtachi mahallasida ham o‘zgarishlar ko‘lami kengaymoqda.
Jumladan:
🔹 1,5 km ichki yo‘l asfaltlanmoqda;
🔹 6,5 km elektr tarmog‘i zamonaviy SIP kabellariga almashtirilmoqda;
🔹 250 dona tungi yoritish chiroqlari o‘rnatilmoqda;
🔹 100 dona beton tayanch ustun o‘rnatilmoqda;
🔹 yangi transformator o‘rnatilmoqda;
🔹 2,7 km ariqlar betonlashtirilmoqda;
🔹 2,7 km ichimlik suvi tarmog‘i tortilib, aholining suv ta’minoti yaxshilanmoqda.
Bu raqamlarning har biri mahalla aholisining kundalik hayotidagi muayyan muammoni hal etishga qaratilgan.
Sifatli yo‘l — harakatlanish uchun qulaylik. Yangi elektr tarmoqlari — barqaror ta’minot. Tungi yoritish — xavfsizlik. Ichimlik suvi tarmog‘i — aholi salomatligi va turmush farovonligi. Beton ariqlar esa obodlik va suvdan samarali foydalanish imkoniyatini oshiradi.
Ammo mahalladagi taraqqiyot faqat infratuzilma bilan cheklanib qolmasligi kerak. Shu bois Paxtachida xizmat ko‘rsatish, servis va tadbirkorlik ob’yektlarini ko‘paytirish, yangi ish o‘rinlari yaratish bo‘yicha ham tizimli ishlar boshlangan.
Bu esa mahallada yaratilgan infratuzilmani iqtisodiy faollik bilan uyg‘unlashtirish, aholi daromadlarini oshirish va yoshlar hamda ish izlayotgan fuqarolar uchun yangi imkoniyatlar yaratishga xizmat qiladi.
Ya’ni maqsad — faqat mahallani obod qilish emas, balki uning iqtisodiy salohiyatini oshirish, aholining turmush sharoitini yaxshilash va odamlar o‘z hududida munosib daromad topishi uchun imkoniyat yaratish.
Paxtachida bugun amalga oshirilayotgan ishlar mahallaning ertangi qiyofasiga qo‘yilayotgan muhim qadamdir.